កាលពីអតីតកាល វាអាចជារឿងពិបាកសម្រាប់អ្នកទិញរថយន្តនៅកម្ពុជាក្នុងការជ្រើសរើសរថយន្តរបស់ចិនជំនួសឲ្យរថយន្តជប៉ុន និងរថយន្តមកពីអឺរ៉ុប ប៉ុន្តែបច្ចុប្បន្ននេះវាមានការផ្លាស់ប្តូរយ៉ាងឆាប់រហ័ស។
អគ្គនាយកក្រុមហ៊ុន Worldwide Motors (WMC) ដែលជាក្រុមហ៊ុនចែកចាយរថយន្ត Great Wall នៅកម្ពុជាបានថ្លែងថា វាជាពេលវេលាដ៏រំភើបសម្រាប់ឧស្សាហកម្មយានយន្តរបស់ចិននៅកម្ពុជា។
លោក Peang Mann អគ្គនាយកក្រុមហ៊ុន WMC ថ្លែងថា ការអភិវឌ្ឍថ្មីៗកំពុងត្រួសត្រាយផ្លូវសម្រាប់ការកើនឡើងនូវវត្តមានរថយន្តចិននៅលើដងផ្លូវក្នុងប្រទេស កម្ពុជា។
លោកបញ្ជាក់ថា ការផ្លាស់ប្តូរការយល់ឃើញក្នុងចំណោមប្រជាជនកម្ពុជាទៅលើក្រុមហ៊ុនផលិតរថយន្តចិន គួបផ្សំនឹងតម្លៃប្រកួតប្រជែង និងសេវាកម្មបន្ទាប់ពីការលក់ធ្វើឱ្យមានវត្តមានរថយន្តមកពីក្រុមហ៊ុនយក្សអាស៊ីមួយនេះកើនឡើង។
លោក Mann បន្តថា៖ «ទស្សនៈអវិជ្ជមានចម្បងលើកឡើងថា រថយន្តចិនមានតម្លៃទាប ដូច្នេះគេគិតថា វាមានគុណភាពទាបដែរ។ ប៉ុន្តែទោះជាយ៉ាងណាប្រជាជនចាប់ផ្តើមដឹងថា គុណភាពរថយន្តចិន គឺល្អមិនចាញ់រថយន្តផ្សេងទៀតនៅលើទីផ្សារនោះទេ»។
ជាមួយនឹងតម្រូវការរថយន្តចិនកំពុងកើនឡើងក្រុមហ៊ុន WMC គ្រោងនឹងបើករោងចក្រដំឡើងរថយន្តថ្មីមួយទំហំពី ៣៣ ទៅ ៥០ ហិកតា នៅខេត្តព្រៃវែងជិតព្រំដែនវៀតណាមក្នុងឆ្នាំនេះ ដោយមានជំនួយបច្ចេកទេសពីក្រុមហ៊ុនរថយន្ត Great Wall ដើម្បីធានាថា គ្រប់រថយន្តរបស់ខ្លួនទាំងអស់មានគុណភាពខ្ពស់បំផុតមុនពេលទៅដល់ដៃអតិថិជន។
លោក Mann បានបញ្ជាក់ថា៖ «រោងចក្រនេះមានសមត្ថភាពដំឡើងរថយន្តបានចំនួន ៥ ម៉ឺនគ្រឿង ក្នុង ១ ឆ្នាំ ហើយយើងសង្ឃឹមថា នៅក្នុងរយៈពេល ២ ឬ ៣ ឆ្នាំដំបូង យើងអាចដំឡើងរថយន្តបានចន្លោះពី ៥០០ ទៅ ១ ០០០ គ្រឿង ក្នុង ១ ឆ្នាំ ប៉ុន្តែចំនួននេះនឹងកើនឡើង ខណៈវិនិយោគិនចូលមកកាន់តែច្រើន»។
លើសពីនេះទៀត ក្រុមហ៊ុនរថយន្ត Great Wall ទិញរោងចក្ររបស់ក្រុមហ៊ុន General Motors នៅប្រទេស ថៃ ដើម្បីពង្រីកទីផ្សារទៅក្នុងទីផ្សារអាស៊ានដែលរួមមានទាំងប្រទេស មីយ៉ាន់ម៉ា វៀតណាម និងប្រទេស ឡាវ និងបង្កើនចំណែកទីផ្សារនៅក្នុងបណ្តាប្រទេសដែលខ្លួនដំណើរការរួចហើយ រួមទាំងប្រទេស កម្ពុជា ជាមួយប្រទេស ម៉ាឡេស៊ី និងប្រទេស ឥណ្ឌូនេស៊ី។
ក្រុមហ៊ុន WMC លក់រថយន្ដចិនច្រើនម៉ូដែលដូចជារថយន្តម៉ាក Great Wall រថយន្ត ភិកអាប់ រថយន្ត ប្រភេទ SUV រាប់ចាប់ពីម៉ាក Haval, Zotye Huanghai, Traum និង FAW ក៏ដូចជារថយន្តមីនីវ៉ែន BAW ជាដើម ដែលចាប់ផ្តើមប្រតិបត្តិការចាប់តាំងពីឆ្នាំ ២០១៣ មកម្ល៉េះ។
