.jpg)
ស្នងការដ្ឋាននគរបាលខេត្តកំពត កាលពីពេលថ្មីៗនេះបានចាប់ផ្តើមប្រើប្រាស់រថយន្តចល័ត ដើម្បីចុះធ្វើអត្តសញ្ញាណបណ្ណជូនសិស្សានុសិស្ស។ ស្នងការខេត្តកំពត
ភ្នំពេញ៖ អត្តសញ្ញាណបណ្ណសញ្ជាតិខ្មែរជិត ២ម៉ឺនសន្លឹក ត្រូវបានផ្តល់ជូនប្រជាពលរដ្ឋយកទៅប្រើប្រាស់ដោយឥតគិតថ្លៃនៅទូទាំងប្រទេសនៅក្នុងរយៈពេលប្រមាណជា ១២ថ្ងៃនៃចុងខែមេសាកន្លងមក ខណៈពេលការធ្វើអត្តសញ្ញាណបណ្ណគឺកាន់តែងាយស្រួលតាមរថយន្តចល័ត។
មន្ត្រីទទួលបន្ទុកសេវាអត្តសញ្ញាណកម្មទូទាំងប្រទេសបានផ្តល់អត្តសញ្ញាណបណ្ណសញ្ជាតិខ្មែរសរុបចំនួន ១១ ០៦៧សន្លឹកជូនប្រជាពលរដ្ឋដោយឥតគិតថ្លៃនៅទូទាំងប្រទេសក្នុងរយៈពេល ៧ថ្ងៃ កាលពីសប្ដាហ៍មុន ដោយចាប់ពីថ្ងៃទី២២ ដល់ថ្ងៃទី២៨ ខែមេសា ឆ្នាំ២០២៤ ។ នេះបើតាមអ្នកនាំពាក្យរងក្រសួងមហាផ្ទៃ លោក ទូច សុខៈ។
ដោយឡែក រយៈពេល ៥ថ្ងៃ កាលពីថ្ងៃទី១៧ រហូតដល់ថ្ងៃទី២១ ខែមេសា ឆ្នាំ ២០២៤ ដដែលនេះ បន្ទាប់ពីបញ្ចប់ការឈប់សម្រាកអបអរសាទរឆ្នាំថ្មីប្រពៃណីជាតិកន្លងមករួចភ្លាម មន្ត្រីទទួលបន្ទុកសេវាអត្តសញ្ញាណកម្មទូទាំងប្រទេស បានបន្តបំពេញតួនាទី និងភារកិច្ច ផ្តល់សេវាជូនប្រជាពលរដ្ឋយ៉ាងសកម្មជាប្រក្រតី។ ក្នុងនោះ មានអត្តសញ្ញាណបណ្ណសញ្ជាតិខ្មែរចំនួន៨ ៨៧២សន្លឹក ត្រូវបានបន្តផ្ដល់ជូនប្រជាពលរដ្ឋដោយឥតគិតថ្លៃផងដែរ។
លោក ទូច សុខៈបានបញ្ជាក់ថា៖«អត្តសញ្ញាណបណ្ណសញ្ជាតិខ្មែរ ជាបណ្ណសម្រាប់សម្គាល់អត្តសញ្ញាណសញ្ជាតិខ្មែរលើបុគ្គលម្នាក់ៗមានសញ្ជាតិជាខ្មែរ។ អត្តសញ្ញាណបណ្ណសញ្ជាតិខ្មែរមានសារៈសំខាន់ ឬសារៈប្រយោជន៍ ដើម្បីប្រជាជនយកទៅប្រើប្រាស់បំពេញសំណុំឯកសារផ្សេងៗ តាមផ្លូវច្បាប់»។
ប្រជាពលរដ្ឋខ្មែរទាំងពីរភេទមានអាយុពី ១៥ ឆ្នាំឡើង អាចស្នើសុំធ្វើអត្តសញ្ញាណបណ្ណសញ្ជាតិខ្មែរ នៅអធិការដ្ឋាននគរបាលក្រុង ស្រុក ខណ្ឌ ឬនៅស្ថានីយ៍ចល័ត នៃឃុំ សង្កាត់ របស់ខ្លួន តាមការជូនដំណឹងរបស់អាជ្ញាធរមូលដ្ឋាន។
