ភ្នំពេញ៖ លោកនាយករដ្ឋមន្ត្រី ហ៊ុន ម៉ាណែត លើកឡើងថា កម្ពុជានឹងបន្តទទួលបានវិនិយោគប្រភេទឧស្សាហកម្មផ្អែកលើជំនាញជាបន្តបន្ទាប់ ហើយថា កម្ពុជាក៏ត្រូវបន្ដអភិវឌ្ឍហេដ្ឋារចនាសម្ព័ន្ធឧស្សាហកម្មដែលបម្រើទៅដល់ការវិនិយោគផងដែរ។
លោកថ្លែងថា៖ «ខ្ញុំពិតជាមានសុទិដ្ឋិនិយម និងក្ដីសង្ឃឹមយ៉ាងមុតមាំថា ក្រោមដំបូលនៃសុខសន្តិភាព ស្ថិរភាពនយោបាយ ម៉ាក្រូសេដ្ឋកិច្ច ជាមួយនឹងធនធានមនុស្ស និងកម្លាំងពលកម្មជំនាញវ័យក្មេងប្រកបដោយចីរភាពរបស់កម្ពុជា និងភាពទាក់ទាញនៃការវិនិយោគកម្ពុជា យើងនឹងបន្តទទួលបានវិនិយោគប្រភេទឧស្សាហកម្មផ្អែកលើជំនាញនេះជាបន្តបន្ទាប់»។
លោកនាយករដ្ឋមន្ត្រីថ្លែងដូច្នេះ ក្នុងពិធីសម្ពោធដាក់ឱ្យដំណើរការរោងចក្រដំឡើងរថយន្ត តូយ៉ូតា (Toyota) របស់ក្រុមហ៊ុនតូយ៉ូតា ស៊ុយស៊ូ មេនូហ្វេកឆឺរីង (Toyota Tsusho Manufacturing) នាថ្ងៃទី២ ខែឧសភា នៅរាជធានីភ្នំពេញ។
លោកបន្តថា៖ «កម្ពុជាក៏ត្រូវបន្ដអភិវឌ្ឍហេដ្ឋារចនាសម្ព័ន្ធឧស្សាហកម្មដែលបម្រើទៅដល់ការវិនិយោគនិងការបណ្ដុះបណ្ដាលធនធានមនុស្សប្រកបដោយជំនាញស្របតាមតម្រូវការទីផ្សារពលកម្មជាបន្ត ឥតដាច់ផងដែរ»។
លោកនាយករដ្ឋមន្ត្រីបានលើកឡើងពីចក្ខុវិស័យរបស់រាជរដ្ឋាភិបាលនីតិកាលទី៧ គឺការជំរុញកែប្រែនិងធ្វើទំនើបកម្មរចនាសម្ព័ន្ធឧស្សាហកម្មនៅកម្ពុជាពីឧស្សាហកម្មអតិពលកម្មឈានទៅឧស្សាហកម្មផ្អែកលើជំនាញ ស្របតាមគោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ២០១៥-២០២៥។
ចក្ខុវិស័យនេះមានគោលដៅរួមចំណែកដល់ការបង្កើតតម្លៃបន្ថែមខ្ពស់ដែលទ្រទ្រង់ដល់កំណើនសេដ្ឋកិច្ចប្រកបដោយចីរភាព និងបរិយាបន្ន ការបង្កើតការងារ ការបង្កើនប្រាក់ចំណូលសមស្រប និងជីវភាពកាន់តែប្រសើរឡើងជូនដល់ប្រជាពលរដ្ឋ។
កម្ពុជាបានកំណត់ចក្ខុវិស័យក្នុងការប្រែក្លាយខ្លួនជាមជ្ឈមណ្ឌលផ្តុំសកម្មភាពផលិតគ្រឿងបង្គុំយានយន្ត និងបរិក្ខារអេឡិចត្រូនិកសម្រាប់នាំចេញទៅទីផ្សារក្នុងតំបន់ និងសកលលោក។
លោក ហ៊ុន ម៉ាណែត បញ្ជាក់ថា៖ «ការសម្រេចបានចក្ខុវិស័យនេះនឹងនាំមកជាផ្លែផ្កាវិជ្ជមានជាច្រើនសម្រាប់ការអភិវឌ្ឍសង្គមជាតិកម្ពុជា»។
ផែនទីបង្ហាញផ្លូវនៃការអភិវឌ្ឍយានយន្តនិងអេឡិចត្រូនិកកម្ពុជា បានកំណត់វិធានការជាអាទិភាពតាមផ្នែកចំនួន៥ រួមមាន ទី១ យុទ្ធសាស្ត្រ និងការសម្របសម្រួលអន្តរស្ថាប័ន ទី២ ធនធានមនុស្សនិងនវានុវត្តន៍ ទី៣ ហេដ្ឋារចនាសម្ព័ន្ធ ទី៤ កិច្ចសម្រួលពាណិជ្ជកម្ម និងទី៥ បរិយាកាសធុរកិច្ចនិងការវិនិយោគ។
