.jpg)
ផែនទីកំណត់ទីតាំងភូមិសាស្រ្តតំបន់ លឿង លឿងទុំ ចេញដោយរដ្ឋបាលខេត្តកណ្ដាល។ រូបថត រដ្ឋបាលខេត្តកណ្ដាល
ភ្នំពេញ៖ រដ្ឋបាលខេត្តកណ្តាលបានបន្តអនុវត្តការកំណត់ភូមិចំនួន ៥ ក្នុងឃុំចំនួន ២ ក្នុងស្រុកអង្គស្នួលជាតំបន់«លឿងទុំ» និងតំបន់ «លឿង» ក្នុងរយៈពេល ៧ ថ្ងៃ ដើម្បីទប់ស្កាត់ការឆ្លងរាលដាលនៃជំងឺកូវីដ ១៩។
លិខិតរបស់អភិបាលខេត្តកណ្ដាល លោក គង់ សោភ័ណ្ឌ ចុះថ្ងៃទី ២១ ខែឧសភានេះ បានសម្រេចអនុវត្តវិធានការរដ្ឋបាលសម្រាប់ភូមិស្វាយជ្រុំ ភូមិអណ្ដូង ភូមិពងទឹក ភូមិត្នោតម្ពើម ស្ថិតក្នុងឃុំបែកចាន និងភូមិព្រៃពពេល ស្ថិតក្នុងឃុំពើក ស្រុកអង្គស្នួល និងត្រូវកំណត់ជា «តំបន់លឿងទុំ» និង «តំបន់លឿង» គិតចាប់ពីម៉ោងសូន្យថ្ងៃទី ២២ ខែ ឧសភា ឆ្នាំ ២០២១ រហូតដល់ថ្ងៃទី ២៨ ខែ ឧសភា ឆ្នាំ ២០២១។
សេចក្តីសម្រេចបានបញ្ជាក់ថា «តំបន់លឿងទុំ» រួមមានផ្នែកខ្លះនៃភូមិស្វាយជ្រុំ និងផ្នែកខ្លះនៃភូមិអណ្ដូង (លើកលែងផ្នែកខ្លះដែលកំណត់ជាតំបន់លឿង) នៃឃុំបែកចាន ស្រុកអង្គស្នូល។ ដោយឡែក «តំបន់លឿងរួមមានភូមិពងទឹក ភូមិត្នោតម្ពើម ផ្នែកខ្លះនៃភូមិស្វាយជ្រុំ (ស្ថិតនៅប៉ែកខាងជើង ចាប់ពីផ្លូវចូលភូមិផ្នែកខាងកើត ជាប់ផ្លូវជាតិលេខ ៤) និងផ្នែកខ្លះនៃភូមិអណ្ដូង (ស្ថិតនៅប៉ែកខាងត្បូង ចាប់ពីផ្លូវបេតុង កែងនឹងដេប៉ូតេលា) នៃឃុំបែកចាន និងភូមិព្រៃពពេល នៃឃុំពើក ស្រុកអង្គស្នួល។
ក្រៅពីនេះ រដ្ឋបាលខេត្តកាលពីថ្ងៃទី ២១ ខែឧសភានេះ បានសម្រេចបិទខ្ទប់ភូមិសាស្រ្តផ្នែកខ្លះនៃភូមិព្រែកតារ័ត្ន និងភូមិពោធិ៍បាន ឃុំពោធិ៍បាន ស្ថិតក្នុងស្រុកកោះធំ និងត្រូវកំណត់ជា "តំបន់ក្រហម" និង "តំបន់លឿងទុំ" រយៈពេល ១៤ (ដប់បួន) ថ្ងៃ គិតចាប់ពីម៉ោងសូន្យ នាថ្ងៃទី ២១ ខែ ឧសភា ឆ្នាំ ២០២១ រហូតដល់ថ្ងៃទី ៣ ខែ មិថុនា ឆ្នាំ ២០២១ ដើម្បីទប់ស្កាត់ការឆ្លងរាលដាលនៃជំងឺកូវីដ ១៩។
សេចក្តីសម្រេចនេះបានគូសបញ្ជាក់ថា តំបន់ «ក្រហម» រួមមានផ្នែកខ្លះនៃភូមិពោធិ៍បាន និងភូមិព្រែកតារ័ត្ន ចាប់ពីផ្ទះ ជិន លី ដល់ផ្ទះ យ៉ត ថុល ដែលមានចំនួន ៨៥ ខ្នងផ្ទះ នៃឃុំពោធិ៍បាន ស្រុកកោះធំ។ រីឯតំបន់ «លឿងទុំ» វិញរួមមាន ផ្នែកខ្លះនៃភូមិព្រែកតារ័ត្ន ចាប់ពីផ្ទះឈ្មោះ សាំង ទ្រុប ដល់ផ្ទះឈ្មោះ ហុក សី ដែលមានចំនួន ៩៩ ខ្នងផ្ទះ និងផ្នែកខ្លះនៃភូមិពោធិ៍បាន ចាប់ពីផ្ទះឈ្មោះ សេន ស្មៀន ដល់ព្រំប្រទល់ផ្ទះឈ្មោះ ជិន លី មានចំនួន ៤០ ខ្នងផ្ទះ នៃឃុំពោធិ៍បាន ស្រុកកោះធំ។
ជាមួយគ្នានេះដែរ រដ្ឋបាលខេត្តក៏បានអនុញ្ញាតឲ្យដំណើរការអាជីវកម្មផ្សារគគីរដែលស្ថិតក្នុងឃុំគគីរ ស្រុកកៀនស្វាយឡើងវិញផងដែរ។
សាលាខេត្តបានសរសេរថា៖ «ក្នុងអំឡុងពេលដំណើរការអាជីវកម្មផ្សារតភីរឡើងវិញ បងប្អូនអាជីវករ និងសាធារណជនទូទៅ ត្រូវអនុវត្តឱ្យបានម៉ឺងម៉ាត់នូវវិធានការសុខាភិបាល រួមមាន ការពាក់ម៉ាស់ និងការរក្សាគម្លាតសុវត្ថិភាព ព្រមទាំងប្រកាន់ខ្ជាប់នូវការធ្វើអនាម័យ ដើម្បីសម្លាប់មេរោគ និងការវាស់កម្ដៅ ជាពិសេសអនុវត្តតាមវិធានការ “៣ ការពារ ៣ កុំ" របស់សម្តេចតេជោ នាយករដ្ឋមន្ត្រីជាចាំបាច់ ដើម្បីប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ ១៩»៕
វីដេអូ៖
