ភ្នំពេញ៖ ការជួញដូរ និងប្រើប្រាស់គ្រឿងញៀន ១០០ករណី ត្រូវបានបង្រ្កាប និងមនុស្សជិត ៣០០នាក់ត្រូវបានឃាត់ខ្លួនកាលពីសប្ដាហ៍មុន ខណៈពេលដែលមន្ត្រីរាជការ និងកងកម្លាំងប្រដាប់អាវុធចំនួន ៧៦នាក់ ក្នុងចំណោមជាង ៥ម៉ឺននាក់ត្រូវបានបណ្តេញចេញពីក្របខណ្ឌក្រោយពីរកឃើញសារធាតុញៀន។
អ្នកនាំពាក្យរងក្រសួងមហាផ្ទៃ លោក ទូច សុខៈបានឱ្យដឹងថា ប្រតិបត្តិការបង្ក្រាបករណីជួញដូរ និងប្រើប្រាស់គ្រឿងញៀន ត្រូវបានកម្លាំងនគរបាលជាតិទូទាំងប្រទេសបាននឹងកំពុងតែអនុវត្តយ៉ាងសកម្ម។ ជាក់ស្ដែងចាប់ពីថ្ងៃទី២២ ដល់ថ្ងៃទី២៨ ខែមេសា ឆ្នាំ២០២៤នេះ កម្លាំងនគរបាលជាតិ ចាប់ពីអគ្គស្នងការដ្ឋានរហូត ដល់ប៉ុស្តិ៍នគរបាលរដ្ឋបាលឃុំ សង្កាត់ បានបង្ក្រាបករណីគ្រឿងញៀនសរុបចំនួន ១០០ករណី។ ក្នុងនោះបានធ្វើការឃាត់ខ្លួនជនសង្ស័យសរុបបានចំនួន ២៩៨នាក់នៅទូទាំងប្រទេស។
ក្នុងចំណោមករណីទាំងនោះ ករណីបង្ក្រាបនៅរាជធានីភ្នំពេញមាន ២២ករណី ខេត្តព្រះសីហនុមាន ១៥ករណី ខេត្តកំពង់ស្ពឺមាន ៦ករណី ខេត្តសៀមរាបមាន ៦ករណី ខេត្តត្បូងឃ្មុំ មាន ៥ករណី និងខេត្តកំពង់ធំមាន ៥ករណីផងដែរ។ ក្រៅពីនេះ ករណីបង្រ្កាបនៅតាមបណ្តាខេត្តនីមួយផ្សេងៗទៀតមានចំនួនក្រោម ៥ករណី។
លោក ទូច សុខៈ ក៏បានបន្តថា ករណីការជួញដូរ និងប្រើប្រាស់គ្រឿងញៀនក្នុងទ្រង់ទ្រាយធំមាននៅក្នុងរាជធានីភ្នំពេញមាន ២ករណី ដោយឃាត់ខ្លួនមនុស្សសរុប ៨នាក់ រឹបអូស គ្រឿងញៀនជាង ២១៦គីឡូក្រាម ខេត្តសៀមរាបឃាត់ខ្លួនជនសង្ស័យ ១នាក់ រឹបអូសគ្រឿងញៀនជាង ១២០គីឡូក្រាម និងខេត្តបន្ទាយមានជ័យ ឃាត់ខ្លួនមនុស្ស ២នាក់ រឹបអូសគ្រឿងញៀនជាង ៦គីឡូក្រាម។ ក្រៅពីគ្រឿងញៀន សមត្ថកិច្ចក៏រឹបអូសវត្ថុតាងមួយចំនួនទៀត ដូចជា អាវុធ រថយន្ត ម៉ូតូ និងទូរសព្ទជាដើម។
កាលពីសប្តាហ៍មុន មន្ទីរប្រឆាំងបទល្មើសគ្រឿងញៀនក៏បានធ្វើសន្និសីទសារព័ត៌មានបង្ហាញករណីបង្រ្កាបដ៏ធំមួយដែលមានគ្រឿងញៀនជិត ២០០គីឡូក្រាម ហើយបើគិតជាទឹកប្រាក់មានតម្លៃរាប់ស៊ិបលានដុល្លារអាមេរិក។
