ខណៈចំនួនរោងចក្រសហគ្រាស និងកម្មករនិយោជិតមានការកើនឡើង រដ្ឋាភិបាលនិងប្រធានសហជីពមើលឃើញពីសារៈសំខាន់កាន់តែខ្លាំងនៃក្រុមប្រឹក្សាអាជ្ញាកណ្ដាលក្នុងការដោះស្រាយវិវាទការងារ។
ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគថ្មី និងគម្រោងវិនិយោគពង្រីកចំនួន ១០៦គម្រោង ដែលមានទុនវិនិយោគសរុបចំនួន ២,២ពាន់លានដុល្លារអាមេរិក ក្នុងត្រីមាសទី១ ឆ្នាំ២០២៤។ គម្រោងទាំងនេះអាចបង្កើតការងារថ្មីចំនួនជា ១០,៧ម៉ឺនកន្លែង។ នេះបើតាមការលើកឡើងរបស់លោកនាយករដ្ឋមន្ត្រី ហ៊ុន ម៉ាណែត ក្នុងសារដើម្បីអបអរសាទរទិវាពលកម្មអន្តរជាតិ ១ ឧសភា។
លោកថា ចំនួនសហគ្រាសដែលបានចុះបញ្ជីនៅក្រសួងការងារនិងបណ្តុះបណ្តាលវិជ្ជាជីវៈ បានកើនឡើងពី ៤០ ៩៧៥ ដល់ ៤៣ ៨៤៩សហគ្រាស គឺកើនឡើងចំនួន ២ ៨៧៤សហគ្រាស។ ក្នុងនោះ កម្មករនិយោជិតបានកើនពី ១ ៧១៥ ០២៩នាក់ ដល់ចំនួន ១ ៧៩៣ ៤៦៧នាក់ ឬមានកំណើន ៧៨ ៤៣៨ នាក់។
គិតត្រឹមដំណាច់ខែមីនា ឆ្នាំ២០២៤ ក្រសួងការងារនិងបណ្តុះបណ្តាលវិជ្ជាជីវៈបានចុះបញ្ជីកាអង្គការវិជ្ជាជីវៈសរុបចំនួន ៦ ៣១៧ រួមានសហភាពសហជីពចំនួន ៤២ សហព័ន្ធសហជីពចំនួន ២៨០ សហជីពមូលដ្ឋានចំនួន ៥ ៩៨៣ និងសមាគមនិយោជកចំនួន ១២។
កាលពីថ្ងៃទី២៨ ខែមេសា លោកបានចូលរួមក្នុងការប្រារព្ធទិវាពលកម្មអន្តរជាតិ ដោយបានលើកឡើងថា ទោះបីជាមានរៀងចក្រខ្លះបានបិទទ្វារក៏ដោយ ក៏មានរោងចក្រផ្សេងឬរោងចក្របើកថ្មីដែលមានតម្រូវការកម្មករកម្មការិនីចូលធ្វើការ ដែលនេះខុសពីការលើកឡើងរបស់អ្នករិះគន់មួយចំនួនដែលយល់ថា កម្មករជាច្រើនអត់មានការងារធ្វើ។
លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈបានលើកឡើងក្នុងឱកាសនោះថា ក្នុងត្រីមាសទី១ឆ្នាំ២០២៤នេះ ក្រសួងបានដោះស្រាយវិវាទការងារបានប្រមាណ ៨៤ភាគរយ ធៀបនឹងឆ្នាំរយៈពេលដូចគ្នាក្នុងឆ្នាំ២០២៣ ដែលមានតែ ៧៦ភាគរយ។
លោកថា ក្រសួងបានបន្តគាំទ្រដល់ដំណើរការរបស់ក្រុមប្រឹក្សាអាជ្ញាកណ្ដាលដូចជាផ្ដល់ថវិកាគាំទ្រ និងការិយាល័យធ្វើការរបស់ក្រុមប្រឹក្សាអាជ្ញាកណ្ដាល និងមូលនិធិក្រុមប្រឹក្សាអាជ្ញាកណ្ដាល។
