ភ្នំពេញៈ វិបត្តិនៃការឆ្លងរាលដាលជំងឺផ្តាសាយសកលកូវីដ ១៩ បានធ្វើឱ្យតម្លៃដីធ្លីនៅក្រុងសៀមរាប និងក្រុងព្រះសីហនុក្នុងឆ្នាំ ២០២០ បង្ហាញសញ្ញាធ្លាក់ចុះព្រមគ្នា ខណៈរាជធានីភ្នំពេញរក្សាបាននូវកំណើនតិចតួចបើធៀបនឹងឆ្នាំ ២០១៩។ នេះបើយោងតាមការស្រាវជ្រាវរបស់ក្រុមហ៊ុនអចលនទ្រព្យ ឃី រៀលអ៊ីស្ទេត។
ក្នុងបទបង្ហាញ «បច្ចុប្បន្នភាពនៃទីផ្សារអចលនវត្ថុក្នុងអំឡុងពេលកូវីដ ១៩» ដែលរៀបចំដោយសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) នៅថ្ងៃទី ២០ ខែឧសភា ប្រធានក្រុមហ៊ុន ឃី រៀលអ៊ីស្ទេត លោក សន សៀប បានលើកឡើងថា ការរីករាលដាលនៃជំងឺកូវីដ ១៩ ដែលធ្វើឱ្យចរន្តការធ្វើដំណើររបស់វិនិយោគិនបរទេសមកកម្ពុជាធ្លាក់ចុះនោះបានបណ្តាលឱ្យសកម្មភាពទិញ-លក់ និងតម្លៃដីធ្លីនៅកម្ពុជាក្នុងឆ្នាំ ២០២០ មិនមានកម្លាំងខ្លាំងដូចឆ្នាំ ២០១៩ ទេ ជាក់ស្តែងក្រៅពីក្នុងរាជធានីភ្នំពេញ តម្លៃដីនៅតំបន់ប៉ូលសេដ្ឋកិច្ចសំខាន់ចំនួន ២ របស់កម្ពុជា គឺខេត្តសៀមរាប និងខេត្តព្រះសីហនុបានបង្ហាញពីការធ្លាក់ចុះដូចៗគ្នា។
ការស្រាវជ្រាវរបស់ ឃី រៀលអ៊ីស្ទេត រកឃើញថា គិតត្រឹមដំណាច់ឆ្នាំ ២០២០ ដីនៅក្នុងក្រុងព្រះសីហនុមានតម្លៃជាមធ្យម ១ ២៤០ ដុល្លារក្នុង ១ ម៉ែត្រការ៉េ ធ្លាក់ចុះ ១០,១ ភាគរយធៀបនឹង ១ ៣៨០ ដុល្លារកាលពីឆ្នាំ ២០១៩ និងដីក្នុងក្រុងសៀមរាបមានតម្លៃ ១ ៥២០ ដុល្លារ ក្នុង ១ ម៉ែត្រការ៉េ ធ្លាក់ ៥,០ ភាគរយពី ១ ៦០០ ដុល្លារ។
ដោយឡែកសម្រាប់រាជធានីភ្នំពេញ ដែលជាមជ្ឈមណ្ឌលពាណិជ្ជកម្មចម្រុះ គឺនៅរក្សាកំណើនត្រឹម ១,៩ ភាគរយ ដោយជាមធ្យមដីមានតម្លៃ ២ ១១០ ដុល្លារក្នុង ១ ម៉ែត្រការ៉េ កើនពីចំនួន ២ ០៧០ ដុល្លារ។ ក្នុងនោះដីនៅខណ្ឌដង្កោ មានកំណើនខ្ពស់ជាងគេ ១៧,៩ ភាគរយ, សែនសុខ ៧,៣ ភាគរយ និងខណ្ឌព្រែកព្នៅ ៦,៥ ភាគរយ ខណៈខណ្ឌនៅកណ្តាលក្រុង (ចំការមន, បឹងកេងកង, ដូនពេញ, ៧ មករា និងទួលគោក) តម្លៃស្ថិតនៅដដែល។
លោក សន សៀប ប្រាប់ទៀតថា ការធ្លាក់ចុះតម្លៃដីធ្លីនៅក្នុងក្រុងសៀមរាប និងក្រុងព្រះសីហនុ គឺជាប់ទាក់ទងខ្លាំងនឹងការផ្ទុះឡើងជំងឺកូវីដ ១៩ ដែលបានក្លាយជាឧបសគ្គសម្រាប់ការធ្វើដំណើររបស់វិនិយោគិនបរទេស ពិសេសជនជាតិចិនមកកម្ពុជា។ ទោះយ៉ាងណាស្ថានភាពនេះនឹងប្រសើរឡើងវិញក្នុងពេលឆាប់ៗ ខណៈបច្ចុប្បន្នកម្ពុជាបាននិងកំពុងធ្វើកិច្ចការជាច្រើន ដើម្បីត្រៀមទទួលយកកំណើនសេដ្ឋកិច្ច និងការវិនិយោគទាំងក្នុងស្រុក និងបរទេសឡើងវិញ។
