.jpg)
ព្រឹទ្ធាចារ្យកីឡា លោក ចាន់ ប៊ុនធឿន បានធ្លាក់ខ្លួនឈឺធ្ងន់ បានត្រឹមដេកនៅលើគ្រែ។ សហការី
ភ្នំពេញ៖ គ្រូបង្វឹកក្បាច់គុនកីឡាច្រើនប្រភេទ ជាពិសេសកីឡាប្រយុទ្ធមានហាប់គីដូ និងយុទ្ធគុនខម លោក ចាន់ ប៊ុនធឿន ដែលជាឪពុកបង្កើតរបស់កីឡាប្រយុទ្ធល្បីឈ្មោះ ចាន់ រតនា បានធ្លាក់ខ្លួនមានជំងឺប្រចាំកាយធ្ងន់ធ្ងរ ហើយបានវិវឌ្ឍទៅជាមានទឹកនោមផ្អែម លើសសម្ពាធឈាម។ កាលពីសប្តាហ៍មុន គាត់បានចូលវះកាត់ឆ្អឹងផាល (ឆ្អឹងត្រគាក) ហើយនៅថ្ងៃអង្គារនេះ គាត់ត្រូវចូលវះកាត់ម្តងទៀត ដើម្បីដកដែកចេញ។
ក្នុងវ័យ ៧០ ឆ្នាំ លោក ចាន់ ប៊ុនធឿន ត្រូវបានគេស្គាល់ថា ជាគ្រូសិល្បៈ និងគ្រូកីឡាលក្ខណៈសម្តែង ក្នុងនោះលោកជាអ្នកសរសេរសៀវភៅចងក្រងកីឡាក្បាច់គុនទាក់ទងទៅនឹងយុទ្ធគុនខម គឺលោកជាគ្រូកីឡាជំនាន់ជាមួយលោកព្រឹទ្ធាចារ្យកីឡា សាន គឹមស៊ាន លោក សេង ប៊ុនសុង និងលោក ហុក ឈាងគីម ជាដើម។
ទោះយ៉ាងណា នៅក្នុងចំណោមកូនៗប្រុសស្រីសរុបចំនួន ១៦ នាក់ របស់លោក ចាន់ ប៊ុនធឿន គឺមានតែ ចាន់ រតនា ម្នាក់គត់ ដែលទទួលស្នងមរតកក្បាច់គុន បន្តពីលោក ហើយនៅក្នុងស្ថានភាពលំបាកក្នុងជីវភាព និងជួបបញ្ហាលំបាកក្នុងវ័យចាស់ជរា និងចូលព្យាបាលមន្ទីរពេទ្យនេះ ក៏មានតែ ចាន់ រតនា ដែរ ដែលជាកូនមានលទ្ធភាពរ៉ាប់រងជួយលោកក្នុងការព្យាបាល ឬទប់ទល់ជីវភាព។
អ្នកស្រី ឈួន ឈឿន ជាភរិយា ដែលមានវ័យ ៧០ ឆ្នាំដែរនោះ បានប្រាប់ថា៖ «ឥឡូវគាត់ (ប៊ុនធឿន) និយាយមិនច្បាស់ទេ និងភ្លេចការចងចាំច្រើនណាស់ ដើរមិនរួចដេក ១ កន្លែងហើយ។ គាត់មានជំងឺប្រចាំកាយ គឺទឹកនោមផ្អែម លើសសម្ពាធឈាម ហើយកាលពីសប្តាហ៍មុនគាត់ដួលធ្វើឱ្យបាក់ឆ្អឹងផាល គឺបន្ថែមធ្ងន់មួយទៀត លើជំងឺរ៉ាំរៃ»។
អ្នកស្រីបានបន្ថែមថា៖ «កាលនៅជំរំភៀសខ្លួន ព្រំប្រទល់ប្រទេសថៃ គាត់ជាអ្នកបង្ហាត់កីឡាកាយសម្ព័ន្ធ កីឡាប្រដាល់ និងកីឡាហាប់គីដូ ហើយក្នុងចំណោមកូនជាច្រើននេះ មានកូនប្រុស ២ នាក់ទេ គឺ ចាន់ ប៊ុនធី និង ចាន់ រតនា ប៉ុន្តែអ្នកទទួលស្នងជំនាញពីគាត់ មានតែ ចាន់ រតនា ម្នាក់គត់»។