លោកថា ក្រសួងក៏កំពុងពិភាក្សាជាមួយដៃគូពាក់ព័ន្ធដើម្បីធ្វើស្ថាបនីយកម្មនៃក្រុមប្រឹក្សាអាជ្ញាកណ្ដាល ដែលជាយន្តការត្រីភាគីឲ្យកាន់តែរឹងមាំ និងមាននិរន្តរភាពស្របទៅនឹងការវិវត្តនៃតម្រូវការនៃវិស័យការងារនៅក្នុងប្រទេស។
លោក ហ៊ុន ម៉ាណែត បានថ្លែងក្នុងសារអបអរទិវាពលកម្មពិភពលោកថា ការផ្សះផ្សាវិវាទការងារនៅកម្ពុជាត្រូវបានដោះស្រាយនិងប្រព្រឹត្តទៅកាន់តែមានប្រសិទ្ធភាព និងមានភាពល្អប្រសើរជាងមុន ដោយសារភាពចាស់ទុំនៃតួអង្គពាក់ព័ន្ធ និងការពង្រឹងយន្តការផ្សះផ្សាវិវាទការងារ។
លោកថ្លែងថា៖ «រាជរដ្ឋាភិបាលនឹងបន្តគាំទ្រដល់ដំណើរការរបស់ក្រុមប្រឹក្សាអាជ្ញាកណ្តាលដែលជាយន្តការត្រីភាគី និងទទួលបានការគាំទ្រយ៉ាងទូលំទូលាយពី ភាគីពាក់ព័ន្ធកន្លងមក ដើម្បីឲ្យក្រុមប្រឹក្សាអាជ្ញាកណ្តាលក្លាយទៅជាស្ថាប័នមួយរឹងមាំ និងមានប្រភពមូលនិធិមួយពិតប្រាកដ តម្លាភាព និងអាចដំណើរការសកម្មភាពផ្សះផ្សា និងដោះស្រាយវិវាទការងារប្រកបដោយក្រម សីលធម៌វិជ្ជាជីវៈកាន់តែខ្ពស់នៅកម្ពុជា»។
ភ្នំពេញប៉ុស្តិ៍មិនទាន់អាចទាក់ទងសុំការបញ្ជាក់ពីក្រុមប្រឹក្សាអាជ្ញាកណ្ដាលបានទេនៅថ្ងៃទី៣០ខែមេសានេះ ពាក់ព័ន្ធនឹងសមិទ្ធិផលដែលក្រុមប្រឹក្សាបានដោះស្រាយ និងបញ្ហាប្រឈមដែលក្រុមប្រឹក្សាកំពុងជួបប្រទះ។
គេហទំព័ររបស់ក្រុមប្រឹក្សាបានបង្ហាញពីកាលបរិច្ឆេទដ៏មមាញឹករបស់ក្រុមប្រឹក្សាក្នុងការដោះស្រាយវិវាទការងារនានានៅតាមរោងចក្រសហគ្រាស។
ក្រៅពីនេះក៏មានការបណ្ដុះបណ្ដាលជាញឹកញាប់ផងដែរទាំងនៅរាជធានីភ្នំពេញនិងនៅតាមខេត្តនានាសម្រាប់ភាគីកម្មករនិយោជិត និងនិយោជក ដោយផ្ដោតទៅលើកិច្ចសហការរវាងភាគីទាំងពីរ និងការអនុវត្តនីតិវិធីដោះស្រាយបណ្ដឹងទាមទារនៅកន្លែងធ្វើការ។
លោក អាត់ ធន់ ប្រធានសហភាពការងារកម្ពុជា បានថ្លែងថា ក្រុមប្រឹក្សាអាជ្ញាកណ្ដាលកន្លងមកបានកាត់សេចក្ដីវិវាទការងារទាំងឡាយដែលមិនអាចដោះស្រាយបាននៅកម្រិតក្រសួងការងារ។
លោកថា៖ «ក្រុមប្រឹក្សានេះកន្លងមកមានសារៈសំខាន់ណាស់ដោយបានទាញហេតុផលផ្លូវច្បាប់ និងមានភស្តុតាងច្រើនដែលអាចទុកចិត្តបាន»។
ប៉ុន្តែលោកថា ក្រុមប្រឹក្សានេះហាក់មានភាពលម្អៀងខ្លះដែរ បើទោះបីជាលោកមើលឃើញជារួមថា ក្រុមប្រឹក្សានេះមានសារៈសំខាន់ក្នុងការដោះស្រាយវិវាទដែលទទួលស្គាល់ដោយអង្គការពលកម្មអន្តរជាតិ ILO និងអ្នកបញ្ជាទិញ។
