ភ្នំពេញ៖ លោក ស សុខា រដ្ឋមន្រ្តីក្រសួងមហាផ្ទៃ នឹងដឹកនាំគណៈប្រតិភូក្រសួងមហាផ្ទៃបំពេញទស្សនកិច្ចសិក្សានៅប្រទេស អូស្រ្តាលី នាខែមិថុនា ដោយគណៈប្រតិភូកម្ពុជាសង្ឃឹមថានឹងទទួលបានបទពិសោធន៍ និងចំណេះដឹងថ្មីៗលើការគ្រប់គ្រងកងកម្លាំងនគរបាលជាតិ និងការប្រយុទ្ធប្រឆាំងបទល្មើសបច្ចេកវិទ្យា។
ទស្សនកិច្ចនេះមានគោលបំណងជួយភាគីកម្ពុជាដកស្រង់បទពិសោធន៍យុទ្ធសាស្រ្តពាក់ព័ន្ធការងារអន្តោប្រវេសន៍ សន្តិសុខសាយប័រ (cyber security) និងការងារវិមជ្ឈការ និងវិសហមជ្ឈការ។
ក្រសួងមហាផ្ទៃកម្ពុជាបញ្ជាក់ក្នុងសេចក្តីប្រកាសព័ត៌មាននាថ្ងៃទី២ ខែឧសភា ថា៖ «គណៈប្រតិភូកម្ពុជាមានក្ដីសង្ឃឹមថា នឹងទទួលបានបទពិសោធន៍ និងចំណេះដឹងថ្មីៗពីអូស្រ្តាលី ទាំងលើការងារគ្រប់គ្រងកងកម្លាំងនគរបាលជាតិ ការជំរុញទំនាក់ទំនងបណ្តុះបណ្តាលមន្រ្តីនគរបាលលើការងារប្រយុទ្ធប្រឆាំងបទល្មើសបច្ចេកវិទ្យាផងដែរ»។
កាលពីថ្ងៃទី២ ខែឧសភា លោក ស សុខា ដែលជាឧបនាយករដ្ឋមន្ត្រី បានជួបជាមួយលោក Pablo Kang ភារធារីស្ថានទូតអូស្រ្តាលីប្រចាំកម្ពុជា នៅទីស្ដីការក្រសួងមហាផ្ទៃ។
លោក ស សុខា បានចាត់ទុកវត្តមានលោក Pablo Kang ក្នុងជំនួបនេះ ថាជាការបង្ហាញឱ្យឃើញអំពីកិច្ចខិតខំប្រឹងប្រែងជំរុញការបន្តបង្កើនកិច្ចសហប្រតិបត្តិការរវាងរដ្ឋាភិបាលអូស្រ្តាលី និងក្រសួងមហាផ្ទៃកម្ពុជា ទាំងនាពេលបច្ចុប្បន្ន និងទៅអនាគត។
សេចក្តីប្រកាសព័ត៌មានដដែលបញ្ជាក់ថា៖ «ឯកឧត្តមអភិសនិ្តបណ្ឌិត ស សុខា បានថ្លែងអំណរគុណ [ចំពោះ] ក្រសួងមហាផ្ទៃអូស្រ្តាលី ដែលបានអញ្ជើញឯកឧត្តម ដឹកនាំគណៈប្រតិភូក្រសួងមហាផ្ទៃ [បំពេញ] ទស្សនកិច្ចសិក្សា នៅប្រទេសអូស្រ្តាលី នាខែមិថុនា ឆ្នាំ២០២៤ ខាងមុខនេះ»។
សេចក្តីប្រកាសព័ត៌មានដដែលបានឱ្យដឹងថា ក្នុងជំនួបនេះ ភាគីទាំង២ បានពិភាក្សាគ្នាអំពីការងារអន្តោប្រវេសន៍ ការប្រយុទ្ធប្រឆាំងឧក្រិដ្ឋកម្មឆ្លងដែន រួមមានការជួញដូរ និងរត់ពន្ធមនុស្ស និងគ្រឿងញៀន បទល្មើសបច្ចេកវិទ្យា កម្មវិធីកំណែទម្រង់រដ្ឋបាលសាធារណៈ កំណែទម្រង់វិមជ្ឈការ និងវិសហមជ្ឈការ និងគណនេយ្យភាពសង្គមនៅកម្ពុជា ព្រមទាំងប្តេជ្ញាពង្រឹងការងារឱ្យកាន់តែល្អប្រសើរថែមទៀត។
លោក ស សុខា បានបង្ហាញក្ដីសង្ឃឹមថា ភាគីអូស្រ្តាលីនឹងបន្តផ្តល់ជំនួយនានា រួមមានជំនួយបច្ចេកទេស សម្ភារៈ និងការបណ្តុះបណ្តាលផ្សេងៗដល់ក្រសួងមហាផ្ទៃ និងសង្ឃឹមថា ដំណើរទស្សនកិច្ចនេះនឹងទទួលបានលទ្ធផលផ្លែផ្កា និងផ្តល់អត្ថប្រយោជន៍ ដូចជា ចំណេះដឹង និងបទពិសោធន៍ល្អៗ លើការអនុវត្តការងារ។
