.jpg)
លោក ហ៊ុន សែនជូនដំណើរ ព្រះចៅស៊ុលតង់ ហាជី ហាសិនណល់ ប៊ូលហ្កះនៅព្រលានយន្តហោះ កាលពីព្រឹកថ្ងៃទី ៣០ មេសានេះ។ SHS
អ្នកវិភាគនិយាយថា ទស្សនកិច្ចក្រៅផ្លូវការរបស់ព្រះចៅ ស៊ុលតង់ ហាជី ហាសិនណល់ ប៊ូលហ្កះ នៃប្រទេសព្រុយណេនៅកម្ពុជា គឺជាទស្សនកិច្ចបែបបុគ្គលសុទ្ធសាធ និងមិនមានលើកឡើងអំពីគម្រោងព្រែកជីកហ្វូណនតេជោដែលជាប្រធានបទក្ដៅនោះទេ។
ព្រះចៅស៊ុលតង់ ហាជី ហាសិនណល់ ប៊ូលហ្កះ អមដំណើរដោយព្រះអង្គម្ចាស់ អាប់ឌុល ម៉ាទីន បានមកដល់ប្រទេសកម្ពុជាកាលពីយប់ថ្ងៃទី២៩ ខែមេសា បន្ទាប់ពីលោកបានបំពេញទស្សនកិច្ចក្រៅផ្លូវការទៅកាន់ប្រទេសថៃ ដើម្បីជួបជាមួយលោក តាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីថៃ។
នៅពេលមកដល់ព្រលានយន្តហោះអន្តរជាតិភ្នំពេញ លោកត្រូវបានទទួលស្វាគមន៍ដោយផ្ទាល់ពីសំណាក់លោក ហ៊ុន សែន ប្រធានព្រឹទ្ធសភា អមដំណើរដោយកូនប្រុសពីរក្នុងចំណោម៣នាក់ គឺលោក ហ៊ុន ម៉ានិត និង លោក ហ៊ុន ម៉ានី។
បន្ទាប់ពីពិធីអាហារពេលព្រឹករួមគ្នា ដោយមានការចូលរួមពីសំណាក់លោកនាយករដ្ឋមន្ត្រី ហ៊ុន ម៉ាណែតផងនោះ ព្រះចៅស៊ុលតង់ ហាជី ហាសិនណល់ ប៊ូលហ្កះ បានហោះចេញពីកម្ពុជាដោយលោក ហ៊ុន សែន បានជូនដំណើរព្រះអង្គទាំងកណ្ដាលថ្ងៃក្ដៅ។
ការទៅទទួល និងជូនដំណើរផ្ទាល់នៅព្រលានយន្តហោះនេះ មិនខុសពីអ្វីដែលលោក ហ៊ុន សែន ធ្លាប់ទទួលបានពីសំណាក់ព្រចៅស៊ុលតង់ ហាជី ហាសិនណល់ ប៊ូលហ្កះ នោះទេ។ កាលពីឆ្នាំ២០១១ លោកក៏ធ្លាប់ត្រូវបានទទួលបដិសណ្ឋារកិច្ចបែបនេះដោយព្រះចៅស៊ុន ផងដែរ។ នេះបើតាមការបញ្ជាក់របស់លោក ហ៊ុន សែន នៅលើហ្វេសប៊ុក។
លោក ហ៊ុន សែន ចាត់ទុកព្រះចៅស៊ុតង់ ហាជី ហាសិនណល់ ប៊ូលហ្កះ ដែលបច្ចុប្បន្នមានព្រះជន្ម ៧៥ឆ្នាំ ជាបងទី១ បន្ទាប់មកលោក តាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីថៃ ដែលមានអាយុ ៧៤ ឆ្នាំជាបងទី២ ហើយរូបលោកអាយុ ៧២ ឆ្នាំជាប្អូនពៅ។
លោកឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសារធារណៈបានសរសេរនៅលើទំព័រហ្វេសប៊ុករបស់លោកថា ការយាងមកបំពេញទស្សនកិច្ចរបស់ព្រះចៅស៊ុលតង់ នៃប្រទេសព្រុយណេ នៅពេលនេះបង្ហាញពីទំនាក់ទំនងប្រកបដោយភក្តីភាព និងភាពជិតដិតជាបងប្អូន។ ទស្សនកិច្ចនេះក៏ជាការផ្តល់ឱកាសដល់រូបលោកដែលជាកូនៗ ដើម្បីបន្តទំនាក់ទំនង រឹតចំណងមិត្តភាពជាបងជាប្អូននេះបន្តពីមួយជំនាន់ទៅមួយជំនាន់ឲ្យកាន់តែរឹងមាំ។
លោកសរសេរថា៖ «ចំណងមិត្តភាពដ៏ស្អិតរមួតនេះ មិនត្រឹមតែបានសបញ្ជាក់ពីភាតុភាពរវាងបុគ្គល និងបុគ្គល ដែលជាថ្នាក់ដឹកនាំប្រទេសជាតិតែប៉ុណ្ណោះទេ ថែមទាំងបានបង្ហាញពីអនាគតនៃភាពសុខដុម ភាពសុខសាន្ត រុងរឿង នៃប្រជាជាតិទាំងពីរផងដែរ»។
