ភ្នំពេញ៖ លោក ហ៊ុន សែន ប្រធានព្រឹទ្ធសភា បានថ្លែងថា កម្ពុជានៅតែប្តេជ្ញាចិត្តក្នុងការគាំទ្រកិច្ចខិតខំប្រឹងប្រែងក្នុងការស្ដារសន្តិភាពនៅប្រទេសអ៊ុយក្រែន ដោយលោកបញ្ជាក់ថា កម្ពុជាផ្តល់សារៈសំខាន់ «យ៉ាងខ្លាំង» ចំពោះសន្តិភាព។
លោកលើកឡើងដូច្នេះក្នុងលិខិតថ្លែងអំណរគុណទៅកាន់លោក Ruslan Stefanchuk ប្រធានសភាអ៊ុយក្រែន ដែលបានអបអរសាទរលោកដែលត្រូវបានបោះឆ្នោតជ្រើសរើសជាប្រធានព្រឹទ្ធសភានៃប្រទេសកម្ពុជា កាលពីដើមខែមេសា។
លោក ហ៊ុន សែន បញ្ជាក់ក្នុងលិខិតនេះដែលបានផ្សព្វផ្សាយនាថ្ងៃទី៣ ខែឧសភា ថា៖ «ក្នុងនាមជាប្រទេសឆ្លងផុតពីជម្លោះ កម្ពុជាផ្តល់សារៈសំខាន់យ៉ាងខ្លាំងចំពោះសន្តិភាព ស្ថិរភាព និងការជំរុញការសន្ទនាដើម្បីដោះស្រាយជម្លោះ និងការខ្វែងគំនិត»។
លោកបញ្ជាក់បន្ថែមថា កម្ពុជាគោរពច្បាប់អន្តរជាតិ រួមទាំងគោលការណ៍នានាដែលមានចែងក្នុងធម្មនុញ្ញអង្គការសហប្រជាជាតិ និង រក្សាសណ្ដាប់ធ្នាប់អន្តរជាតិ ដោយផ្អែកលើច្បាប់តាមរយៈការពង្រឹងកិច្ចសហប្រតិបត្តិការទ្វេភាគី និង ពហុភាគី។
លោក ហ៊ុន សែន បន្តថា៖ «កម្ពុជានៅតែប្តេជ្ញាចិត្តគាំទ្រកិច្ចប្រឹងប្រែងនានាក្នុងគោលដៅស្ដារសន្តិភាពនៅអ៊ុយក្រែន»។
លោក ហ៊ុន សែន អតីតនាយករដ្ឋមន្ត្រី ក៏បានបញ្ជាក់អំពីការទន្ទឹងរង់ចាំធ្វើការជាមួយ លោក Ruslan Stefanchuk ដើម្បីបង្កើនកិច្ចសហប្រតិបត្តិការរវាងស្ថាប័ននីតិប្បញ្ញត្តិនៃប្រទេសទាំង ២ ដើម្បីផលប្រយោជន៍ទៅវិញទៅមករបស់ប្រទេសទាំង២។
លោក យង់ ពៅ អគ្គលេខាធិការនៃរាជបណ្ឌិត្យសភាកម្ពុជា ថ្លែងថា លិខិតរបស់លោក ហ៊ុន សែន បង្ហាញអំពីតួនាទីរបស់កម្ពុជានៅក្នុងការចូលរួមដំណោះស្រាយរបស់ពិភពលោក។ ពីមុនកម្ពុជាជាប្រទេសរងគ្រោះមួយដែលពិភពលោក ឬអង្គការអន្តរជាតិ ជាពិសេស អង្គការសហប្រជាជាតិជួយជ្រោមជ្រែងលើការស្វែងរកដំណោះស្រាយសម្រាប់កម្ពុជា រីឯពេលនេះ កម្ពុជាបានចូលរួមយ៉ាងសកម្មនៅក្នុងដំណោះស្រាយពិភពលោក និង នៅក្នុងការថែរក្សាសណ្តាប់ធ្នាប់ពិភពលោក។
លោកថ្លែងថា លិខិតនេះក៏បានបង្ហាញថា កម្ពុជាគោរពនូវច្បាប់អន្តរជាតិ និង តួនាទីជាពហុភាគីរបស់កម្ពុជា និងបង្ហាញថា កម្ពុជាមានគោលនយោបាយការទូតរបស់ខ្លួនច្បាស់លាស់ ដោយមិនទោរទន់ទៅតាមអតីតកាល ឬមនោគមវិជ្ជាអ្វីមួយនោះទេ។ កម្ពុជាផ្អែកលើច្បាប់អន្តរជាតិ និងផ្អែកលើច្បាប់ជាតិដែលចង្អុលបង្ហាញនូវគោលនយោបាយច្បាស់លាស់របស់ខ្លួននៅក្នុងកិច្ចការអន្តរជាតិ។
លោក យង់ ពៅ ប្រាប់ភ្នំពេញប៉ុស្តិ៍ថា៖ «កម្ពុជាចង់បានឱ្យពិភពលោកមានសន្តិភាពឱ្យបានកាន់តែច្រើន កាន់តែមានស្ថិរភាព ពីព្រោះនេះជាអ្វីមួយដែលកម្ពុជាធ្លាប់ជួបប្រទះក្នុងសម័យសង្រ្គាមត្រជាក់ ដែលទើបតែបិទបញ្ចប់ទាំងស្រុងនៅចុងឆ្នាំ ១៩៩៨»។
ក្នុងលិខិតអបអរសាទរលោក ហ៊ុន សែន កាលពីខែមេសា លោក Ruslan Stefanchuk បានបង្ហាញទំនុកចិត្តថា ក្នុងអំឡុងពេលកាន់តំណែងរបស់លោក ហ៊ុន សែន ទំនាក់ទំនងអន្តរសភាអ៊ុយក្រែន-កម្ពុជា នឹងបន្តអភិវឌ្ឍទាំងក្នុងកម្រិតទ្វេភាគី និងក្នុងក្របខ័ណ្ឌនៃអន្តរសភាអាស៊ាន សហភាពអន្តរសភា និងវេទិកាអន្តរជាតិផ្សេងៗទៀត។
លោកថ្លែងថា៖ «យើងខ្ញុំចងចាំដោយអំណរគុណចំពោះគោលជំហរដោយផ្អែកលើគោលការណ៍របស់ សម្តេច ស្តីពីការថ្កោលទោសចំពោះការឈ្លានពានរបស់ប្រទេស រុស្ស៊ី ប្រឆាំងនឹងប្រទេសអ៊ុយក្រែន ហើយយើងពឹងលើការគាំទ្របន្ថែមទៀតនូវកិច្ចខិតខំប្រឹងប្រែងរបស់អន្តរជាតិ ដើម្បីស្ដារឡើងវិញនូវសន្តិភាព ប្រកបដោយយុត្តិធម៌នៅប្រទេសអ៊ុយក្រែន និងធានាស្ថិរភាពនៅលើពិភពលោក»។
ក្នុងលិខិតនេះ លោក Ruslan Stefanchuk បានអញ្ជើញលោក ហ៊ុន សែន ទៅបំពេញទស្សនកិច្ចផ្លូវការនៅប្រទេសអ៊ុយក្រែនផងដែរ៕