មណ្ឌលគិរី៖ ជនជាតិដើមភាគតិចព្នងចំនួន ៥ នាក់ ត្រូវបានស្នងការនគរបាលខេត្តមណ្ឌលគិរី កោះហៅឲ្យចូលបំភ្លឺនៅស្នងការដ្ឋានខេត្តនៅថ្ងៃទី ៣ ឧសភា ក្នុងបទល្មើសព្រហ្មទណ្ឌកម្រិតស្រាល តាមបណ្តឹងរបស់ពលរដ្ឋម្នាក់ដែលអះអាងជាម្ចាស់ដី ហើយបានចោទពលរដ្ឋទាំងនោះថា បានសាងសង់សំណង់លើដីរបស់ខ្លួន។
តាមលិខិតកោះហៅចំនួន ៥ ច្បាប់ផ្សេងគ្នា ចុះថ្ងៃទី ៣០ មេសា របស់ការិយាល័យកណ្តាលនគរបាលយុត្តិធម៌នៃស្នងការដ្ឋានខេត្តមណ្ឌលគិរី បុគ្គលដែលត្រូវបានសមត្ថកិច្ចកោះហៅ គឺមានឈ្មោះ រឿង ហែង ឈ្មោះ ណើល រិទ្ធិ ឈ្មោះ ខ្វាន់ តៃ ឈ្មោះ ខ្វែវ ស្រៀប និងឈ្មោះ មីង វិខ្លើយ មានលំនៅឋានស្ថិតក្នុងភូមិពូលូង សង្កាត់រមនា ក្រុងសែនមនោរម្យ។
លិខិតកោះហៅនោះបញ្ជាក់ថា៖ «ចូលមកកាន់ការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តមណ្ឌលគិរីនៅថ្ងៃទី ៣ ខែឧសភា វេលាម៉ោង ៨ ព្រឹក ដើម្បីមកបំភ្លឺលើពាក្យបណ្តឹងចុះថ្ងៃទី ២៨ ខែមេសា»។
លោក សូ សុវណ្ណ ស្នងការរងនគរបាលទទួលផែនព្រហ្មទណ្ឌនៃស្នងការដ្ឋាននគរបាលខេត្តមណ្ឌលគិរីប្រាប់ ភ្នំពេញ ប៉ុស្តិ៍ នៅថ្ងៃទី ២ ឧសភា ថា ការកោះហៅពលរដ្ឋ ៥ នាក់នោះ គឺយោងតាមបណ្តឹងរបស់ភាគីម្ខាងទៀត ដែលជាម្ចាស់ដីទំហំ ២ ហិកតាកន្លះ ស្ថិតក្នុងភូមិពូលូង។
លោកបន្តថា ដើមបណ្តឹងបានពាក់ពាក្យបណ្តឹងប្តឹងពលរដ្ឋទាំង ៥ នាក់ ពីបទកាន់កាប់លើដីមានម្ចាស់កម្មសិទ្ធិ ដោយថែមទាំងបានសាងសង់សំណង់លើដីនោះទៀតផង ពីអំឡុងខែមីនា ឆ្នាំ ២០២១។
លោកបញ្ជាក់ថា៖ «យើងកោះអញ្ញើញគាត់មកនេះ គឺដើម្បីសាកសួរថា គាត់បានសាងសង់លើដីនេះ មានឯកសារសំអាងអ្វីខ្លះ? នេះបើយោងតាមពាក្យបណ្តឹងដែលម្ចាស់ដីគាត់ធ្វើរោងបាន ៣ ខ្នង ដែលយើងចង់ដឹងពីមូលហេតុ ហើយបើដីនោះមិនមែនជាដីរបស់គាត់ទេ យើងគ្រាន់តែឲ្យគាត់បញ្ឈប់ការសាងសង់ទៅ។ ប៉ុន្តែជាក់ស្តែងយ៉ាងណាទៀត គឺអាស្រ័យលើការបំភ្លឺរបស់ពួកគាត់»។
ទោះយ៉ាងណា លោកមិនបានបញ្ជាក់ទេថា ភាគីម្ខាងដែលប្តឹងពលរដ្ឋ និងបានអះអាងថា ជាម្ចាស់ដីនេះ ជានរណា ដោយគ្រាន់តែបញ្ជាក់ថា ដើមបណ្តឹង គឺមានឯកសារទិញលក់ និងឯកសារទទួលស្គាល់ថា ជាម្ចាស់ដីពីអាជ្ញាធរមានសមត្ថកិច្ច។
