.jpg)
សកម្មភាពក្រុមកម្មករចងដែកសម្រាប់ចាក់សសរនៅការដ្ឋានមួយ។ ហុង មិនា
ភ្នំពេញៈ ការធ្លាក់ចុះសកម្មភាព និងការផ្អាកសាងសង់ ដោយសារឥទ្ធិពលនៃការបន្តឆ្លងរាលដាលជំងឺកូវីដ ១៩ បានធ្វើឱ្យប្រាក់ដែលកម្ពុជាចំណាយទៅលើការនាំចូលដែក និងស៊ីម៉ងត៍ក្នុងឆ្នាំ ២០២០ ធ្លាក់ជិត ៣០ ភាគរយបើធៀបនឹងឆ្នាំ ២០១៩។ នេះបើតាមទិន្នន័យពីក្រសួងពាណិជ្ជកម្ម។
របាយការណ៍ស្តីពីលទ្ធផលការងារប្រចាំឆ្នាំ ២០២០ របស់ក្រសួងពាណិជ្ជកម្ម បានបង្ហាញថា ក្នុងឆ្នាំ ២០២០ កម្ពុជាបាននាំចូលដែក និងស៊ីម៉ងត៍ក្នុងតម្លៃសរុប ៤៦៩,៨៨ លានដុល្លារ ធ្លាក់ចុះ ២៨,៦៦ ភាគរយធៀបនឹងឆ្នាំ ២០១៩ ដែលមានតម្លៃ ៦៥៨,៧១ លានដុល្លារ។ ក្នុងនោះការនាំចូលដែកមានទឹកប្រាក់ ៤០៣,៦៣ លានដុល្លារ ធ្លាក់ ២៧,៥២ ភាគរយ ពីចំនួន ៥៥៦,៨៥ លានដុល្លារ និងស៊ីម៉ងត៍មានតម្លៃ ៦៦,២៥ លានដុល្លារ ធ្លាក់ចុះ ៤៨,៥៩ ភាគរយ ពីចំនួន ១២៨,៨៦ លានដុល្លារ។
ប្រធានគ្រប់គ្រងទូទៅសមាគមអ្នកសាងសង់កម្ពុជា លោក ជីវ ស៊ីវផេង បានប្រាប់ ភ្នំពេញ ប៉ុស្តិ៍ថា ការធ្លាក់ចុះចំនួនប្រាក់នាំចូលដែក និងស៊ីម៉ងត៍ក្នុងឆ្នាំ ២០២០ គឺជាប់ទាក់ទងផ្ទាល់ទៅនឹងការឆ្លងរាលដាលជំងឺកូវីដ ១៩ ដែលបានបង្ខំឱ្យការដ្ឋានមួយចំនួនមិនអាចដំណើរការលឿនទៅមុខបានដូចការគ្រោងទុក។
ទីផ្សារនេះ នឹងមានសម្ទុះឡើងវិញលុះត្រាតែស្ថានភាពការឆ្លងរាលដាលជំងឺកូវីដ ១៩ អាចគ្រប់គ្រងបានទាំងស្រុង ដោយពេលនោះការបោះទុនវិនិយោគលើវិស័យសំណង់ប្រាកដជានឹងស្ទុះឡើងវិញ។
លោកប្រាប់ថា៖ «ពេលសកម្មភាពសាងសង់ធ្លាក់ចុះ គ្រប់សម្ភារដែលទ្រទ្រង់ក្នុងវិស័យសំណង់នឹងធ្លាក់ចុះដូចគ្នា។ សូម្បីតែទុនវិនិយោគវិស័យសំណង់ដែលក្រសួងរៀបចំដែនដី អនុម័តក្នុងឆ្នាំ ២០២០ ក៏បង្ហាញពីសញ្ញាអវិជ្ជមានដែរធៀបនឹងឆ្នាំ ២០១៩»។
