ភ្នំពេញ៖ ខណៈដែលរលកព័ត៌មានកំពុងតែឡើងកម្តៅខ្លាំងលើបណ្តាញសង្គមជុំវិញរឿងរ៉ាវនៃការរំលោភបំពានមកលើតារាស្រីវ័យក្មេងកញ្ញា មាន ពេជ្ររីតា ពីសំណាក់ឧកញ៉ា ហេង សៀ ក្រោយពីមានធ្លាយរឿងពាក្យបណ្តឹងពីខាងស្រីថ្មីៗនេះក៏ស្រាប់តែលេចឮដំណឹងបែបអាថ៌កំបាំងពីតារាស្រី ២ ដួងទៀតផងដែរ គឺកញ្ញា សេង រដ្ឋា និងកញ្ញា នីកគី។
សូរស័ព្ទស្រែកយំរៀបរាប់ហេតុការណ៍អាក្រក់កើតឡើងលើខ្លួនឯង គឺតារាម៉ូដែល និងពិធីការិនីទូរទស្សន៍ MyTV វ័យ ១៩ ឆ្នាំ កញ្ញា មាន ពេជ្ររីតា ដែលបង្ហើរជាពាក្យពេចន៍ថា៖ «ខ្ញុំខ្ពើមខ្លួនឯងណាស់ម៉ាក់» «គេស្ទាបខ្ញុំ គេប៉ះខ្ញុំ» «ខ្ញុំមិនចង់គិតទេ គេចង់រំលោភខ្ញុំណាម៉ាក់!គេមានកាំភ្លើង គេចង់ធ្វើបាបខ្ញុំណាម៉ាក់» នោះ កំពុងតែដិតដាមនៅក្នុងអារម្មណ៍អ្នកតាមដានក្នុងគ្រប់មជ្ឈដ្ឋាន ជាពិសេសពីបណ្តាក្រុមអ្នកសិល្បៈជាស្រ្តី សុទ្ធតែបានបង្ហាញអារម្មណ៍ស្អប់ខ្ពើមទង្វើដែលបានកើតឡើងនេះ និងសំណូមពរឱ្យមានការជួយស្រាវជ្រាវរកយុត្តិធម៌ផងដែរ។
ដោយឡែកនារសៀលថ្ងៃទី ១២ ខែ ឧសភា ឆ្នាំ ២០២១ នេះ មានក្រុមមេធាវីស្ម័គ្រចិត្តសម្តេចតេជោ ចាប់ផ្តើមស្រាវជ្រាវលើពាក្យបណ្តឹងកញ្ញា មាន ពេជ្ររីតា ពិធីការិនីទូរទស្សន៍ My TV ចំពោះឧកញ៉ា ហេង សៀ ពីបទប៉ុនប៉ងរំលោភសេពសន្ធវៈក្នុងរថយន្ត ដែលបានកើតឡើងតាំងពីថ្ងៃទី ៤ ខែ ឧសភា ឆ្នាំ ២០២១ កន្លងមកនោះ។
អ្វីដែលគួរឱ្យមានការភ្ញាក់ផងដែរនោះ ស្រាប់តែលេចចេញរឿងអាថ៌កំបាំងពីតារាស្រី ២ ដួងផ្សេងទៀតគឺកញ្ញា សេង រដ្ឋា អតីតកញ្ញាឯកដ៏អស្ចារ្យកម្ពុជាឆ្នាំ ២០២០ (Miss Grand Cambodia 2020) និងតារាចម្រៀងស្រី កញ្ញា នីកគី បានបញ្ចេញនូវសារបរិយាយពីរឿងផ្ទាល់ខ្លួនមានស្ថានភាពខុសប្រក្រតី អាចនឹងរងគ្រោះស្រដៀងគ្នានឹងកញ្ញា មាន ពេជ្ររីតា ដែរ។
កញ្ញា សេង រដ្ឋា បង្ហោះសារក្នុងហ្វេសប៊ុកខ្លួន ដោយបានបរិយាយថា៖ «និយាយការងារតាម Telegram និយាយហើយលុប និយាយហើយលុប។ សំណាងរបស់ខ្ញុំហើយ ដែលមិនបានសម្រេចចិត្តទទួលការងារពីបុគ្គលនោះ»។