ភរិយារូបនេះ បានបញ្ជាក់ថា៖ «ក្នុងស្ថានភាពលំបាកយ៉ាប់ខ្លាំង ក្នុងជីវភាពវ័យចាស់ ពិសេសក្នុងពេលចូលពេទ្យបែបនេះ មានតែ ចាន់ រតនា ម្នាក់ទេ ដែលបានជួយជ្រោមជ្រែងជាងគេ ខណៈដែលកូនៗជាច្រើនទៀត មានជីវភាពលំបាកលំបិនដូចគ្នា ពុំមានលទ្ធភាពជួយបាន។ ចំណែកការចំណាយវិញ គឺ ១ សប្តាហ៍នេះ អស់ជាង ២ ០០០ ដុល្លារ ហើយ រតនា និងបងប្រុសគេបានជួយ ប៉ុន្តែទៅថ្ងៃមុខ មិនដឹងថា បានអ្វីខ្លះសម្រាប់ថែទាំគាត់នោះទេ ពិតជាកម្សត់ណាស់»។
លោក សេង ប៊ុនសុង មិត្តរួមជំនាន់ក្នុងកីឡាប្រយុទ្ធរបស់លោក ចាន់ ប៊ុនធឿន ដែលទើបវិលពីអាមេរិកបានប្រាប់ថា៖ «ខ្ញុំធ្លាប់ហាត់គុនជាមួយគ្នា តាំងពីទសវត្សរ៍ ១៩៨០ ក្នុងនោះ លោក ចាន់ ប៊ុនធឿន ពេលខ្ញុំឡើងប្រកួតជាមួយថៃ គាត់ជាអ្នកឱ្យទឹកខ្ញុំ។ គាត់ជាគ្រូបង្វឹកកីឡាប្រយុទ្ធ និងជាអ្នកនិយមហាត់គុនច្រើនប្រភេទកីឡា ដូចជាមានហាប់គីដូ គឺកាលនៅជំរំ គាត់បានដូចជាខ្សែក្រវាត់ខ្មៅ ៣ ដាន់ និងជាគ្រូកាយសម្ព័ន្ធ ជាពិសេសគាត់មានទេពកោសល្យបង្ហាត់សិល្បៈក្បាច់គុន ដើម្បីបង្ហាញជាសូ»។
លោកបញ្ជាក់ថា៖ «ខ្ញុំនឹងទៅសួរសុខទុក្ខគាត់ ហើយកំពុងទាក់ទង ចាន់ រតនា ដើម្បីបានជួយឧបត្ថម្ភជីវភាពដល់គាត់ខ្លះ ហើយនៅស្រុកខ្មែរយើង គ្រូកីឡា ឬកីឡាករ ដែលចាស់ទៅ គ្មានប្រាក់ចូលនិវត្តន៍ មិនដឹងថា ច្បាប់គេយ៉ាងណាទេ ប៉ុន្តែខ្ញុំនៅអាមេរិក គ្រូកីឡា ឬកីឡាករ ជាលក្ខណៈក្រុម ឬឯកជនក្តី នៅពេលចាស់ គឺមានរដ្ឋគេជួយចិញ្ចឹម មិនលំបាកទេ សូម្បីតែឈឺក៏មានពេទ្យព្យាបាលមិនឱ្យយើងខ្វល់ទេ»។
ចំណែក ចាន់ រតនា ជាកូនបង្កើតបាននិយាយថា៖ «ក្នុងរយៈពេល ដែលជំងឺកូវីដ ១៩ វាយលុកខ្លាំង គឺការងារបង្វឹកហាត់របស់ខ្ញុំធ្លាក់ចុះ ហើយខ្ញុំបានឈានដល់បិទក្លិបអស់រយៈច្រើនខែមកហើយ។ បន្ថែមលើនេះ ប៉ាខ្ញុំ គាត់ធ្លាក់ខ្លួនឈឺធ្ងន់ទៀត ខ្ញុំរ៉ាប់រងច្រើនណាស់ ខណៈដែលសកម្មភាពរបស់ក្លិបសិល្បៈគុនខ្មែររបស់ខ្ញុំ គ្មានប្រភពចំណូល រីឯសកម្មភាពប្រកួតរបស់ខ្ញុំ នៅក្រៅប្រទេស ក៏មិនទាន់មានដំណឹងថ្មីឡើងវិញដែរ គឺលំបាកខ្លាំង។ ខ្ញុំមិនត្អូញត្អែរទេ តែនេះជាការពិត ដែលបានកើតឡើង ចំពោះយើងទាំងអស់គ្នា»៕
