កណ្តាល៖ រដ្ឋបាលខេត្តកណ្តាល បានសម្រេចបន្តអនុវត្តវិធានការរដ្ឋបាលសម្រាប់ភូមិសាស្រ្តក្រុងតាខ្មៅ ដោយបានកំណត់ជាតំបន់តែពីរទេ គឺតំបន់លឿងទុំ និងតំបន់លឿង ដើម្បីទប់ស្កាត់ការឆ្លងរាលដាលនៃជំងឺកូវីដ ១៩ ដោយត្រូវអនុវត្តសម្រាប់រយៈពេល ៧ ថ្ងៃ គិតចាប់ពីថ្ងៃទី ១៣ ខែឧសភា រហូតដល់ថ្ងៃទី ១៩ ខែឧសភា។
លោក គង់ សោភ័ណ្ឌ អភិបាលខេត្តកណ្តាលបានបញ្ជាក់ថា តំបន់បិទខ្ទប់អគារវប្បធម៌ក្នុងភូមិសាស្ត្រភូមិតាខ្មៅ ២ នៃសង្កាត់តាខ្មៅ ក្រុងតាខ្មៅ ត្រូវប្រែក្លាយពីតំបន់ពណ៌ក្រហមមកជាតំបន់លឿងទុំវិញ ឯសម្រាប់តំបន់លឿង គឺត្រូវបានកំណត់លើភូមិសាស្រ្តសង្កាត់ដើមមៀន និងសង្កាត់តាខ្មៅនៃក្រុងតាខ្មៅ។
លោកបានឱ្យដឹងថា៖ «ក្នុងអំឡុងពេលនៃការអនុវត្តការបិទខ្ទប់ វិធានការដែលត្រូវអនុវត្តសម្រាប់ភូមិសាស្ត្រដែលត្រូវបានកំណត់ជាតំបន់លឿងទុំ គឺបុគ្គលគ្រប់រូបត្រូវបានហាមធ្វើដំណើរចេញពីលំនៅឋាន ឬទីសំណាក់បច្ចុប្បន្នរបស់ខ្លួន ប៉ុន្តែការធ្វើដំណើរចេញក្រៅពីលំនៅឋាន ឬទីសំណាក់បច្ចុប្បន្ន អាចត្រូវបានអនុញ្ញាតក្នុងករណីចាំបាច់ណាមួយ»។
សេចក្តីសម្រេចនេះ បានធ្វើការបញ្ជាក់ផងដែរ សម្រាប់អ្នកនៅក្នុងតំបន់លឿងទុំ ដែលអាចត្រូវបានអនុញ្ញាតឱ្យចេញក្រៅលំនៅឋានក្នុងករណីចាំបាច់ដូចជាការធ្វើដំណើរទៅប្រកបមុខរបរ ឬអាជីវកម្ម ឬបំពេញការងារក្នុងវិស័យឯកជន ដោយត្រូវមានលិខិតអនុញ្ញាតធ្វើដំណើរពីរដ្ឋបាលខេត្ត មានអត្តសញ្ញាណប័ណ្ណ និងលិខិតបញ្ជាក់ការងារដែលមានកំណត់ច្បាស់លាស់ពីឈ្មោះ មុខងារ និងប្រភេទអាជីវកម្មចេញដោយទីកន្លែងអាជីវកម្មពាក់ព័ន្ធ។
ការធ្វើដំណើរក្នុងគោលបំណងណាមួយ អាចធ្វើឡើងដោយសមាជិកយ៉ាងច្រើន ២ នាក់ ក្នុងមួយលំនៅឋាន ដោយមិនឱ្យលើសពី ៣ ដង ក្នុងមួយសប្តាហ៍ និងនៅទីតាំងដែលជិតបំផុតក្នុងរង្វង់ភូមិសាស្ត្រខ្លួនរស់នៅ។
ជាមួយគ្នានេះដែរ រាល់សកម្មភាពការងារ មុខរបរ ឬអាជីវកម្មទាំងអស់ ដែលមិនមែនជាតម្រូវការចាំបាច់ប្រចាំថ្ងៃ និងការជួបជុំ ឬការប្រមូលផ្តុំមនុស្សត្រូវហាមឃាត់ ប៉ុន្តែសកម្មភាពការងារ មុខរបរ ឬអាជីវកម្មអាចត្រូវបានអនុញ្ញាតក្នុងករណីចាំបាច់ប៉ុណ្ណោះ។
ចំពោះភូមិសាស្រ្តដែលត្រូវបានដាក់ក្នុងតំបន់លឿង រដ្ឋបាលខេត្តអនុញ្ញាតឱ្យមានការធ្វើចរាចរណ៍គ្រប់ប្រភេទនៅក្នុងតំបន់នេះប្រព្រឹត្តទៅជាធម្មតា។
លោក គង់ សោភ័ណ្ឌ បានលើកឡើងថា៖ «សកម្មភាពការងារ មុខរបរ និងអាជីវកម្មគ្រប់ប្រភេទនៅក្នុងតំបន់លឿង ត្រូវបានអនុញ្ញាតឱ្យបើកដំណើរការជាធម្មតា លើកលែងតែសាលារៀន រួមទាំងសាលាបណ្តុះបណ្តាលវិជ្ជាជីវៈទាំងរដ្ឋ និងឯកជន អាជីវកម្មក្លិបកម្សាន្តគ្រប់ប្រភេទ ហាងលក់ និងសេពគ្រឿងស្រវឹងគ្រប់ប្រភេទ ក្លិបហាត់ប្រាណ និងមជ្ឈមណ្ឌលកីឡា មិនទាន់ត្រូវបានអនុញ្ញាតឡើយ»។
