ភ្នំពេញៈ អគារ «Financial building» ដែលមានតម្លៃសាងសង់ប្រមាណ ៥០ លានដុល្លារ នៅក្នុងគម្រោងអភិវឌ្ឍន៍ទីក្រុង Olympia City របស់ក្រុមហ៊ុន OCIC បានបើកការដ្ឋានសាងសង់ហើយកាលពីដើមខែកុម្ភៈកន្លងមកដោយគ្រោងនឹងបញ្ចប់ក្នុងឆ្នាំ ២០២៤។
«Financial building» ដែលមានទីតាំងជាប់របងពហុកីឡដ្ឋានជាតិអូឡាំពិកកម្ពុជានឹងសាងសង់ឡើងជាលក្ខណៈអគារប្រើប្រាស់ចម្រុះមានដូចជា ហាងលក់ទំនិញ ភោជនីយដ្ឋាន និងមន្ទីរសម្រាកព្យាបាលជាដើម។ អគារនេះនឹងចែកចេញជា ២៧ ល្វែងដោយល្វែងនីមួយៗមានទទឹង ៨,២ ម៉ែត្រ បណ្តោយ ២៤ ម៉ែត្រ និងមានមួយចំនួនកម្ពស់ ១០ ជាន់ និងខ្លះទៀតកម្ពស់ ៨ ជាន់ ចំណែកនៅក្រោមដី ១ ជាន់ (លក្ខណៈឯកជន) និងចំនួន ២ ជាន់ទៀតប្រើប្រាស់ជាចំណតរួម។
លោក ម៉េង ចំរើន ប្រធានគ្រប់គ្រងនៃគម្រោង Olympia City បានប្រាប់ ភ្នំពេញ ប៉ុស្តិ៍ នាថ្ងៃទី ២៤ ខែមីនាថា ទោះបីជាស្ថានភាពនៃការរីករាលដាលជំងឺកូវីដ ១៩ កំពុងបន្តរីករាលដាលខ្លាំងនៅកម្ពុជា ក៏សកម្មភាពសាងសង់នៅក្នុងគម្រោងអភិវឌ្ឍន៍ Olympia City មិនបានផ្អាកសកម្មភាពនោះទេ។
ជាក់ស្តែងកាលពីដើមខែកុម្ភៈនេះ ក្រុមហ៊ុនបានចាប់ផ្តើមសង់អគារដ៏ទំនើបមួយទៀតមានឈ្មោះថា «Financial building»។ លោកបន្តថា អគារនេះនឹងមានលក្ខណពិសេស ព្រោះគ្រាន់តែការសាងសង់ ក្រុមហ៊ុនគ្រោងនឹងចំណាយប្រមាណ ៥០ លានដុល្លារ ខណៈតម្លៃដីមិនត្រូវបូកបញ្ចូលនោះទេ។
លោកបានប្រាប់ថា៖ «តម្រូវការទីផ្សារបានជំរុញឱ្យក្រុមហ៊ុន OCIC ធ្វើការសាងសង់អគារ Financial building ឡើង។ អគារនេះនឹងមានលក្ខណពិសេស ព្រោះវាត្រូវរចនាឡើងសម្រាប់ការប្រើប្រាស់ចម្រុះ»។
លោកបន្ថែមថា អគារនេះនឹងមានបំពាក់នូវជណ្តើរយន្ត ឧបករណ៍បង្ការគ្រោះអគ្គិភ័យ និងប្រព័ន្ធសុវត្ថិភាពជាច្រើន។ តាមផែនការ ការសង់អគារនេះអាចនឹងត្រូវការពេលសរុប ចំនួន ៤២ ខែ។
ទាក់ទងការអភិវឌ្ឍទីក្រុង Olympia City ទាំងមូលលោក ចំរើន បានប្រាប់ថា ក្នុងការដ្ឋានគម្រោង Olympia City ទាំងមូល បច្ចុប្បន្នមានក្រុមកម្មករប្រមាណជាង ២០០ នាក់ជារៀងរាល់ថ្ងៃ។ ចំនួននេះទាបជាងមុនបន្តិច ដោយសារក្រុមហ៊ុនចង់ចូលរួមជាមួយរដ្ឋាភិបាលក្នុងការទប់ស្កាត់ការឆ្លងរាលដាលជំងឺកូវីដ១៩ ដែលកំពុងកើនឡើងខ្ពស់នៅក្នុងព្រឹត្តិការណ៍សហគមន៍ ២០ កុម្ភៈ។
Olympia City គឺជាគម្រោងវិនិយោគដ៏ធំមួយរបស់ក្រុមហ៊ុន OCIC ស្ថិតនៅភាគខាងជើងនៃពហុកីឡដ្ឋានជាតិអូឡាំពិកលើផ្ទៃដីជាង ៧ ហិកតា។ នៅក្នុងគម្រោងនេះមានអគារសរុប ១២ ដែលរួមមានអគារខុនដូ ផ្សារទំនើប អគារពាណិជ្ជកម្ម អគារការិយាល័យ និងសណ្ឋាគារជាដើម។ ចាប់ផ្តើមសាងសង់នៅក្នុងអំឡុងឆ្នាំ ២០១២ បច្ចុប្បន្នមានអគារខុនដូចំនួន ៤ អគារការិយាល័យចំនួន ២ សណ្ឋារគារ ចំនួន ១ សាលារៀន ចំនួន ១ និងផ្សារទំនើបចំនួន ១ បានបញ្ចប់ការសាងសង់ និងបើកដំណើរការហើយ។
លោក សំ សុខនឿន ប្រធានសមាគមអចលនទ្រព្យសកលបានប្រាប់ថា Olympia City គឺជាគម្រោងដែលមានទីតាំងល្អបំផុតក្នុងរាជធានីភ្នំពេញ និងទទួលបានជោគជ័យជាបន្តបន្ទាប់មកដល់ពេលនេះ។ នៅក្នុងគម្រោង Olympia City មានសេវាកម្មចម្រុះជាច្រើនដែលបង្កនូវភាពងាយស្រួលសម្រាប់ការរស់នៅ និងធ្វើការ។ លោកបន្ថែមថា ម្យ៉ាងទៀតតម្លៃទិញ លក់ និងជួលក៏មិនមានកម្រិតខ្ពស់នោះទេ បើធៀបនឹងគម្រោងមួយចំនួនទៀត។
លោកអះអាងថា៖ «លក្ខណៈអំណោយផលនៃទីតាំងនៅចំកណ្តាលក្រុង គឺជាចំណែកយ៉ាងសំខាន់ធ្វើឱ្យគម្រោងនេះទទួលបានការគាំទ្រពីអតិថិជនគ្រប់ស្រទាប់»។
លោកលើកឡើងទៀតថា Olympia City ដោយសារនៅជាប់ជាមួយពហុកីឡដ្ឋានជាតិ Olympia City ក៏ជាកន្លែងមានខ្យល់អាកាសល្អផងដែរ។
យោងតាមអគ្គនាយករងក្រុមហ៊ុន OCIC លោក ទូច សំណាង ក្នុងគម្រោង Olympia City ទាំងមូលក្រុមហ៊ុន OCIC គ្រោងចំណាយប្រាក់ប្រហែល ៥០០ លានដុល្លារលើផ្នែកសាងសង់៕ LA