ចំណែកតារាចម្រៀងស្រីកញ្ញា នីកគី វិញនោះបានរៀបរាប់សារយ៉ាងវែងថា៖ «ខ្ញុំសុំនិយាយតំណាងឱ្យក្រុមទាំងមូលតែម្ដង ហើយខ្ញុំសុំមិនបញ្ចេញឈ្មោះថាតួរបស់ខ្ញុំមួយណាខ្លះ ដែលជាគោលដៅចំ។ សំណាងណាស់! ពិតជាសំណាងណាស់ ដែលខ្ញុំជឿលើសភាវគតិរបស់ខ្ញុំនៅពេលដែលនិយាយការងារមិនចេញសាច់ការអ្វីសោះ។បន្ទាប់ពីបានទទួលការងាររាប់ពាន់ដងហើយ វាពិតជា ងាយយល់ណាស់ សម្រាប់ពួកខ្ញុំ ក្នុងការសម្គាល់ថាអ្វីធម្មតា អ្វីដែលខុសប្រក្រតី។ ត្រូវមានការប្រុងប្រយ័ត្នជានិច្ច ហើយបើការនិយាយស្ដីចេះតែផ្ដោតទៅលើតែតួ និងការជួបគ្នា ផឹកកាហ្វេ ជាងការងារជាក់ស្ដែងទាក់ទងទៅនឹងConceptឬប្រភេទវីដេអូផ្សាយពាណិជ្ជកម្ម គួរបោះបង់ការសន្ទនានោះទៅ។ សុវត្ថិភាពសំខាន់ជាងលុយ! សូមបញ្ជាក់ ពួកខ្ញុំកម្រជួបភ្ញៀវប្រជុំផ្ទាល់ណាស់។ ទាក់ទងគ្នាតែតាមទូរសព័្ទក៏កើតការដែរ»។
សាររបស់កញ្ញា នីកគី បានបន្តថា៖«ដោយការប្រជុំចង់ឱ្យពួកខ្ញុំទៅជួបដល់រោងចក្រ តែមិនព្រមនិយាយគ្នារឿងតម្លៃតាមដំណាក់កាលសោះនោះ ហើយដោយមានអារម្មណ៍ថាមិនសូវស្រួលផង ពួកខ្ញុំក៏ឈប់តបទៅ។
គាត់ក៏មិនបានដឹងដែរថា នៅពីក្រោយទូរសព្ទ័ ១ គ្រឿងនេះមានមនុស្សប៉ុន្មានអ្នក និងជាអ្នកណាខ្លះដែលកំពុងតបជាមួយនឹងគាត់។ មិនបានប៉ុន្មានផង គាត់លុបឆាត Telegram ចោលអស់រលីង។ ប៉ុន្មានខែក្រោយមក លេខដដែលមកម្ដងទៀតសួរអ្វីចម្លែកៗ។ ឆ្ងល់ពេក ខ្ញុំក៏បានទៅនិយាយជាមួយកូនស្រីគាត់ផ្ទាល់ព្រោះស្គាល់គ្នា។
កូនស្រីគាត់ដោយជាមនុស្សមានចំណេះដឹងជាមនុស្សល្អ និងមនុស្សមានសុជីវធម៌ ក៏បានជួយដោះស្រាយបញ្ហាយ៉ាងលឿនបំផុត។សូមបែងចែកឱ្យដាច់រវាងអ្នកប្រព្រឹត្ត និងអ្នកជួយឬអ្នកមិនដឹងរឿង។
សូមកុំតាមរករឿងមនុស្សដែលល្អ ត្រឹមត្រូវ និងសុចរិត។ ព្រោះយើងដឹងថាវាជារឿងធម្មតាដែលពេលខ្លះមានផ្លែស្អុយ ១ ឬ ២ ក្នុងកញ្ច្រែង។ ខ្ញុំមានអារម្មណ៍ធូរស្បើយដែលពួកខ្ញុំសំណាង តែមានអារម្មណ៍សោកស្ដាយ ដែលគាត់មិនមែនដឹងខ្លួនទេបន្ទាប់ពីខ្ញុំបានជូនជាដំណឹងទៅគ្រួសារគាត់ គឺគាត់គ្រាន់តែប្ដូរគោលដៅតែប៉ុណ្ណោះ។ ខ្ញុំសង្ឃឹមថាអំពើថោកទាប គ្មានអ្វីប្រៀបមួយនេះរលុបរលាយអស់ពីសង្គមយើង។ អរគុណអ្នកដែលស្រែកទាមទាររកយុត្តិធម៌។ ស្រែកទៅ ស្រែកឱ្យបានខ្លាំងជាងសំឡេងយំរបស់នាង!»៕