លោកបានបន្តថា ចំពោះភោជនីយដ្ឋាន អាហារដ្ឋាន តូបអាហារ ហាងកាហ្វេ និងការលក់ដូរអាហារតាមរទេះ អាចប្រកបអាជីវកម្មលក់ដូរជាលក្ខណៈវេចខ្ចប់បាន ដោយមិនអនុញ្ញាតទទួលអតិថិជនឱ្យចូលមកអង្គុយទទួលទាន និងលើកទឹកចិត្តប្រើប្រាស់ការទូទាត់តាមប្រព័ន្ធអេឡិចត្រូនិក (Online)។
សកម្មភាពការងារ មុខរបរ និងអាជីវកម្មដែលបើកដំណើរការនេះ ត្រូវអនុវត្តវិធានការសុវត្ថិភាព ផ្នែកសុខាភិបាលឱ្យបានម៉ឺងម៉ាត់ជាអាទិ៍ កាតព្វកិច្ចពាក់ម៉ាស់ និងកាតព្វកិច្ចរក្សាគម្លាតសុវត្ថិភាពបុគ្គល និងត្រូវប្រកាន់ខ្ជាប់នូវការធ្វើអនាម័យ ដើម្បីសម្លាប់មេរោគ ការវាស់កម្តៅ និងការអនុវត្តវិធានការសុវត្ថិភាពផ្នែកសុខាភិបាលផ្សេងទៀត។
ទន្ទឹមនឹងនេះដែរ ចំពោះផ្សាររដ្ឋ និងទីតាំងលក់ដូរមិនរៀបរយត្រូវបានរដ្ឋបាលខេត្តកណ្តាល សម្រេចបន្តបិទរយៈពេល ៧ ថ្ងៃ បន្តទៀត រហូតដល់ថ្ងៃទី ១៩ ខែឧសភា ដែលជំនួសមកវិញនូវការប្រើប្រាស់ទីតាំងលក់ដូរបណ្តោះអាសន្ន ដែលរៀបចំឡើងដោយរដ្ឋបាលខេត្ត ដើម្បីទប់ស្កាត់ការឆ្លងរីករាលដាលនៃជំងឺកូវីដ ១៩។
ឯសេវាកម្មអ៊ុតសក់ កាត់ក្រចក តុបតែងមុខ និងកាត់សក់ ត្រូវបានបន្តផ្អាកជាបណ្តោះអាសន្នសម្រាប់រយៈពេល ៧ ថ្ងៃដូចគ្នាផងដែរ។
លោក គង់ សោភ័ណ្ឌ បានបញ្ជាក់ថា៖ «រដ្ឋបាលខេត្តកណ្តាល នឹងពិនិត្យសម្រេច រឹតត្បិត ឬហាមឃាត់ ឬផ្អាកជាបណ្តោះអាសន្ន សកម្មភាពការងារ មុខរបរអាជីវកម្ម និងទីកន្លែងផ្សេងទៀត ដោយយោងតាមតម្រូវការចាំបាច់ក្នុងការប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ ១៩»។
ជាមួយគ្នានេះ លោកអភិបាលខេត្តបានព្រមានថា បុគ្គល ឬនីតិបុគ្គលណាដែលបំពានវិធានការហាមឃាត់ការធ្វើដំណើរ វិធានការហាមឃាត់ សកម្មភាពការងារ មុខរបរ ឬអាជីវកម្ម និងវិធានការហាមឃាត់រាល់ការជួបជុំ ឬការប្រមូលផ្តុំមនុស្សក្នុងតំបន់លឿងទុំ និងតំបន់លឿង នឹងត្រូវអនុវត្តវិធានការច្បាប់យ៉ាងម៉ឺងម៉ាត់។
ដោយឡែក រដ្ឋបាលខេត្តកណ្ដាលក៏បានបន្តចេញសេចក្ដីណែនាំឱ្យផ្អាកលក់គ្រឿងស្រវឹងគ្រប់ប្រភេទ និងផ្អាកទទួលអតិថិជនឱ្យចូលមកទទួលទានក្នុងភោជនីយដ្ឋាន អាហារដ្ឋាន តូបអាហារ ហាងកាហ្វេ និងអាជីវកម្មដ្ឋានផ្នែកអាហារ-ភេសជ្ជៈគ្រប់ប្រភេទផងដែរ ដើម្បីទប់ស្កាត់ការឆ្លងរីករាលដាលជំងឺកូវីដ ១៩។
សេចក្តីប្រកាសកាលពីថ្ងៃទី ១២ ខែឧសភា បានលើកឡើងថា រាល់ការជួបជុំ ឬការប្រមូលផ្តុំមនុស្ស ដើម្បីសេពគ្រឿងស្រវឹងគ្រប់ប្រភេទត្រូវបានហាមឃាត់ ហើយបុគ្គលទាំងឡាយណាដែលបន្តលក់ដូរ ចែកចាយ និងចរាចរណ៍គ្រឿងស្រវឹងគ្រប់ប្រភេទក្នុងពេលនៃការហាមនេះ នឹងត្រូវបានអនុវត្តវិធានការរដ្ឋបាល និងវិធានការច្បាប់ជាធរមានផងដែរ៕
វីដេអូ៖