អ្នកស្រី រឿង ហែង ជាពលរដ្ឋម្នាក់ក្នុងចំណោមពលរដ្ឋ ៥ នាក់ ដែលត្រូវបានសមត្ថកិច្ចកោះហៅឲ្យចូលបំភ្លឺបានប្រាប់ ភ្នំពេញ ប៉ុស្តិ៍ នៅថ្ងៃទី ២ ឧសភាថា ការចោទប្រកាន់មកពលរដ្ឋទាំង ៥ នាក់ គឺជារឿងអយុត្តិធម៌ ព្រោះពលរដ្ឋទាំងអស់គ្រាន់តែធ្វើអ្វីទៅតាមជំនឿ នៅលើដីសហគមន៍ជនជាតិដើមភាគតិច ដែលធ្លាប់បានប្រារព្ធជាយូរឆ្នាំមកហើយ។
អ្នកស្រីថា ដីចំនួន ២ ហិកតាកន្លះនេះ គឺជាដីនៅលើភ្នំរដាង ដែលជាកន្លែងជំនឿសាសនារបស់ប្រជាសហគមន៍ជនជាតិដើមភាគតិចព្នង ដែលតែងតែទៅគោរពបូជា។
អ្នកស្រីអះអាងថា ការដែលពលរដ្ឋទៅសាងសង់សំណង់លើភ្នំនេះ គឺគ្រាន់តែជាផ្នែកមួយរបស់ប្រជាសហគមន៍ក្នុងការប្រារព្ធតាមជំនឿ ដោយការធ្វើខ្ទមអ្នកតា និងផ្ទះបុរាណ ខណៈលើភ្នំនេះ មានកន្លែងជំនឿសាសនាជាច្រើន។
អ្នកស្រីបញ្ជាក់ថា៖ «អ្នកដែលទិញភ្នំនេះ គាត់ចង់ចែកភ្នំនេះ ជា ២ ដែលវាមិនអាចធ្វើបាននោះទេ។ ព្រោះភ្នំនេះ គឺជាកន្លែងជំនឿរបស់សហគមន៍យើង ដែលយើងតែងតែធ្វើពិធីសាសនានានា។ ដោយសារតែមានការឃុបឃិតលួចលក់ និងមានការឈូសឆាយ ដូច្នេះយើងចង់ថែរក្សា ទំនៀមទម្លាប់របស់យើង កុំឲ្យពួកគាត់ទន្រ្ទានទៀត»។
បើតាមអ្នកស្រី រឿង ហែង នៅថ្ងៃទី ៣ ឧសភា ពលរដ្ឋទាំង ៥ នាក់ នឹងចូលទៅបំភ្លឺតាមការកោះហៅរបស់សមត្ថកិច្ច ដោយរំពឹងថា អាជ្ញាធរនឹងផ្តល់យុត្តិធម៌ដល់សហគមន៍វិញផងដែរ ហើយជនខិលខូចដែលបានលួចលក់ភ្នំនេះ នឹងត្រូវទទួលទោសតាមច្បាប់។
លោក គ្រើង តុលា អ្នកប្រឹក្សាបណ្ដាញសហគមន៍ជនជាតិដើមភាគតិចខេត្តមណ្ឌលគិរីលើកឡើងថា ការកោះហៅពលរដ្ឋតាមពាក្យបណ្តឹងនេះ គឺជារឿងត្រឹមត្រូវតាមផ្លូវច្បាប់របស់មន្ត្រីយុត្តិធម៌។
ប៉ុន្តែលោក ស្នើដល់មន្ត្រីយុត្តិធម៌គួរតែផ្តល់យុត្តិធម៌ជូនប្រជាពលរដ្ឋដែលការពារសម្បត្តិរបស់រដ្ឋ ព្រោះព្រៃ និងភ្នំនេះ គឺជាសម្បត្តិរួម ដោយមិនមែនជាសម្បត្តិរបស់បុគ្គលណាម្នាក់ ដែលអាចទិញលក់បានតាមចិត្តនោះទេ។
លោកបញ្ជាក់ថា៖ «អាជ្ញាធរគួរតែសិក្សាពីប្រវត្តិភ្នំនេះ ព្រោះភ្នំនេះ គឺជាជំនឿរបស់ប្រជាពលរដ្ឋទូទៅ ហើយអ្នកដែលលួចលក់ភ្នំនេះ គឺគាត់ដឹងថា ភ្នំនេះ គឺភ្នំជំនឿដែរ ប៉ុន្តែគាត់នៅតែបំពាន។ ដូច្នេះ គួរណាស់តែអាជ្ញាធរហ្នឹង កោះហៅអ្នកដែលលក់នេះ មកផ្តន្ទាទោសតាមផ្លូវច្បាប់ ព្រោះជាតិសាសន៍យើងនីមួយៗ គឺតែងតែមានជំនឿហើយមានវប្បធម៌»។
លោក គ្រើង តុលា បន្តថា ចំពោះការកាត់ក្តីលើករណីនេះ គួរណាស់តែជនខិលខូចទទួលទោសតាមច្បាប់ ហើយពលរដ្ឋដែលចូលរួមការពារសម្បត្តិរួមរបស់រដ្ឋ គួរតែទទួលបានការការពារតាមផ្លូវច្បាប់៕