លោកបានបន្តថា លោកឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ស សុខា បានជំរុញឱ្យអគ្គនាយកដ្ឋានអត្តសញ្ញាណកម្មសិក្សាតាមបណ្តាច្រកចេញចូលតែមួយ ដើម្បីជំរុញការផ្តល់សេវាធ្វើអត្តសញ្ញាណបណ្ណ ជូនប្រជាពលរដ្ឋឱ្យបានឆាប់រហ័ស ជាពិសេស ពិនិត្យលទ្ធភាពបន្ថែមទៀត ដើម្បីឈានទៅពង្រឹងគុណភាពនៃផ្តល់សេវាជូនប្រជាពលរដ្ឋ។
ឆ្លើយតបទៅនឹងការណែនាំរបស់ថ្នាក់ដឹកនាំ ដើម្បីបំរើសេវាជូនពលរដ្ឋឱ្យទាន់ពេលវេលានោះ ស្នងការដ្ឋាននគរបាលខេត្តកំពត កាលពីពេលថ្មីៗនេះបានចាប់ផ្តើមប្រើប្រាស់រថយន្តចល័ត ដើម្បីចុះធ្វើអត្តសញ្ញាណបណ្ណជូនសិស្សានុសិស្ស និងបងប្អូនប្រជាពលរដ្ឋនៅតាមវិទ្យាល័យមួយចំនួន។
ស្នងការដ្ឋាននគរបាលខេត្តកំពត កាលពីពេលថ្មីៗនេះបានចាប់ផ្តើមប្រើប្រាស់រថយន្តចល័ត ដើម្បីចុះធ្វើអត្តសញ្ញាណបណ្ណជូនសិស្សានុសិស្ស។ ស្នងការខេត្តកំពត
លោក ម៉ៅ ច័ន្ទមធុរិទ្ធ ស្នងការនគរបាលខេត្តកំពតបានឱ្យដឹងថា កម្លាំងនគរបាលជាង ១០រូប បាននឹងកំពុងតែផ្លាស់ប្តូរវេនគ្នា ដើម្បីចុះធ្វើអត្តសញ្ញាណបណ្ណជូនពលរដ្ឋតាមរថយន្តចល័តនេះដោយឥតគិតថ្លៃ។
លោកថា យុវជន ដែលមានអាយុចាប់ពី ១៥ឆ្នាំឡើង ត្រូវធ្វើអត្តសញ្ញាណបណ្ណនោះមានរហូតដល់ទៅ ១២ ៧៧១នាក់។ ហេតុនេះ បើរងចាំឱ្យគាត់ទៅធ្វើនៅប៉ុស្តិ៍រដ្ឋបាល ឬអធិការដ្ឋាននគរបាលនោះ វានឹងប៉ះពាល់ដល់ការសិក្សាពួកគាត់។
លោកស្នងការនគរបាលខេត្តបានមានប្រសាសន៍ថា៖ «យើងចុះទៅធ្វើនៅតាមវិទ្យាល័យនៅក្នុងទូទាំងខេត្តកំពតយើងនេះ។ បងប្អូនពលរដ្ឋក៏អាចទៅធ្វើនៅវិទ្យាល័យបានដែរជាមួយនឹងសិស្ស។ ពេលធ្វើការងារតាមវិទ្យាល័យចប់អស់ នឹងចុះទៅតាមឃុំណាដែលពលរដ្ឋត្រូវការធ្វើបន្តទៀត»។
លោកបានបន្ថែមថា នាពេលបច្ចុប្បនេះ ការធ្វើអត្តសញ្ញាណបណ្ណតាមរថយន្តចល័តនេះមានចន្លោះពី ៧០ ជាង១០០ក្នុងមួយថ្ងៃៗ៕
