មណ្ឌលគិរី៖ អភិបាលខេត្តមណ្ឌលគិរី លោក ស្វាយ សំអ៊ាង ជំរុញឲ្យមន្ត្រី និងអាជ្ញាធរដែនដីទប់ស្កាត់បទល្មើសព្រៃឈើ និងការកាប់ទន្រ្ទានយកដីព្រៃខុសច្បាប់ឱ្យមានប្រសិទ្ធភាព ខណៈសកម្មភាពទាំងនេះកាន់តែមានភាពផុលផុស។
លោក ស្វាយ សំអ៊ាង បានបើកកិច្ចប្រជុំនៅថ្ងៃទី ១១ ឧសភានេះ ដើម្បីចាត់តាំងក្រុមការងារ អនុវត្តវិធានការ ដែលមានស្រាប់ក្នុងការទប់ស្កាត់ និងបង្ក្រាបបទល្មើសព្រៃឈើ បទល្មើសធនធានធម្មជាតិ និងការកាប់ទន្រ្ទានយកដីព្រៃធ្វើកម្មសិទ្ធិដោយខុសច្បាប់។
កិច្ចប្រជុំនេះ មានការចូលរួមពីអភិបាលរងខេត្តទាំង ៦ រូប មេបញ្ជាការកងកម្លាំងប្រដាប់អាវុធទាំង ៣ ប្រភេទ ប្រធានមន្ទីរអង្គភាពពាក់ព័ន្ធ និងអភិបាល ក្រុង ស្រុកទាំង ៥។
លោក ជាក់ ម៉េងហ៊ាង អភិបាលរងខេត្តមណ្ឌលគិរីបានប្រាប់ ភ្នំពេញ ប៉ុស្តិ៍ នៅថ្ងៃទី ១១ ឧសភាថា៖ «ក្រុមការងារហ្នឹងគ្រាន់តែបំពេញបន្ថែមទេ ដើម្បីពង្រឹង ដោយសារយើងមានគណៈបញ្ជាការឯកភាពស្រុក និងខេត្តរួចហ្នឹង។ ប៉ុន្តែដោយសារការកាប់ទន្ទ្រានហ្នឹងកាន់តែផុលផុសខ្លាំង ចេះតែទៅកាប់លើដីអ៊ីចឹង។ អភិបាលខេត្តគាត់ពង្រឹងគណៈកម្មការ ៣ ទៀត ដែលមានតូចៗ ឱ្យទទួលខុសត្រូវស្រុកហ្នឹងជួយពង្រឹងបន្ថែម»។
លោកថ្លែងថា ក្រោយពីពង្រឹងបន្ថែមនេះ កាលណាមានការកាប់ទន្ទ្រានព្រៃឈើសកម្ម និងឃើញមានបទល្មើលជាក់ស្តែង អាជ្ញាធរនឹងឃាត់ខ្លួនជនល្មើសរឹបអូសយកវត្ថុតាង និងកសាងសំណុំរឿងបញ្ជូនទៅតុលាការ។
លោកថា កាលណាមានការកាប់ទន្ទ្រានយកដីព្រៃរួចហើយ អាជ្ញាធរនឹងមិនអនុញ្ញាតឱ្យមានការចូលទៅអាស្រ័យផល ឬសាងសង់ខ្ទមនៅលើដីដែលបានទន្ទ្រានយកនេះទេ។ អាជ្ញាធរនឹងស្រាវជ្រាវរកអ្នកដែលពាក់ព័ន្ធនឹងរឿងនេះ ដើម្បីកសាងសំណុំរឿងបញ្ជូនទៅតុលាការ។
លោក ម៉េងហ៊ាង ថ្លែងថា៖ «វាមានដូចជាព្រៃខៀវហ្នឹង វាមានយូរមកហើយដែលចូលទៅកាប់តិចតួចនោះ។ ប៉ុន្តែឥឡូវយើងទៅទាន់ហ្នឹងវាមានទ្រង់ទ្រាយធំគួរសម។ ត្រូវតែពង្រឹងហើយមិនឱ្យមានបន្តទៀត ហើយឱ្យគណៈបញ្ជាការឯកភាពស្រុកហ្នឹង គឺដឹកនាំកម្លាំងស្រាវជ្រាវមើលអ្នកណាដែលនៅពីក្រោយទន្រ្ទានយកដី»។
លោក គ្រើង តុលា អ្នកប្រឹក្សាយោបល់បណ្តាញសហគមន៍ជនជាតិដើមភាគតិចខេត្តមណ្ឌលគិរី ប្រាប់ ភ្នំពេញ ប៉ុស្តិ៍ នៅថ្ងៃទី ១១ ឧសភាថា បច្ចុប្បន្នបទល្មើសព្រៃឈើនៅខេត្តមណ្ឌលគិរី នៅតែបន្តកើតមានឡើងមិនចេះចប់ ដោយមានការដឹកឈើលួចលាក់តាមរយៈរថយន្តទំនើប។
លោកថ្លែងថា៖ «នៅខេត្តមណ្ឌលគិរី [ការអនុវត្តច្បាប់] បានតែភ្លើងចម្បើង។ អ៊ីចឹងការអនុវត្តច្បាប់នៅថ្នាក់មូលដ្ឋានជាភ្លើងចម្បើងមួយទេ។ វាមិនមែនជាការអនុវត្តច្បាប់ដែលត្រឹមត្រូវទេ ហើយឃើញថា បទល្មើសព្រៃឈើនៅតែកើតឡើង។ ការកាប់បំផ្លាញព្រៃឈើនៅតែកើតឡើង។ ប៉ុន្តែដល់ពេលប្រជាពលរដ្ឋកាប់ធ្វើស្រែធ្វើចម្ការ ដើម្បីចិញ្ចឹមគ្រួសារ គឺចាប់រាល់ថ្ងៃហ្មង»។
ខណៈចុះពិនិត្យមើលវឌ្ឍនភាពរបស់ក្រុមហ៊ុនផេស៊ីហ្វិចយ៉ញស្តុក កាលពីថ្ងៃទី ៩ ខែឧសភា លោក ស្វាយ សំអ៊ាង បានណែនាំឲ្យក្រុមហ៊ុននេះ ត្រូវធ្វើរបង ឬធ្វើផ្លូវព័ទ្ធ ជុំវិញដីសម្បទានសេដ្ឋកិច្ចដែលបានវិនិយោគ ឲ្យបានច្បាស់លាស់ ដើម្បីចៀសវាងមានការចូលកាប់ទន្រ្ទានយកដីធ្វើជាកម្មសិទ្ធិពីបុគ្គលមួយចំនួន។
លោកបានស្នើឲ្យក្រុមហ៊ុននីមួយៗ ត្រូវគោរពតាមគោលការណ៍របស់រាជរដ្ឋាភិបាល។
រដ្ឋបាលខេត្តមណ្ឌលគិរី បានបញ្ជាក់ក្នុងហ្វេសប៊ុកកាលពីថ្ងៃទី ៩ ខែឧសភាថា៖ «បន្ថែមលើនេះ ឯកឧត្តម [ស្វាយ សំអ៊ាង] បានណែនាំដល់សមត្ថកិច្ច និងអាជ្ញាធរដែនដីត្រូវសហការគ្នា ដើម្បីទប់ស្កាត់ និងបង្ក្រាបបទល្មើសធនធានធម្មជាតិឲ្យមានប្រសិទ្ធភាព៕