ដោយយល់ឃើញពីកំណើននិស្សិត ជាច្រើនបាន និងកំពុងបន្តការសិក្សានៅក្រៅប្រទេស យើងសូមណែនាំអ្នកទាំងអស់នោះឲ្យស្គាល់សមាគមនិស្សិតខ្មែរនៅតាមប្រទេសមួយចំនួនដែលពួកគេអាចទាក់ទងសាកសួរពីព័ត៌មានសិក្សា ពីការស្នាក់នៅ ទំនៀមទម្លាប់ កន្លែងកម្សាន្ត ម្ហូបអាហារ របៀបរស់នៅ ឬព័ត៌មានផ្សេងៗបាន។
១. សមាគមនិស្សិតខ្មែរនៅប្រទេសជប៉ុន
សមាគមនិស្សិតខ្មែរនៅប្រទេសជប៉ុនត្រូវបានបង្កើតឡើងក្នុងអំឡុងឆ្នាំ១៩៩៤ ក្រោមគោលដៅនៃការចែករំលែកវប្បធម៌ ចំណេះដឹង បង្កើតបណ្ដាញទំនាក់ទំនងជាមួយនិស្សិតខ្មែរ។ សមាគមនេះមាននៅ៤តំបន់ធំៗ គឺតំបន់កាន់តូ តំបន់ណាហ្គោយ៉ា តំបន់កាន់សៃ និងតំបន់គ្យូស៊ូ។
សកម្មភាពមួយចំនួនដែលសមាគមនិស្សិតខ្មែរបានធ្វើកន្លងមក គឺការជួយនិស្សិតខ្មែរតាមរយៈការរៀបចំឲ្យមានកម្មវិធីប្រកួតប្រជែងសរសេរសំណេរ ការផ្ដល់ជាសម្ភារសិក្សា ព្រមទាំងធ្លាប់បានផ្ដល់ថវិកាឧបត្ថម្ភធ្វើអណ្ដូងទឹកជាដើម។
សមាគមនិស្សិតនេះ មានរៀបចំរចនាសម្ព័ន្ធត្រឹមត្រូវ មានការបោះឆ្នោតជ្រើសរើសប្រធានសមាគម និងគណៈកម្មការនៅក្នុងសមាគមជារៀងរាល់ឆ្នាំ។ សមាគមនិស្សិតខ្មែរនៅប្រទេសជប៉ុនគឺមានលោកយ៉ែម វិបុល អាយុ៣០ឆ្នាំជាប្រធាន។
និស្សិតខ្មែរអាចទាក់ទងមកសមាគមបានតាមរយៈគេហទំព័រ«http://www.csaj-khmer.org/newsite/»។ យោងតាមទិន្នន័យគេហទំព័រនេះនិស្សិតដែលបានទៅរៀននៅប្រទេសជប៉ុនត្រឹមឆ្នាំ២០១៣ មានចំនួនប្រមាណ៣៨០នាក់។
២. សមាគមនិស្សិតខ្មែរនៅសាធារណរដ្ឋកូរ៉េ
សមាគមនិស្សិតខ្មែរនៅសាធារណរដ្ឋកូរ៉េត្រូវបានបង្កើតឡើងតាំងពីចុងឆ្នាំ២០១១មកម្ល៉េះ ក្នុងគោលដៅរឹតចំណងមិត្តភាព ភាពជាសហគមន៍ និងផ្សព្វផ្សាយវប្បធម៌ខ្មែរនៅក្នុងប្រទេសកូរ៉េ។ សមាគមនេះមានតួនាទីទាក់ទងជាមួយនឹងរដ្ឋាភិបាលកូរ៉េ អង្គការមិនមែនរដ្ឋាភិបាល បើកការប្រជុំក្នុងសមាគម ការប្រជុំការសហការទំនាក់ទំនងជាមួយនឹងវិទ្យាស្ថាន ឬសាលាដទៃនៅក្នុងប្រទេសកូរ៉េ ព្រមទាំងផ្សព្វផ្សាយវប្បធម៌ប្រពៃណីខ្មែរដល់និស្សិតជនជាតិដទៃដែលសិក្សានៅសាធារណរដ្ឋកូរ៉េនេះថែមទៀត។