លោកថ្លែងថា៖ «ខ្ញុំគិតថាតម្លៃដីធ្លីនៅកម្ពុជានឹងមានកំណើនឡើងវិញនៅចុងឆ្នាំ ២០២១ នេះ ឬដើមឆ្នាំ ២០២២ ខាងមុខ ព្រោះជាមួយនឹងកិច្ចសហប្រតិបត្តិការការទូត និងពាណិជ្ជកម្មល្អជាមួយប្រទេសធំ ពិសេសការបង្កើតបានកិច្ចព្រមព្រៀងពាណិជ្ជកម្មសេរីទ្វេភាគី (FTA) កម្ពុជា-ចិន វានឹងធ្វើឱ្យកម្ពុជាក្លាយជាទីតាំងដែលមានសក្តានុពលក្នុងការទាក់ទាញវិនិយោគិនឱ្យចូលមកបណ្តាក់ទុនកាន់តែច្រើន បន្ទាប់ពីកូវីដ១៩ បញ្ចប់»។
ដើម្បីបង្កើនភាពទាក់ទាញអ្នកវិនិយោគ និងភ្ញៀវទេសចរ រដ្ឋាភិបាលកម្ពុជាកាលពីខែវិច្ឆិកា ឆ្នាំ ២០១៩ បានបញ្ចេញថវិកាជាតិប្រមាណជិត ៣០០ លានដុល្លារសម្រាប់កសាងផ្លូវចំនួន ៣៤ ខ្សែក្នុងខេត្តព្រះសីហនុ ដោយមានប្រវែងសរុប ៨៤ គីឡូម៉ែត្រ។ ១ ឆ្នាំក្រោយមក នៅខែវិច្ឆិកា ឆ្នាំ ២០២០ រដ្ឋាភិបាលក៏បានចំណាយថវិកាប្រមាណ ១៥០ លានដុល្លារទៀតលើការសាងសង់ផ្លូវចំនួន ៣៨ ខ្សែនៅខេត្តសៀមរាប។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានលើកឡើងថា ផលប៉ះពាល់ដែលបណ្តាលមកពីការរឹតបន្តឹងការធ្វើដំណើរជាលក្ខណៈអន្តរជាតិបានធ្វើឱ្យប៉ះពាល់យ៉ាងខ្លាំងសម្រាប់វិស័យអចលនទ្រព្យនៅកម្ពុជាកាលពីឆ្នាំ ២០២០ និងដើមឆ្នាំនេះ ដែលការវិនិយោគភាគច្រើនគឺជារបស់ជនបរទេស។
លោកបន្តថា ទោះយ៉ាងណាពេលនេះលោកសង្កេតឃើញថា កំណើនការវិនិយោគពីសំណាក់វិនិយោគិនក្នុងស្រុកពេលនេះក៏មានចំនួនកាន់តែច្រើនគួរឱ្យកត់សម្គាល់ផងដែរ។
លោកបានបន្ថែមថា តាមរយៈការខិតខំបង្កើនល្បឿនចាក់វ៉ាក់សាំងកូវីដ ១៩ របស់ប្រទេសជាច្រើននៅលើពិភពលោក រួមទាំងកម្ពុជា លោករំពឹងថាទីផ្សារនេះនឹងមានសម្ទុះឡើងវិញក្នុងពេលឆាប់ៗ។
លោកអះអាងថា៖ « សម្រាប់ជនបរទេស (ភាគច្រើនជនជាតិចិន) អាចនឹងចាប់ផ្តើមចូលមកវិនិយោគនៅកម្ពុជាវិញក្នុងរយៈពេល ៣-៤ ខែខាងមុខ ប៉ុន្តែចំពោះការវិនិយោគក្នុងស្រុកគឺបានចាប់ផ្តើមមានឡើងវិញហើយ»។
របាយការណ៍ក្រសួងរៀបចំដែនដី នគរូបនីយកម្ម និងសំណង់ឱ្យដឹងថា ទុនវិនិយោគវិស័យសំណង់នៅកម្ពុជារយៈពេល ៩ ខែ ឆ្នាំ ២០២០ មានតម្លៃសរុប ៥ ៨៦៨ លានដុល្លារ ថយចុះ ៩,៦ ភាគរយ ពីចំនួន ៦ ៤៩៤ លានដុល្លារកាលពីរយៈពេលដូចគ្នាឆ្នាំ ២០១៩៕ LA
វីដេអូ៖