ជាមួយគ្នានេះលោក ស៊ីវផេង ក៏បានលើកឡើងដែរថា សម្រាប់ការធ្លាក់ចុះទឹកប្រាក់ពីនាំចូលស៊ីម៉ងត៍ដែលមានទំហំជិត ៥០ ភាគរយនោះ គឺដោយសារការផលិតស៊ីម៉ងត៍នៅកម្ពុជាកើនឡើងជាបន្តបន្ទាប់។
អគ្គលេខាធិការសមាគមឧស្សាហកម្មស៊ីម៉ងត៍កម្ពុជា លោក ពុត ចន្តារិទ្ធ កាលពីខែកុម្ភៈបានប្រាប់ ភ្នំពេញ ប៉ុស្តិ៍ថា ទោះការឆ្លងរាលដាលជំងឺកូវីដ ១៩ បន្តអូសបន្លាយពេលជាង ១ ឆ្នាំ ក៏ការផលិតស៊ីម៉ងត៍របស់រោងចក្រទាំង ៥ នៅកម្ពុជាកាលពីឆ្នាំ ២០២០ មិនបានធ្លាក់ចុះឡើយ។
តាមទិន្នន័យក្នុងឆ្នាំ ២០២០ កម្ពុជាផលិតស៊ីម៉ងត៍បានសរុប ៧,៩ លានតោន កើនឡើង ៧ ភាគរយ ធៀបនឹងឆ្នាំ ២០១៩។
លោកបន្ថែមថា ជាមួយនឹងស្ថានភាពកាន់តែប្រសើរនៃការចាក់វ៉ាក់សាំងប្រឆាំងកូវីដ ១៩ លោករំពឹងថា ការផលិតស៊ីម៉ងត៍នៅកម្ពុជាក្នុងឆ្នាំនេះ នឹងមានកំណើនលើសឆ្នាំ ២០២០។
លោកបន្ថែមថា៖ «កំណើនផលិតផលក្នុងស្រុកនឹងដើរតួនាទីសំខាន់ដើម្បីជំនួសការនាំចូល ខណៈបច្ចុប្បន្នកម្ពុជានៅមាននាំចូលស៊ីម៉ងត៍ពីប្រទេសវៀតណាម ថៃ និងចិន»។ ផលិតផលក្នុងស្រុក គឺជាចំណែកលើកស្ទួយកំណើនសេដ្ឋកិច្ចជាតិ»។
លោក សួន រិទ្ធី ប្រធានផ្នែកទីផ្សារនៃក្រុមហ៊ុននាំចូលដែក PEB Steel បានប្រាប់ថា ការលក់របស់ក្រុមហ៊ុន PEB Steel កាលពីឆ្នាំ ២០២០ បានធ្លាក់ចុះបន្តិចបន្តួច ព្រោះក្តីបារម្ភពីការឆ្លងរាលដាលជំងឺកូវីដ ១៩ បានធ្វើឱ្យការសាងសង់មួយចំនួនផ្អាកសកម្មភាព។ តម្រូវការដែកនឹងកើនឡើងវិញនៅពេលជំងឺកូវីដ ១៩ បញ្ចប់។ លោកបន្តថា ក្រៅពីការចាប់ផ្តើមបង្កើនល្បឿនសាងសង់ឡើងវិញក៏នឹងមានគម្រោងថ្មីៗចាប់ផ្តើមផងដែរ។
លោកអះអាងថា៖ «កំណើននៃការនាំចូលដែកពីបរទេសមកកម្ពុជា នឹងហក់ឡើងវិញអាស្រ័យថា តើពេលណាជំងឺកូវីដ ១៩ អាចគ្រប់គ្រងបាន»។
របាយការណ៍ក្រសួងរៀបចំដែនដីឱ្យដឹងថា ទុនវិនិយោគវិស័យសំណង់ក្នុងរយៈពេល ៩ ខែ ឆ្នាំ ២០២០ មាន ៥ ៨៦៨ លានដុល្លារ ថយចុះ ៩,៦ ភាគរយពី ៦ ៤៩៤ លានដុល្លារនារយៈពេលដូចគ្នាឆ្នាំ ២០១៩៕LA