ប្រភពដដែលក៏បានឱ្យដឹងផងដែរថា ករណីជួញដូរគ្រឿងខុសច្បាប់ធំៗជិត ១០ករណីហើយត្រូវបានបង្រ្កាបនៅក្នុងឆ្នាំ២០២៤នេះ ដែលករណីខ្លះមានរហូតដល់ទៅ ១តោន ឬជាង ១តោនក៏មានដែរ។ ថ្នាំញៀនទាំងនោះត្រូវបាននាំចូលពី តំបន់ត្រីកោណមាស ដើម្បីយកទៅចែកចាយនៅក្រៅប្រទេសដែលមានតម្លៃថ្លៃ។ ក្នុងនោះថ្នាំញៀនប្រភេទ ហ៊ីរ៉ូអ៊ីន មានតម្លៃជាង ១០ម៉ឺនដុល្លារអាមេរិកក្នុង ១គីឡូក្រាម។
មន្ទីរប្រឆាំងបទល្មើសគ្រឿងញៀនបានប្តេជ្ញាចិត្តបោសសម្អាតក្រុមឧក្រិដ្ឋជនគ្រឿងញៀនបន្តទៀត ដើម្បីទប់ស្កាត់ក្នុងការយកប្រទេសកម្ពុជាជាកន្លែងឆ្លងកាត់ ឬ ស្តុកគ្រឿងញៀនសម្រាប់នាំចេញទៅក្រៅប្រទេសនោះទេ។
លោក ទូច សុខៈ ក៏បានលើកឡើងផងដែរថា ការបង្ក្រាបករណីជួញដូរ និងប្រើប្រាស់គ្រឿងញៀន គឺជាកិច្ចការអាទិភាពមួយ ក្នុងចំណោមកញ្ចប់ការងារអាទិភាពទាំង៦ ដែលលោកឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ស សុខា បានប្រកាសបង្កើនការយកចិត្តទុកដាក់អនុវត្តចាប់ពីដើមនីតិកាលទី៧ នៃរដ្ឋសភា។ រាជរដ្ឋាភិបាលក៏បាននិងកំពុងអនុវត្តយ៉ាងសកម្មដូចគ្នាផងដែរនូវយុទ្ធនាការប្រឆាំងគ្រឿងញៀនខុសច្បាប់ទូទាំងប្រទេស រួមទាំងការអនុវត្តលើមន្រ្តីរាជការនិងកម្លាំងទាំងថ្នាក់ជាតិ និងថ្នាក់ក្រោមជាតិ។
ដោយអនុវត្តតាមបទបញ្ជាលេខ ០១បប ចុះថ្ងៃទី២០ ខែកុម្ភៈ ឆ្នាំ ២០២៤ ស្តីពីការដាក់ចេញវិធានការម៉ឺងម៉ាត់ក្នុងការប្រយុទ្ធប្រឆាំងគ្រឿងញៀនខុសច្បាប់ នៅតាមក្រសួង ស្ថាប័ន និង រដ្ឋបាលថ្នាក់ក្រោមជាតិ, មន្ត្រីរាជការស៊ីវិល មន្ត្រីនគរបាលជាតិ យោធិន ព្រមទាំងមន្ត្រីជាប់កិច្ចសន្យាសរុប ៥៦ ៤៤៥នាក់ ត្រូវបានធ្វើតេស្តរកសារធាតុញៀនតាមទឹកមូត្រ។
ក្នុងនោះមន្រ្តីដែលត្រូវបានរកឃើញវិជ្ជមានចំនួន ៧៦ នាក់ត្រូវបានបណ្តេញចេញពីក្របខណ្ឌផងដែរ គិតត្រឹមថ្ងៃទី២៩ ខែមេសា ឆ្នាំ២០២៤នេះ។ នេះបើយោងតាមអាជ្ញាធរជាតិប្រយុទ្ធប្រឆាំងគ្រឿងញៀន។
អាជ្ញាធរជាតិប្រយុទ្ធប្រឆាំងគ្រឿងញៀនក៏បានណែនាំដល់សាមីក្រសួង ស្ថាប័ន ដែលបានបណ្តេញមន្ត្រីដែលមានសារធាតុញៀន ចេញពីក្របខ័ណ្ឌនោះ ត្រូវបញ្ជូនពួកគាត់ទៅទទួលការព្យាបាល និង ស្តារនីតិសម្បទាផងដែរ។
អាជ្ញាធរជាតិប្រយុទ្ធប្រឆាំងគ្រឿងញៀនក៏បាននិងកំពុងខិតខំកៀរគរស្វែងរកជំនួយបន្ថែមពីសប្បុរសជន ជាតិ និងអន្តរជាតិនូវឧបករណ៍ធ្វើតេស្តរហ័សរកសារធាតុញៀនតាមទឹកមូត្រសម្រាប់ប្រើប្រាស់ចំពោះមុខបន្តទៀតផងដែរ៕