.jpg)
លោកឯកអគ្គរដ្ឋទូត W. Patrick Murphy ចូលរួមសិក្ខាសាលាស្តីពីជំនាញកិច្ចការការទូត តាមវីដេអូអនឡាញ កាលពីរសៀលថ្ងៃទី ២១ ឧសភា។ រូបថត U.S. Embassy Phnom Penh, Cambodia
ភ្នំពេញៈ ស្ថានទូតអាមេរិកប្រចាំកម្ពុជារួមនឹងមូលនិធិអាស៊ីប្រចាំកម្ពុជា និងវិទ្យាស្ថានជាតិការទូត និងទំនាក់ទំនងអន្តរជាតិ (NIDIR) នៃក្រសួងការបរទេស និងសហប្រតិបត្តិការអន្តរជាតិកម្ពុជា នៅថ្ងៃសុក្រនេះបានចាប់ផ្តើមសិក្ខាសាលារួមគ្នាមួយ ស្តីពីជំនាញកិច្ចការទូត ដើម្បីជំរុញការផ្លាស់ប្តូរមតិយោបល់ និងការអនុវត្តល្អៗ នៅក្នុងវិស័យគន្លឹះលើកិច្ចការការទូត។
អ្នកដឹកនាំមកពីអង្គការ ស្ថាប័នក្នុងវិស័យឯកជន ក្រុមអ្នកជំនាញផ្តល់ប្រឹក្សាស្ថាប័នទូត និងពហុភាគីបានចូលរួមជាមួយអ្នកការទូតវ័យក្មេងកម្ពុជាចំនួន ៣១ នាក់នៅក្នុងសិក្ខាសាលាប្រចាំសប្តាហ៍ដែលធ្វើឡើងតាមប្រព័ន្ធអនឡាញ។
សិក្ខាសាលានេះត្រូវធ្វើឡើងជាបន្តបន្ទាប់ចំនួន ៤ លើក ដើម្បីផ្លាស់ប្តូរទស្សនៈលើនិន្នាការសំខាន់ៗ ដូចជាមធ្យោបាយសម្រាប់ធ្វើការទាក់ទងជាមួយសាធារណជនបរទេស ដោយប្រើមធ្យោបាយសេដ្ឋកិច្ច ដើម្បីជំរុញផលប្រយោជន៍ជាតិ ពហុនិយម និងបន្ស៊ីគ្នានូវទិន្នន័យ និងព័ត៌មាន សម្រាប់អ្នកធ្វើគោលនយោបាយ។
លោក Patrick Murphy ឯកអគ្គរដ្ឋទូតសហរដ្ឋអាមេរិក ប្រចាំកម្ពុជាបានថ្លែងនៅក្នុងសុន្ទរកថា ទៅកាន់អ្នកការទូតកម្ពុជានៅក្នុងវិទ្យាស្ថាន NIDIR ថា៖ «បញ្ហាប្រឈមនៅក្នុងសកលលោក នាសម័យបច្ចុប្បន្ន មិនដែលធ្លាប់មានទេពីមុនមក ហើយសហគមន៍អន្តរជាតិពឹងលើអ្នកការទូត «ជំនាន់ក្រោយ» ហើយក្នុងការរកដំណោះស្រាយសម្រាប់បញ្ហាប្រឈមដ៏ស្មុគស្មាញទាំងនេះ»។
លោក ឆែម គាតរិទ្ធី រដ្ឋមន្ត្រីប្រតិភូអមនាយករដ្ឋមន្ត្រីបានមានប្រសាសន៍ថា៖ «សិក្ខាសាលានេះនឹងធ្វើឲ្យមានឱកាសរៀនសូត្រ និងចែករំលែកបទពិសោធគ្នាល្អ សម្រាប់អ្នកការទូតវ័យក្មេងកម្ពុជារបស់យើង ដើម្បីទទួលបានទស្សនៈថ្មីៗលើប្រធានបទនានា ដែលខ្ញុំជឿជាក់ថា នឹងធ្វើឲ្យអ្នកការទូតវ័យក្មេងកម្ពុជារបស់យើងមានចំណេះ និងជំនាញ ដែលគេត្រូវការ ដើម្បីធ្វើឲ្យខ្លួនគេរីកចម្រើនទៅមុខ នៅក្នុងពិភពលោកសព្វថ្ងៃ ដែលមានភាពស្មុគស្មាញ»។
ដោយឡែក លោកស្រី Meloney C. Lindberg តំណាងមូលនិធិអាស៊ីប្រចាំនៅកម្ពុជា មានប្រសាសន៍ថា៖ «នេះជាឱកាសពិសេសមួយ សម្រាប់ធ្វើការចែករំលែកទស្សនៈនានាលើប្រធានបទដែលមានសារៈសំខាន់នាពេលសព្វថ្ងៃនេះជាមួយអ្នកការទូតវ័យក្មេងកម្ពុជា និងជំរុញឲ្យមានការផ្លាស់ប្តូរគ្នា ដោយបើកចំហ និងដោយស្ថាបនា»។
គំនិតផ្តួចផ្តើម អាមេរិក-កម្ពុជា AmCam ២០២១ របស់ស្ថានទូតសហរដ្ឋអាមេរិក បញ្ជាក់ពីការខិតខំធ្វើ សហប្រតិបត្តិការរបស់សហរដ្ឋអាមេរិក និងប្រទេសកម្ពុជា ទាក់ទងនឹងវិបុលភាព សន្តិភាព គោលការណ៍ និង ភាពជាដៃគូ។
វិទ្យាស្ថាន NIDIR ត្រូវបានបង្កើតឡើងជាផ្លូវការ នៅឆ្នាំ ២០១៦ ជាគំនិតផ្តួចផ្តើមរបស់លោក ប្រាក់ សុខុន ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស នៅក្រោមឆ័ត្ររបស់ក្រសួងការបរទេស។
វិទ្យាស្ថាននេះមានបំណងកសាងសមត្ថភាពជំនាញអាជីពរបស់អ្នកការទូតវ័យក្មេងអាជីពកម្ពុជា តាមរយៈការអភិវឌ្ឍសមត្ថភាព ដើម្បីឲ្យពួកគេអាចបំពេញកិច្ចការទូតនៅក្នុងពិភពលោក ដែលកំពុងមានការពិបាកកាន់តែច្រើនឡើង និងជាពិសេស លើកកម្ពស់ការចូលរួម និងតួនាទីរបស់ប្រទេសកម្ពុជា នៅក្នុងកិច្ចការតំបន់៕