សមាគមនិស្សិតខ្មែរនៅសាធារណរដ្ឋកូរ៉េ បានទទួលជំនួយហិរញ្ញវត្ថុខ្លះៗពីរដ្ឋាភិបាលទីក្រុងសេអ៊ូល ក៏ប៉ុន្តែមិនមែនជាជំនួយអចិន្រៃ្តយ៍ សព្វថ្ងៃសមាគមនេះ កំពុងតែស្វែងរកជំនួយបន្ថែមទៀត សម្រាប់សកម្មភាពផ្សេងៗទៀត។
លោក ប្រុញ សុភាណា មានអាយុ២៨ឆ្នាំដែលកំពុងបន្តរៀនថ្នាក់អនុបណ្ឌិត ផ្នែកគោលនយោបាយសាធារណៈ(Public Policy)សព្វថ្ងៃគឺជាប្រធានសមាគមនិស្សិតនៅទីនោះតែម្តង។ លោកបានជាប់ឆ្នោតជាប្រធានសមាគមចាប់ពីខែមករាឆ្នាំ២០១៤មក។
យោងតាមទិន្នន័យរបស់មជ្ឈមណ្ឌលអាស៊ាន-កូរ៉េ សព្វថ្ងៃនិស្សិតខ្មែរដែលកំពុងសិក្សានៅប្រទេសកូរ៉េមានចំនួនប្រមាណ២៥០នាក់ ដែលនៅក្នុងចំណោមនោះ និស្សិតខ្មែរដែលជាសមាជិករបស់សមាគមមានចំនួន១៥០នាក់។
និស្សិតខ្មែរដែលមករៀននៅសាធារណរដ្ឋកូរ៉េ អាចទាក់ទងមកសមាគមបានតាមរយៈ ទំព័រហ្វេសប៊ុករបស់សមាគម «https://www.facebook.com/CSAKorea.fanpage»។
៣. សមាគមនិស្សិតខ្មែរនៅព្រះរាជាណាចក្រថៃ
សមាគមនិស្សិតខ្មែរនៅព្រះរាជាណាចក្រថៃត្រូវបានបង្កើតឡើងកាលពីឆ្នាំ២០១២ ដោយក្រុមនិស្សិតខ្មែរទៅរៀននៅប្រទេសថៃ។ សកម្មភាពរបស់សមាគមនេះ មានដូចជាការប្រជុំជាមួយនិស្សិតខ្មែរដើម្បីណែនាំឲ្យស្គាល់គ្នា ការបង្កើតថ្នាក់វប្បធម៌រួមមានការបង្រៀនរបាំប្រពៃណីខ្មែរ ដើម្បីទុកសម្តែងក្នុងកម្មវិធីម្ដងៗ ព្រមទាំងបង្រៀនភាសាថៃដល់និស្សិតខ្មែរដើម្បីឲ្យពួកគេងាយស្រួលក្នុងការទាក់ទងជាមួយជនជាតិថៃក្នុងការរស់នៅប្រចាំថ្ងៃ។ មិនត្រឹមតែប៉ុណ្ណោះ សមាគមនិស្សិតខ្មែរនេះ ក៏បានព្យាយាមបង្កើតទំនាក់ទំនងជាមួយនឹងស្ថានទូតខ្មែរប្រចាំប្រទេសថៃផងដែរ។
សមាគមនេះគឺមានកញ្ញា សឿង កែវបញ្ញា អាយុ២៨ឆ្នាំជាប្រធាន។ សព្វថ្ងៃ កញ្ញាកំពុងរៀនផ្នែកអប់រំសុខភាព និងកាយនីតិសម្បទានៅសាកលវិទ្យាល័យជូឡាឡុងកន។ តាមការអះអាងរបស់បញ្ញា ប្រសិនបើគ្មានសមាគមនិស្សិតខ្មែរនៅប្រទេសថៃនេះទេ និស្សិតខ្មែរអាចនឹងមានបញ្ហាលំបាកច្រើនផ្នែកទំនាក់ទំនង និងការរស់នៅ។
សមាគមនិស្សិតខ្មែរនៅព្រះរាជាណាចក្រថៃសព្វថ្ងៃមាននិស្សិតខ្មែរប្រមាណ៧០នាក់ជាសមាជិក ហើយដែលកំពុងរស់នៅឯជូឡាឡុងកន។ និស្សិតអាចទាក់ទងមកសមាគមបានតាមរយៈទំព័រហ្វេសប៊ុក «https://www.facebook.com/cams tudents.chula?fref=ts »របស់សមាគមបាន។