ចំពោះតម្លៃវិញមានចាប់ពី ២០ ៧០០ ដុល្លារ សម្រាប់រថយន្ត Great Wall Voleex C30 និង 45,000 ទៅ ៦៨ ០០០ ដុល្លារ សម្រាប់រថយន្ត Haval H6 រហូតដល់ ៧៣ ០០០ ដុល្លារ សម្រាប់រថយន្តប្រភេទ Haval H9 SUV។ ចំពោះរថយន្ត H9 គឺជារថយន្តធំទូលាយដ៏ទំនើប មាន ៧ កៅអី នឹងមានតម្លៃសមរម្យ។
ជាមួយនឹងការយល់ដឹងយ៉ាងឆាប់រហ័សនៃគុណភាពដ៏ខ្ពស់ទើបក្រុមហ៊ុន WMC បានមើលឃើញការលក់រថយន្តចិនកើនឡើងចំនួន ៦០ ភាគរយកាលពីឆ្នាំមុន ធៀបទៅនឹងឆ្នាំ ២០១៨ ពោលគឺកើនឡើងពី ៣០០ ទៅ ៥០០ គ្រឿង។
លោក Mann បានប្តេជ្ញាចិត្តថា នឹងជួយប្រជាជនកម្ពុជាឱ្យមានឡានថ្មីផ្ទាល់ខ្លួនហើយលោកបាននិយាយថាការទិញរថយន្តរបស់លោកក៏មានការបង់មុនត្រឹមតែ ១៥ ទៅ ២០ ភាគរយ នៃតម្លៃរថយន្តនៅក្នុងប្រទេស កម្ពុជា និងមានការផ្តល់សេវាប្រចាំឆ្នាំដោយឥតគិតថ្លៃសម្រាប់អំឡុងពេលបង់ប្រាក់ និងមានការធានារយៈពេលពី ៥ ទៅ ៧ ឆ្នាំ។
លោកបានស្វះស្វែងឲ្យមានការជួយពីធនាគារនៅក្នុងគោលដៅនេះ ដើម្បីផ្តល់ជម្រើសឥណទានកាន់តែច្រើនដល់ទាំងអ្នកទិញ និងអ្នកចែកចាយ ហើយបានអញ្ជើញវិនិយោគិនឲ្យមកកាន់តែច្រើនបន្ថែមទៀត។
លោក Mann ថ្លែងថា ការកសាងគុណភាពរថយន្តចិន គឺវាបានឆ្លុះបញ្ចាំងលើកត្តាសុវត្ថិភាព។
«ម៉ាក Haval និងម៉ាកដ៏ទៃទៀត បានទទួលចំណាត់ថ្នាក់សុវត្ថិភាពខ្ពស់បំផុតលំដាប់ផ្កាយ ៥ ពីកម្មវិធីវាយតម្លៃសុវត្ថិភាពរថយន្ត ANCAP [Australian New Car Assessment Program]។
លោកមានប្រសាសន៍ថា៖ «ការកសាងគុណភាពនៃរថយន្តចិនរបស់យើងយ៉ាងហោចណាស់ គឺដូចគ្នានឹងរថយន្តមកពីក្រុមហ៊ុនផលិតរថយន្តជប៉ុន កូរ៉េ អាមេរិក ឬអាល្លឺម៉ង់ ដោយភាគច្រើននៃរថយន្តទាំងនេះ គឺផលិតនៅក្នុងប្រទេស ចិន»។
ពិតណាស់ការយល់ឃើញអំពីគុណភាពនៃរថយន្តចិនបានផ្លាស់ប្តូរអស់មួយរយៈពេលមកហើយ។
លោក Robin Page អនុប្រធានជាន់ខ្ពស់ផ្នែករចនាម៉ូឌែលនៅក្រុមហ៊ុនរថយន្ត Volvo បានឲ្យដឹងថា បើងាកត្រឡប់ទៅមើលឆ្នាំ ២០១៨ វិញ គឺថាគុណភាពនៃការផលិតរថយន្តចិនកើនឡើងគួរឲ្យកត់សម្គាល់បន្ទាប់ពីក្រុមហ៊ុនផលិតរថយន្តស៊ុយអែតបានជ្រើសរើសការផលិតរថយន្តនៅក្នុងប្រទេស ចិន។
លោក Page ថ្លែងប្រាប់គេហទំព័ររថយន្ត Go Auto របស់អូស្ត្រាលីថា៖ «អ្វីដែលយើងរកឃើញ គឺថាគុណភាពនៃរថយន្តនៅក្នុងប្រទេស ចិន ទាំងនោះគឺពិតជាល្អប្រសើរជាងនៅអឺរ៉ុបទៅទៀត។ គ្រប់គ្នាព្រួយបារម្ភអំពីគុណភាព ប៉ុន្តែនៅពេលដែលចិនចាប់ផ្តើម នោះគុណភាពខ្ពស់ជាងនៅអឺរ៉ុបទៀត»។ លោក Mann មានទំនុកចិត្តថា រថយន្តដែលត្រូវបានលក់ដោយក្រុមហ៊ុន WMC គឺអាចប្រកួតប្រជែងជាមួយរថយន្តដទៃទៀតបាន។
លោកបន្ថែមថា៖«ប្រជាជនយល់ដឹងកាន់តែច្រើនថា រថយន្តចិនមានភាពទាក់ទាញកម្រិតណា ទាក់ទងនឹងការរចនា លក្ខណពិសេស ក៏ដូចជាគុណភាព។ សាកល្បងប្រើប្រាស់រថយន្តចិននោះលោកអ្នកនឹងមើលឃើញដោយខ្លួនឯងថា វាល្អកម្រិតប៉ុនណា?»៕
