ភ្នំពេញៈ សាលា​ដំបូង​រាជធានី​ភ្នំពេញ​កាល​ពី​ព្រឹក​ថ្ងៃ​ទី២៥​ ខែ​កក្កដា​នេះ​បាន​ប្រកាស​សាល​ក្រម ផ្តន្ទា​ទោស​ជន​ជាប់​ចោទ​ចំនួន ២នាក់​ដែល​ត្រូវ​ជា​ប្តី​ប្រពន្ធ​នឹង​គ្នា​ ដែល​បុរស​ជា​ប្តី​គឺ​ជា​ជន​ពិការ​ជម្ងឺ​ស្វិត​ជើង ចំណែក​ឯ ប្រពន្ធ​មាន​ផ្ទុក​ជម្ងឺ​អេដស៍​ ដាក់​ពន្ធនាគារ​ម្នាក់ៗ​ចំនួន ​១៥ ​ឆ្នាំ​ក្រោម​ការ​ចោទ​ប្រកាន់​ពី​បទ​ «អំពើ​លក់-ដូរ​មនុស្ស​សម្រាប់​​ឆ្លង​ដែន» ជាប់​ពាក់​ព័ន្ធ​នឹង​ករណី​នាំ​យក​កូន​ចិញ្ចឹម​អាយុ ៧ខែ​ ដែល​ពួកគេ​ទើប​បាន​ទិញ​ក្នុង​តម្លៃ ៤០០​ដុល្លារ ពី​គ្រួសារ​ក្រីក្រ​​មួយ​នៅ​ភ្នំពេញ ដើម្បី​យក​ទៅ​សុំ​ទាន​គេ​នៅ​ក្នុង​ប្រទេស​ម៉ាឡេស៊ី ប្រព្រឹត្ត​កាល​ពី​ឆ្នាំ​កំឡុង​ខែ​វិច្ឆិកា ឆ្នាំ ២០១៣។