លោក ហ៊ុន ម៉ាណែត ថ្លែងបន្តថា នៅក្នុងការអភិវឌ្ឍសង្គម សេដ្ឋកិច្ចជាតិ រាជរដ្ឋាភិបាលតែងចាត់ទុកវិស័យឯកជនជាក្បាលម៉ាស៊ីននៃកំណើន និងជាដៃគូសំខាន់ក្នុងការបង្កើតការងារ ការបង្កើតគំនិតច្នៃប្រឌិត ការលើកកម្ពស់ផលិតភាព និងការពង្រឹងសមត្ថភាពប្រកួតប្រជែងរបស់កម្ពុជានៅក្នុងទីផ្សារតំបន់ និងសកលលោក។
លោកនាយករដ្ឋមន្ត្រីថ្លែងទៀតថា ការដាក់ឱ្យដំណើរការរោងចក្រដំឡើងរថយន្ត តូយ៉ូតា នេះគឺជាការរួមចំណែកយ៉ាងសំខាន់មួយទៀតក្នុងវិស័យឯកជនក្នុងការអភិវឌ្ឍឧស្សាហកម្ម ក៏ដូចជាសេដ្ឋកិច្ចជាតិ តាមរយៈការចូលរួមបង្កើតភាពប្រកួតប្រជែង ការលើកកម្ពស់ការធ្វើពិពិធកម្ម និងការធ្វើទំនើបកម្មឧស្សាហកម្ម ក៏ដូចជា ការផ្តល់ឱកាស និងជម្រើសការងារប្រកបដោយជំនាញកាន់តែច្រើនដល់ប្រជាពលរដ្ឋកម្ពុជា។
លោកថ្លែងថា៖ «ការផលិត ការសម្ពោធនៅថ្ងៃនេះនឹងបានផលជាច្រើនជូនទៅដល់សេដ្ឋកិច្ចជាតិ និងប្រជាពលរដ្ឋយើង ហើយសំខាន់លើកកម្ពស់នូវផលិតភាព និងលើកកម្ពស់នូវកិត្យានុភាពរបស់កម្ពុជា ហើយជាមោទនភាពរបស់ជាតិយើងផង របស់ប្រជាជនខ្មែរយើងផង»។
លោក Ueno Atsushi ឯកអគ្គរាជទូតជប៉ុនប្រចាំកម្ពុជាថ្លែងក្នុងពិធីនេះតាមរយៈអ្នកបកប្រែថា រោងចក្រតូយ៉ូតានេះពិតជានឹងរួមចំណែកទាំងការធ្វើពិពិធកម្ម និងទំនើបកម្មនៃឧស្សាហកម្មកម្មន្តសាលនៅក្នុងប្រទេសកម្ពុជា និងការអភិវឌ្ឍធនធានមនុស្សប្រកបដោយគុណភាពខ្ពស់។
លោកបង្ហាញសង្ឃឹមថា បុគ្គលិកកម្ពុជាទាំងអស់ដែលបានទទួលការបណ្ដុះបណ្ដាលដោយក្រុមហ៊ុន តូយ៉ូតា ស៊ុយស៊ូ នឹងរួមចំណែកជួយឱ្យកម្ពុជាក្លាយជាមជ្ឈមណ្ឌលកម្មន្តសាល នាពេលអនាគតដ៏ខ្លីខាងមុខនេះ។
ចំណែក លោក Ichiro Kashitani អគ្គនាយក និងជានាយកប្រតិបត្តិក្រុមហ៊ុនសាជីវកម្ម តូយ៉ូតា ស៊ុយស៊ូ ថ្លែងក្នុងពិធីនេះថា ការចាប់ផ្តើមប្រតិបត្តិការផ្គុំរថយន្តនេះនឹងបន្សល់ទុកនូវកេរដំណែលដែលជាសក្ខីកម្មបង្ហាញពីជោគជ័យរបស់រាជរដ្ឋាភិបាលកម្ពុជា និង ក្រុមហ៊ុន តូយ៉ូតា ស៊ុយស៊ូ នៅក្នុងគម្រោងនេះ។
លោកបញ្ជាក់ថា ក្រុមហ៊ុននេះនឹងបន្តធ្វើយ៉ាងណាឱ្យធុរកិច្ចនេះកាន់តែមានភាពជឿនលឿននៅកម្ពុជាបន្ថែមទៀតដើម្បីរួមចំណែកឱ្យបានកាន់តែទូលំទូលាយដល់ការកសាងសុភមង្គលនៅក្នុងសង្គមទាំងមូល ដូចជា តាមរយៈការជួយឱ្យកម្ពុជាសម្រេចបាននូវអព្យាក្រឹតកាបូន និងលើកកម្ពស់ការអប់រំជាដើម៕