លោកបន្តថា កន្លងមកថ្មីៗនេះរាជរដ្ឋាភិបាលបានបង្កើតច្បាប់មួយដែលតម្រូវឲ្យក្រុមប្រឹក្សានេះអាចកាត់សេចក្ដីលើរឿងបុគ្គលទៀត ដែលធ្វើក្រុមប្រឹក្សានេះមានការងារកាន់តែច្រើន។ យ៉ាងណាក៏ដោយ លោកចង់ឃើញក្រុមប្រឹក្សានេះបន្តមានឯករាជ្យភាពរបស់ខ្លួនដើម្បីធ្វើការងារដ៏សំខាន់សម្រាប់វិស័យនេះ។
ការលើកកម្ពស់លក្ខខណ្ឌការងារនៅតាមរោងចក្រសហគ្រាសក៏ជារួមចំណែកដល់ការកាត់បន្ថយវិវាទការងារផងដែរ។ រដ្ឋាភិបាលតាមរយៈក្រសួងការងារបានបង្កើតកម្មវិធីប្រកួតប្រជែងពានប្រចាំឆ្នាំ ឈ្មោះថា « សហគ្រាសមួយជាសហគមន៍សុខសាន្តមួយ» ដែលមានលក្ខខណ្ឌដែលត្រូវបំពេញជាច្រើនចំណុច។ ពានរង្វាន់នេះនឹងត្រូវប្រកាសនៅរៀងរាល់ថ្ងៃប្រារព្ធទិវាពលកម្មអន្តរជាតិ ១ ឧសភា។
លោក ហ៊ុន ម៉ណែត ថ្លែងនៅក្នុងសាររបស់លោកថា៖ «រាជរដ្ឋាភិបាលមានជំនឿយ៉ាងមុតមាំថា ការកំណត់យកប្រធានបទ ក៏ដូចជាការបង្កើតកម្មវិធីប្រកួតប្រជែងយកពាន«សហគ្រាសមួយជាសហគមន៍សុខសាន្តមួយ» នឹងជំរុញឲ្យមានចីរភាពនៃវប្បធម៌អនុលោមភាព វប្បធម៌នៃកិច្ចសន្ទនាសង្គម ការយោគយល់អធ្យាស្រ័យគ្នានៅកន្លែងការងារ និងយន្តការដោះស្រាយវិវាទការងារ នៅកម្រិតសហគ្រាស គ្រឹះស្ថាន នៅកម្រិតក្រសួង និងនៅកម្រិតក្រុមប្រឹក្សាអាជ្ញាកណ្តាល»។
ក្រៅពីការប្ដេជ្ញាធ្វើឲ្យប្រសើរឡើងដល់លក្ខខណ្ឌការងារ លោក ហ៊ុន ម៉ាណែត ក៏បានបញ្ជាក់ដែរថា រដ្ឋាភិបាលនិងក្រសួងការងារកំពុងផ្លាស់ប្តូរជាបណ្តើរៗនូវមធ្យោបាយដឹកជញ្ជូនកម្មករនិយោជិត ដែលស្របតាមបទដ្ឋានបច្ចេកទេស និងមានផាសុកភាពជាងមុនត្រឹមឆ្នាំ២០២៧។
បើតាមលោក ហេង សួរ កម្ពុជាគឺប្រទេសមួយមានប្រាក់ចំណូលអប្បបរមាក្នុងវ័សយកាត់ដេរខ្ពស់ជាងប្រទេសមួយចំនួន ដូចជា ស្រីលង្កា បង់ក្លាដែស មីយ៉ាន់ម៉ា ឡាវ ប៉ាគីស្ថាន ឥណ្ឌា និងផ្នែកភាគច្រើននៃប្រទេសវៀតណាម។
ប្រាក់ខែគោលសម្រាប់កម្មករកម្មការិនី មានចំនួន ២០៤ ដុល្លារអាមេរិកក្នុងមួយខែក្នុងឆ្នាំ២០២៤នះ ប៉ុន្តែបើបូករួមទាំងប្រាក់រង្វាន់អតីតភាពការងារ និងប្រាក់អត្ថប្រយោជន៍ផ្សេងៗ កម្មករនិយោជិតម្នាក់ៗទទួលបានប្រាក់ឈ្នួលជាមធ្យមចាប់ពី ២២១ ទៅ ២៣២ដុល្លារអាមេរិកក្នុងមួយខែ៕