កាលពីខែមេសា លោក ស សុខា បានដឹកនាំគណៈប្រតិភូជាន់ខ្ពស់កម្ពុជាទៅបំពេញទស្សនកិច្ចរយៈពេលជាង ១សប្ដាហ៍នៅប្រទេសស្វីស និង អាល្លឺម៉ង់។
សេចក្តីប្រកាសព័ត៌មានដដែលបញ្ជាក់ថា លោកបានដកស្រង់បទពិសោធន៍បន្ថែមលើប្រព័ន្ធគ្រប់គ្រង និងការអនុវត្តល្អៗពីប្រទេសទាំង ២ នេះដើម្បីជំរុញដំណើរការកំណែទម្រង់វិមជ្ឈការនិងវិសហមជ្ឈការ និងលើកកម្ពស់អភិបាលកិច្ចមូលដ្ឋាន។
កាលពីខែមីនា លោកនាយករដ្ឋមន្រ្តី ហ៊ុន ម៉ាណែត បានធ្វើដំណើរទៅចូលរួមកិច្ចប្រជុំកំពូលពិសេសអាស៊ាន-អូស្រ្តាលី នៅប្រទេស អូស្រ្តាលី រយៈពេល ៥ថ្ងៃ ដែលការបំពេញទស្សនកិច្ចនេះបានឈានដល់ការចុះហត្ថលេខាឱ្យមានជើងហោះហើរត្រង់ពីប្រទេសអូស្រ្តាលី មកកម្ពុជា។
លោក ថុង ម៉េងដាវិត អ្នកជំនាញផ្នែកទំនាក់ទំនងអន្តរជាតិ និងជាសាស្ត្រាចារ្យបង្រៀននៅវិទ្យាស្ថានសិក្សាអន្តរជាតិ និងគោលនយោបាយសាធារណៈនៃសាកលវិទ្យាល័យភូមិន្ទភ្នំពេញថ្លែងថា ការអញ្ជើញលោក ស សុខា ទៅបំពេញទស្សនកិច្ចសិក្សានេះបង្ហាញពីទំនាក់ទំនងកាន់តែរីកចម្រើន និងរឹងមាំរវាងកម្ពុជា និងអូស្ត្រាលី។
លោកប្រាប់ភ្នំពេញប៉ុស្តិ៍នាថ្ងៃទី៣ ខែឧសភា ថា ក្នុងនាមជាសមាជិកនៃសម្ព័ន្ធស៊ើបការណ៍សម្ងាត់ដែលមាន ៥ប្រទេស អូស្ត្រាលីប្រមូលផ្តុំនូវជំនាញទំនើបៗជាច្រើនពាក់ព័ន្ធនឹងប្រព័ន្ធស៊ើបការណ៍សម្ងាត់ ធនធានមនុស្ស និងសម្ភារៈបច្ចេកវិទ្យា ដើម្បីទប់ស្កាត់ការគំរាមកំហែងតាមប្រព័ន្ធអ៊ីនធឺណិត និងប្រឆាំងការស៊ើបការណ៍សម្ងាត់។
លោក ថុង ម៉េងដាវិត លើកឡើងថា សន្តិសុខតាមអ៊ីនធឺណិតគឺជាការគំរាមកំហែងយ៉ាងធ្ងន់ធ្ងរចំពោះសន្តិសុខរបស់ប្រទេស ដោយសារភាពវៃឆ្លាត និងមានភាពសម្ងាត់។ អូស្ត្រាលីតែងតែជាដៃគូដ៏សំខាន់សម្រាប់នគរបាលជាតិកម្ពុជា ពីព្រោះអ្នកជំនាញ និង មន្ត្រីអូស្ត្រាលីអាចចែករំលែកជំនាញ និង បទពិសោធន៍របស់ខ្លួន ដែលអនុញ្ញាតឱ្យអាជ្ញាធរមូលដ្ឋានធ្វើការវិភាគតាមបែប SWOT (ចំណុចខ្លាំង ចំណុចខ្សោយ ឱកាស និងការគំរាមកំហែង) ស្តីពីបញ្ហាសន្តិសុខតាមអ៊ីនធឺណិត។
លោកបន្ថែមថា៖ «ប្រព័ន្ធឌីជីថលមានសារៈសំខាន់ណាស់សម្រាប់គាំទ្រដល់កំណើនជាតិ និងសន្តិសុខរបស់ប្រទេស។ ទោះជាយ៉ាងណាក៏ដោយ យើងគួរតែកត់សម្គាល់ថា ចរិតលក្ខណៈនៃសន្តិសុខសកលបានផ្លាស់ប្តូរឆ្ពោះទៅរកនិន្នាការកាន់តែគ្រោះថ្នាក់ ស្មុគ្រស្មាញ និងគ្រោះថ្នាក់ដល់ជីវិតតាមរយៈប្រព័ន្ធទំនាក់ទំនងព័ត៌មានបច្ចេកវិទ្យា (ICT) បញ្ញាសិប្បនិម្មិត (AI) សន្តិសុខតាមអ៊ីនធឺណិត និង សង្គ្រាមប្រើប្រាស់យន្តហោះគ្មានមនុស្សបើក (drone)»៕