៤. សមាគមនិស្សិតកម្ពុជានៅប្រទេសឥណ្ឌូនេស៊ី
សមាគមនិស្សិតកម្ពុជានៅប្រទេសឥណ្ឌូនេស៊ីត្រូវបានបង្កើតឡើងដោយស្ថានទូតកម្ពុជាប្រចាំប្រទេសឥណ្ឌូនេស៊ីក្នុងឆ្នាំ២០០៥ ក្រោមគោលគំនិតនៃការរស់នៅជាសហគមន៍ចែករំលែកប្រមូលព័ត៌មាន ជួយគ្នាទៅវិញទៅមកពីនិស្សិតជំនាន់មុនទៅនិស្សិតជំនាន់ក្រោយដែលមកសិក្សានៅប្រទេសនេះ។
ប្រធានសមាគមនិស្សិតកម្ពុជានៅប្រទេសឥណ្ឌូនេស៊ីគឺលោកសិទ្ធិរម្យ ហួនសិរី មានអាយុ២៥ឆ្នាំ សព្វថ្ងៃរៀនជំនាញTechnic Media Digital and Game Design នៅវិទ្យាស្ថានបច្ចេកវិទ្យាបានឌុង (Instituted Technology of Bandung) នៃទីក្រុងបានឌុង។
បេសកកម្មរបស់សមាគមគឺប្រមូលផ្ដុំនិស្សិតកម្ពុជាដើម្បីបង្កើតទំនាក់ទំនង និងជួយគ្នាទៅវិញទៅមក ចែករំលែកវប្បធម៌ខ្មែរជាមួយនឹងបរទេស ផ្ដល់ព័ត៌មានដ៏មានអត្ថប្រយោជន៍សម្រាប់និស្សិតកម្ពុជាដែលរស់នៅតាមតំបន់ខុសៗគ្នា ក៏ដូចជាជួយនិស្សិតដែលជួបបញ្ហាលំបាកហើយដែលត្រូវការជំនួយ។ ចំពោះផ្នែកហិរញ្ញវត្ថុ គឺមានការចែករំលែក និងឧបត្ថម្ភពីសមាជិកនៃសមាគមនេះផ្ទាល់តែម្ដង ហើយពេលខ្លះសមាគមនេះទទួលថវិកាមួយចំនួនពីស្ថានទូតខ្មែរផងដែរ។
សមាគមធ្លាប់បានជួយឧបត្ថម្ភដល់សមាជិក ដែលគ្រួសាររបស់ពួកគាត់នៅប្រទេសកម្ពុជា ជួបឧបទ្ទវហេតុ ឬស្លាប់ដោយផ្ដល់ជាសោហ៊ុយថ្ងៃសំបុត្រយន្តហោះសម្រាប់ពួកគាត់ និងចំណាយផ្ទាល់ខ្លួនខ្លះៗជាដើមផងដែរ។ លោកហួន សិរីប្រធានសមាគមនេះបានឲ្យដឹងថា ប្រសិនបើគ្មានសមាគមនិស្សិតកម្ពុជានៅប្រទេសឥណ្ឌូនេស៊ីទេ និស្សិតកម្ពុជាអាចនឹងជួបនូវបញ្ហាលំបាកមួយចំនួន ពិសេសគឺអ្នកដែលទើបតែមកដល់ថ្មីៗតែម្តង។
ប្រធានសមាគមរូបនេះបានបន្ថែមថា នៅក្នុងសមាគមសព្វថ្ងៃមានសមាជិកទាំងថ្មី ទាំងចាស់សរុបប្រមាណ៣០០នាក់ រួមមានទាំងអ្នកដែលបានត្រឡប់ទៅប្រទេសកម្ពុជាវិញរួចហើយផង។ ចំណែកឯនិស្សិតកម្ពុជាដែលកំពុងរៀន និងរស់នៅក្នុងប្រទេសឥណ្ឌូនេស៊ីបច្ចុប្បន្នមានប្រហែល៩០នាក់។ និស្សិតអាចទាក់ទងមកសមាគមនិស្សិតខ្មែរនៅទីនោះតាមរយៈទំព័រហ្វេសប៊ុក «https://www.facebook.com/CSAI.Page»៕
លី សិរីរ័ត្ន
.jpg)
