.jpg)
សួនកម្សាន្ដ Disneyland ក្រុងប៉ារីស ជាគោលដៅទេសចរណ៍ធំបំផុតនៅអឺរ៉ុប ត្រៀមបើកទ្វារវិញនៅពាក់កណ្ដាលខែមិថុនា។ AFP
ក្រុងប៉ារីស៖ សួនកម្សាន្ដ Disneyland ក្រុងប៉ារីស ជាគោលដៅទេសចរណ៍ធំបំផុតនៅអឺរ៉ុប បានឱ្យដឹងកាលពីថ្ងៃចន្ទថា ខ្លួននឹងបើកទ្វារស្វាគមន៍ភ្ញៀវនៅថ្ងៃទី ១៧ ខែមិថុនា ខណៈប្រទេសបារាំង បន្ធូរបន្ថយការរឹតបន្តឹង។
សួនកម្សាន្ដដែលមានបុគ្គលិក ១៧ ០០០ នាក់ បានបិទទ្វារកាលពីថ្ងៃទី ១៣ ខែមីនា និងថ្ងៃទី ១៥ ខែកក្កដា ឆ្នាំមុន ហើយក៏បានបិទទ្វារម្ដងទៀតតាំងពីថ្ងៃទី ៣០ ខែតុលា។
សួនកម្សាន្ដនេះត្រូវលុបចោលគម្រោងបើកដំណើរការឡើងវិញពីរលើកដោយសារវិបត្ដិកូវីដចេះតែបន្ដ។
Disneyland បានបិទទ្វារកាលពីថ្ងៃទី ១៣ ខែមីនា និងថ្ងៃទី ១៥ ខែកក្កដា ឆ្នាំមុន ហើយក៏បានបិទទ្វារម្ដងទៀតតាំងពីថ្ងៃទី ៣០ ខែតុលា។ AFP
យោងតាមសេចក្ដីថ្លែងការណ៍បានបង្ហាញថា៖ «យើងមានក្ដីសោមនស្សរីករាយក្នុងការប្រកាសថា Disneyland Paris នឹងបើកទ្វារឡើងវិញនៅថ្ងៃទី ១៧ ខែមិថុនាខាងមុខ ដោយគោរពទៅតាមគោលការណ៍សុខភាព និងសុវត្ថិភាព»។
ដំបូងឡើយ Disneyland Paris មានក្ដីសង្ឃឹមថានឹងបានទទួលភ្ញៀវឡើងវិញតាំងពីខែកុម្ភៈ មុនពេលថ្ងៃទី ២ ខែមេសា ជាវេលាបើកទ្វារលើកទី២ ដែលក្រោយមកលុបចោលម្ដងទៀត។
កាលពីខែមុន ទីកម្សាន្ដនេះចាប់ផ្ដើមរៀបចំការចាក់វ៉ាក់សាំងក្នុងទ្រង់ទ្រាយធំ ខណៈបារាំងពន្លឿនការចាក់ទូទាំងប្រទេស។ កាលពីថ្ងៃចន្ទ សួនកម្សាន្ដ បានឱ្យដឹងថា ខ្លួននឹងតម្រូវឱ្យលើសអាយុ ៦ ឆ្នាំត្រូវពាក់ម៉ាស។
សួនកម្សាន្ដមានបុគ្គលិក ១៧ ០០០ នាក់ ដែលបម្រើការថែទាំសួន ច្នៃម៉ូដរទេះក្បួនតុក្កតា និងសិល្បករសម្ដែងជាតួអង្គនានា។ AFP
អ្នកចូលរួមត្រូវបានកំណត់ ហើយការទិញសំបុត្រទុក និងការកក់ទុក ក៏តម្រូវឱ្យធ្វើមុនផងដែរ។ អាស្រ័យលើគោលការណ៍សុវត្ថិភាពពីអាជ្ញាធរ គោលដៅទេសចរណ៍មួយចំនួនអាចបន្ដបិទ ឬកែសម្រួល។
ប្រភពសហជីពមួយនៅ Disneyland បានឱ្យដឹងកាលពីដើមឆ្នាំថា គណគ្រប់គ្រងរំពឹងថា នឹងវិលទៅកាន់សកម្មភាពមុនកើតវិបត្ដិឡើងវិញនៅក្នុងឆ្នាំ ២០២២។
សម្ព័ន្ធ Disney បានប្រកាសកាត់ការងារ ៣២ ០០០ នាក់ នៅសួនកម្សាន្ដរបស់ខ្លួនទូទាំងពិភពលោក ភាគច្រើននៅសហរដ្ឋអាមេរិក ដោយសារផលប៉ះពាល់ខ្លះ៕ AFP/HR
ភ្ញៀវទេសចរពាក់ម៉ាស់ទៅកម្សាន្តនៅ Disneyland កាលពីសួននៅបើកដំណើរការមុននេះ។ AFP
