ភ្នំពេញៈ ការបន្តអូសបន្លាយពេលការឆ្លងរាលដាលជំងឺកូវីដ ១៩ បានធ្វើឱ្យទីផ្សារជួលលក់រាយ (Retail) នៅភ្នំពេញក្នុងត្រីមាសទី១ ឆ្នាំ ២០២១ បានបង្ហាញសញ្ញាអវិជ្ជមានជាបន្តបន្ទាប់ទាំងតម្លៃជួល អត្រាប្រើប្រាស់ និងអតិថិជន។ នេះបើតាមក្រុមហ៊ុនអចលនទ្រព្យ CBRE Cambodia។
របាយការណ៍ស្រាវជ្រាវរបស់ CBRE Cambodia ដែលភ្នំពេញប៉ុស្តិ៍ទទួលបានកាលពីថ្ងៃ ៧ ខែមេសា បានឱ្យដឹងថា ក្នុងត្រីមាសទី១ ឆ្នាំ ២០២១ មានគម្រោងកន្លែងជួលសម្រាប់លក់រាយ (Retail Project) ចំនួន ៤ បានបញ្ចប់ការសាងសង់ និងដាក់ចូលទីផ្សារ ដែលធ្វើឱ្យផ្ទៃក្រឡាកន្លែងលក់រាយក្នុងក្រុងភ្នំពេញកើនដល់ជិត ៥០ ម៉ឺនម៉ែត្រការ៉េ។
កំណើននៃការដាក់ចូលទីផ្សារនេះបានធ្វើឱ្យតម្លៃជួលមានការប្រែប្រួលខ្លះដូចជា កន្លែងជួលលក់រាយប្រភេទ Prime High Street (ហាងលក់ទំនិញតាមផ្លូវធំៗ) បច្ចុប្បន្នមានតម្លៃជួលមធ្យម ២៣,៦១ ដុល្លារ ក្នុង ១ ម៉ែត្រការ៉េរយៈពេល ១ ខែ ធ្លាក់ចុះ ១០ ភាគរយ បើធៀបត្រីមាសទី៤ ឆ្នាំ ២០២០ ប្រភេទ Prime Shopping Mall និង Prime Retail Podium មានតម្លៃនៅថេរ គឺ ២៨,៤៦ ដុល្លារ និង ២៤,៥០ ដុល្លារ និងប្រភេទ Community Mall តម្លៃ ២២,៣១ ដុល្លារ កើនឡើង ៤,២ ភាគរយ។
របាយការណ៍ឱ្យដឹងទៀតថា ក្នុងត្រីមាសទី១ អត្រាប្រើប្រាស់កន្លែងជួលលក់រាយធ្លាក់ចុះ ៨,៦ ភាគរយមកនៅត្រឹម ៧៤,៩ ភាគរយ ខណៈចំនួនអ្នកទិញទំនិញនៅកន្លែងលក់រាយធ្លាក់ចុះយ៉ាងច្រើន។
អ្នកនាង គឹម គិនកេសា អ្នកគ្រប់គ្រងជាន់ខ្ពស់នៃក្រុមហ៊ុន CBRE Cambodia បានប្រាប់ថា នៅដើមឆ្នាំ ២០២១ ទីផ្សារ Retail ក្នុងរាជធានី-ភ្នំពេញមិនល្អទេ ជាពិសេសបន្ទាប់ពីមានព្រឹត្តិការណ៍សហគមន៍ ២០ កុម្ភៈ ដែលធ្វើឱ្យការជួល អត្រាប្រើប្រាស់ និងការចេញចូលរបស់អតិថិជនធ្លាក់ចុះយ៉ាងគំហុក។
ការធ្លាក់ចុះនេះនឹងអាចអូសបន្លាយពេលយូរទៅមុខបន្ថែមទៀត។ អ្នកនាងបន្តថា យោងតាមទិន្នន័យរបស់ Google Mobility Tracker ការចេញចូល Retail របស់អតិថិជននៅក្នុងពាក់កណ្តាលខែមីនា ឆ្នាំនេះបានធ្លាក់រហូតដល់ ៤៧ ភាគរយបើធៀបទៅនឹងត្រីមាសទី១ ឆ្នាំ ២០២០។ ចំនួននេះកើនឡើងពីជាង ២០ ភាគរយនៅមុនពេលមានព្រឹត្តិការណ៍សហគមន៍ ២០ កុម្ភៈ។
អ្នកនាងថ្លែងថា៖ «តាមការព្យាករទីផ្សារ Retail នឹងបន្តរងឥទ្ធិពលអវិជ្ជមានបន្តទៀតក្នុងត្រីមាសទី២ នេះ បន្ទាប់ពីការដាក់ចេញវិធានការមួយចំនួនរបស់រដ្ឋាភិបាលដើម្បីទប់ស្កាត់ការឆ្លងរាលដាលជំងឺកូវីដ១៩។ យ៉ាងណាមិញ វិធានការទាំងនេះវាពិតជាមានសារៈសំខាន់ណាស់នៅក្នុងការបញ្ឈប់ការឆ្លងរាលដាលក្នុងសហគមន៍លើកនេះទាំងស្រុង ដើម្បីចៀសវាងផលប៉ះពាល់រយៈពេលវែងក្នុងវិស័យផ្សារលក់រាយនៅកម្ពុជា»។
លោក សំ សុខនឿន ប្រធានសមាគមអចលនទ្រព្យសកលបានប្រាប់ថា តាំងពីមានការផ្ទុះឡើងជំងឺកូវីដ ១៩ ស្ថានភាពទីផ្សារ Retail នៅកម្ពុជាមិនមានភាពល្អប្រសើរទេ ប៉ុន្តែអ្វីដែលធ្វើឱ្យកាន់តែអាក្រក់បន្ថែមទៀតនោះ គឺការផ្ទុះឡើងនៃព្រឹត្តិការណ៍សហគមន៍ ២០ កុម្ភៈ ដែលធ្វើឱ្យចលនានៃការជួលទីតាំងលក់ទំនិញធ្លាក់ចុះយ៉ាងគំហុក។ ការធ្លាក់ចុះនេះអាចនឹងត្រូវប្រើពេលយូរបើការឆ្លងរាលដាលនៅតែមាន ហើយការចាក់វ៉ាក់សាំងមិនទាន់បានច្រើនដល់ប្រជាជន។
លោកបានបន្ថែមថា៖ «ទីផ្សារនេះនឹងមានភាពល្អប្រសើរឡើងវិញនៅពេលណាដែលជំងឺកូវីដ ១៩ អាចគ្រប់គ្រងបាន ហើយនៅពេលនោះមិនត្រឹមតែអតិថិជនក្នុងស្រុកទេ សូម្បីភ្ញៀវទេសចរបរទេសមកកម្ពុជាក៏នឹងមានច្រើនឡើងវិញ ដែលនឹងធ្វើឱ្យ Retail ស្ទុះងើបឡើងវិញ»។
បើយោងតាម CBRE Cambodia គម្រោង ៤ ដែលដាក់ចូលក្នុងទីផ្សារក្នុងត្រីមាសទី១ រួមមាន The Green Avenue Sen Sok ទំហំ ៦ ៨៦៤ ម៉ែត្រការ៉េ, TK Central Toul Kork ទំហំ ៣ ៥៤០ ម៉ែត្រការ៉េ, View Park Mail Daun Penh ទំហំ ៥ ៤៨៥ ម៉ែត្រការ៉េ និង Boeung Snor Food Village Chbar Ampov ទំហំ ១២ ០០០ ម៉ែត្រការ៉េ៕ LA