ក្រសួងការពារជាតិបញ្ជាក់ថា ឧបទ្ទវហេតុផ្ទុះគ្រាប់នៅទីបញ្ជាការយោធភូមិភាគទី៣ កាលពីពេលថ្មីៗនេះបង្កឡើងដោយបញ្ហាបច្ចេកទេសនិងអាកាសធាតុក្ដៅ មិនពាក់ព័ន្ធនិងការបះបោរ ឬអំពើភេរវកម្មដូចការលើកឡើងមួយចំនួននោះទេ។
ឧបទ្ទវហេតុផ្ទុះគ្រាប់កាលពីថ្ងៃទី២៧ ខែមេសា ដែលបានសម្លាប់យោធា ២០នាក់ និងរបួសជាច្រើនអ្នកទៀតនោះ ត្រូវបានមជ្ឈដ្ឋានអ្នកមាននិន្នាការប្រឆាំងមួយចំនួននៅក្រៅប្រទេសលើកឡើងផ្សេងៗ រួមមានទាំងលោក សម រង្ស៊ី អតីតមេដឹកនាំបក្សប្រឆាំង និងអ្នកមាននិន្នាការប្រឆាំងមួយចំនួនទៀត។
លោក សម រង្ស៊ី ចោទប្រកាន់នៅលើហ្វេសប៊ុកកាលពីថ្ងៃទី២៨ មេសា ឧបទ្ទហេតុនេះ«ចលនាប្រដាប់អាវុធប្រឆាំងត្រកូល ហ៊ុន» ដែលធ្វើឡើងពីចលនាផ្ទៃក្នុងគណបក្សប្រជាជនកម្ពុជា និងកម្លាំងប្រដាប់អាវុធ។ ការចោទប្រកាន់បែបនេះត្រូវបានក្រសួងការពារជាតិច្រានចោលទាំងស្រុង។
ក្រសួងការពារជាតិបានចេញសេចក្ដីប្រកាសនៅថ្ងៃនេះថា នាពេលថ្មីៗកន្លងមកនេះ មានក្រុមប្រឆាំងជ្រុលនិយមមួយចំនួនបានធ្វើការផ្សព្វផ្សាយព័ត៌មានបំផ្លើសការពិតតាមបណ្តាញសង្គមនានាធ្វើឱ្យសាធារណជនទាំងក្នុង និងក្រៅប្រទេសមានការភ័ន្តច្រឡំអំពីឧបទ្ទវហេតុផ្ទុះគ្រាប់នេះ។
ក្រសួងបញ្ជាក់ថា៖ «តាមរយៈការចុះស្រាវជ្រាវផ្ទាល់នៅទីតាំងកើតហេតុរបស់ក្រុមការងារចម្រុះ ក្រសួង ការពារជាតិសូមបញ្ជាក់ជូនថា ករណីឧបទ្ទវហេតុផ្ទុះគ្រាប់កាលពីថ្ងៃទី២៧ ខែមេសា ឆ្នាំ២០២៤ នៅទីបញ្ជាការយោធភូមិភាគទី៣ ក្នុងខេត្តកំពង់ស្ពឺ គឺជាបញ្ហាបច្ចេកទេសដោយសារប្រភេទអាវុធជាតិផ្ទុះចាស់ៗ ខូចគុណភាព រួមជាមួយ អាកាសធាតុឡើងកម្ដៅ មិនមែនជាបញ្ហាកងទ័ពបះបោរ អំពើភេរវកម្ម ឬចេតនារបស់បុគ្គលណាមួយដូចបានបំផ្លើសឡើយ»។
ក្រសួងការពារជាតិក៏បានស្នើដល់សាធារណជន និងអ្នកសារព័ត៌មានឲ្យបញ្ឈប់ការផ្សាយព័ត៌មានមិនពិត ដោយធ្វើការសន្និដ្ឋាន ឬយល់ឃើញណាមួយដោយបុគ្គលផ្ទាល់ខ្លួន មិនមានមូលដ្ឋានច្បាស់លាស់ ឬ មានចេតនាបង្កចលាចលញុះញង់ បង្កផលប៉ះពាល់ដល់សន្តិសុខ សណ្តាប់ធ្នាប់ សេដ្ឋកិច្ចសង្គម ដែលឈានទៅដល់ ការទទួលខុសត្រូវចំពោះមុខច្បាប់៕