ដំណើរទស្សនកិច្ចក្រៅផ្លូវការនេះមានឡើងស្របពេលដែលមានការបកស្រាយពីសំណាក់កម្ពុជាទៅលើគម្រោងព្រែកជីកហ្វូណនតេជោ ដែលជាគម្រោងមួយវៀតណាមបង្ហាញក្ដីបារម្ភដែលថាវានឹងធ្វើឲ្យបាត់ទឹកទន្លេមេគង្គដែលហូរចូលតំបន់ដីសណ្ដនៅប្រទេសវៀតណាម។
លោក ហ៊ុន សែន និងកូនប្រុសទាំងបី ទទួលទានអាហារជាមួយ ព្រះចៅស៊ុលតង់ ហាជី ហាសិនណល់ ប៊ូលហ្កះ និងកូនប្រុសរបស់លោក។ SHS
លោក ហ៊ុន ម៉ាណែត បានបញ្ជាក់កាលពីថ្ងៃទី២៨ ខែមេសាថា គម្រោងនេះត្រូវការទឹកទន្លេមេគង្គប្រមាណតែ ០,០៦ ភាគរយប៉ុណ្ណោះក្នុងចំណោមទឹកដែលហូរទៅកាន់សមុទ្រឆ្លងកាត់ប្រទេសវៀតណាម។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានលើកឡើងថា លោក ហ៊ុន សែន ទំនងជាមិនលើកឡើងអំពីប្រធានបទព្រែកជីកនេះជាមួយព្រះចៅស៊ុលតង់នៃប្រទេសព្រុយណេទេ ហើយទស្សនកិច្ចកម្រិតបុគ្គលនេះគ្រាន់តែធ្វើឡើងចំពេលមានការដេញដោលរឿងព្រែកជីកនេះប៉ុណ្ណោះ។
លោកនិយាយថា៖ «ខ្ញុំជឿថា សម្ដេចតេជោ លោកមិនលើកឡើងពីបញ្ហាព្រែកជីកនេះទេ ដោយសារព្រុយណេមិនជាប់ពាក់ព័ន្ធនឹងតំបន់មេគង្គ ហើយព្រែកជីកនេះក៏មិនមានឥទ្ធិពលអ្វីលើព្រុយណេដែរ។ លោកបានលើកឡើងពីបញ្ហានេះដើម្បីសុំការគាំទ្រផ្នែកស្មារតីពីប្រធានរដ្ឋឡាវ ដោយសារតែឡាវជាប្រទេសជិតខាង»។
ទោះបីជាទស្សនកិច្ចរបស់ប្រធានរដ្ឋឡាវ ថងលុន ស៊ីសុលីត កាលពីសប្ដាហ៍មុន និងទស្សនកិច្ចរបស់រដ្ឋមន្ត្រីការបរទេសចិន វ៉ាង យី កាលពីពេលថ្មីៗ ដែលសុទ្ធតែជាប្រទេសនៅតាមដងទន្លេមេគង្គ ក្នុងពេលមានការដេញដោលពីគម្រោងព្រែកជីកនេះក៏ដោយ ក៏លោក គិន ភា យល់ថា វាគ្រាន់តែជារឿងចៃដន្យប៉ុណ្ណោះ។
លោកនិយាយថា៖ «ការគាំទ្រផ្នែកស្មារតីរបស់ឡាវគឺដូចទៅនឹងការគាំទ្ររបស់កម្ពុជាសម្រាប់គម្រោងអភិវឌ្ឍន៍ក្នុងស្រុកនានារបស់ឡាវ ដូចជាទំនប់វារីអគ្គិសនីជាដើម។ វាជាស្មារតីក្នុងនាមជាអ្នកជិតខាងល្អ»។
លោកបន្តថា កម្ពុជានឹងព្រុយណេ មានទំនាក់ទំនងល្អនិងតែងតែគាំទ្រគ្នាទៅវិញទៅមក។ លើសពីនេះ លោក ហ៊ុន សែន គឺជាមេដឹកនាំយូរជាងគេនៅអាស៊ាន ហើយព្រះចៅស៊ុលតង់ ហាជី ហាសិនណល់ ប៊ូលហ្កះ ក៏ជាព្រះមហាក្សត្រដែលសោយរាជ្យយូរជាងគេនៅអាស៊ានផងដែរ។ នេះជាកត្តាដែលធ្វើឲ្យទំនាក់ទំនងរបស់លោកមានទំនាក់ទំនងជិតស្និទ្ធជាមួយគ្នាតាមរយៈការបំពេញការងាររបស់លោក។
លោកបន្តថា ទស្សនកិច្ចនេះក៏បង្ហាញពីការរីកឥទ្ធិពលរបស់កម្ពុជាផងដែរ ទោះជាលក្ខណៈបុគ្គលក្ដី ព្រោះថា ប្រសិនបើប្រទេសមួយមិនសំខាន់ ថ្នាក់ដឹកនាំបរទេសនឹងមិនមកធ្វើទស្សនកិច្ចទេ។ នេះជាការបញ្ជាក់លោក គិន ភា៕
