.jpg)
លោក គួច ចំរើន អភិបាលខេត្តព្រះសីហនុ ចុុះសំណេះសំណាលជាមួយបងប្អូនប្រជាពលរដ្ឋដែលបានមកសម្រាកព្យាបាលជំងឺកូវីដ ១៩ កាលពីម្សិលមិញ។ រូបថត រដ្ឋបាលខេត្តព្រះសីហនុ
ព្រះសីហនុ៖ អភិបាលខេត្តព្រះសីហនុ លោក គួច ចំរើន បន្តការបិទខ្ទប់ភូមិសាស្ត្រក្រុងព្រះសីហនុ នៃខេត្តព្រះសីហនុ និងត្រៀមអនុវត្តវិធានការរដ្ឋបាលបន្តរយៈពេល ១៤ ថ្ងៃទៀត ចាប់ពីថ្ងៃទី ១៣ ឧសភានេះ ប៉ុន្តែការបិទខ្ទប់តំបន់ក្រហមមិនមានបន្តទៀតទេ គឺបានបង្រួមមកត្រឹមតែតំបន់លឿងទុំ និងតំបន់លឿងតែប៉ុណ្ណោះ លើកលែងតែផ្ទះដែលមានសមាជិកមានជំងឺកូវីដ ១៩ គឺដាក់ជាទីតាំងក្រហមនៅឡើយ។
ក្នុងពេលចុះសំណេះសំណាលជាមួយប្រជាពលរដ្ឋដែលបានមកសម្រាកព្យាបាលជំងឺកូវីដ ១៩ នៅមន្ទីរពេទ្យសម័យថ្មីអន្តរជាតិ នាថ្ងៃទី ១៣ ឧសភា លោកប្រាប់អ្នកសារព័ត៌មានថា ការសម្រេចដកមិនមានតំបន់ក្រហមបន្តទៀតនេះ គឺដោយហេតុថា ក្នុងរយៈពេល ២០ ថ្ងៃកន្លងមកនេះ ចាប់ពីការបិទខ្ទប់លើកដំបូង និងការបន្តបិទខ្ទប់លើកទី២ ក្នុងរយៈពេល ៧ ថ្ងៃទៀតនេះ ក្រុមការងារបានប្រមូលយកសំណាកនៅតំបន់ក្រហម ហើយក៏បានបញ្ចប់ទាំងស្រុងនៅថ្ងៃទី ១៣ ឧសភានេះដែរ។
លោក គួច ចំរើន ថ្លែងថា៖ «ចំណុចនេះ អាចបញ្ជាក់ថា ក្រុមការងារខេត្តបានប្រមូលអ្នកវិជ្ជមានទាំងអស់មកទទួលការព្យាបាល ហើយអ្វីដែលជាតំបន់ក្រហមត្រូវបានដកចេញ។ ប៉ុន្តែទីតាំងផ្ទះ និងទីសំណាក់មួយចំនួនដែលរកឃើញអ្នកវិជ្ជមានកូវីដ ១៩ គឺនៅជាទីតាំងក្រហមនៅឡើយ។ ក្រុមការងារខេត្តបានចុះបិទឃ្លុំតែទីតាំងផ្ទះទាំងនោះតែប៉ុណ្ណោះ ដើម្បីកុំឱ្យមានការប៉ះពាល់ជាមួយទីតាំងផ្សេងទៀត»។
លោកអភិបាលខេត្តបន្តទៀតថា ដើម្បីកុំឱ្យប៉ះពាល់នឹងជីវភាព និងសិទ្ធិក្នុងការរស់នៅរបស់ប្រជាពលរដ្ឋ គឺរដ្ឋបាលខេត្តបានកាត់បន្ថយពីតំបន់ក្រហមឱ្យទៅនៅរួមតូចជាទីតាំងក្រហម គឺផ្ទះ ឬទីសំណាក់ដែលមានអ្នកវិជ្ជមាននឹងបន្តការគ្រប់គ្រងបន្ថែមទៀត។
ជាមួយគ្នានេះ លោកក៏បានកំណត់តំបន់លឿងទុំរយៈពេល ១៤ ថ្ងៃបន្តទៀត ប៉ុន្តែដោយបានបង្រួមឱ្យនៅតូច ដោយសារនៅមានអ្នកឆ្លង និងអ្នកប៉ះពាល់ផ្ទាល់មួយចំនួនដែលមិនទាន់ចេញរោគសញ្ញា។ ដូចនេះ ដើម្បីបញ្ជាក់ថា តំបន់នោះអស់អ្នកឆ្លង រដ្ឋបាលសម្រេចបន្តបិទខ្ទប់ និងដាក់ជាតំបន់លឿងទុំរយៈពេល ១៤ ថ្ងៃទៀត។
លោក គួច ចំរើន ថ្លែងថា៖ «ចំពោះការកំណត់តំបន់លឿង គឺបងប្អូនប្រជាពលរដ្ឋត្រូវបានអនុញ្ញាតឱ្យធ្វើដំណើរបាន ប៉ុន្តែគឺមានការហាមប្រាមមួយចំនួន ដូចជាការប្រមូលផ្តុំ ការធ្វើពិធីផ្សេងៗ សកម្មភាពកីឡាជាក្រុម និងបន្តបិទបម្រាមគោចរនៅពេលយប់»។
លោកថា ការគំរាមកំហែងធ្ងន់ធ្ងរនៅក្រុងព្រះសីហនុ ផ្តើមចេញពីទីផ្សារដែលមានការលក់ដូរប្រមូលផ្តុំជាកន្លែងដែលមានការចម្លងខ្លាំង ចម្លងលឿន និងចម្លងច្រើន។ ដូច្នេះបានជាអាជ្ញាធរសម្រេចមិនអនុញ្ញាតឱ្យបើកផ្សារទាំងអស់ឡើងវិញទេ ប៉ុន្តែលើកទឹកចិត្តឱ្យអាជីវករដែលបានត្រួតពិនិត្យសុខភាពទទួលលទ្ធផលអវិជ្ជមាន ២ ដងរួចហើយ ពួកគេអាចលក់ដូរនៅតាមផ្ទះបាន។
ប៉ុន្តែត្រូវគោរពទៅតាមស្តង់ដាផ្សារបណ្តោះអាសន្នដែលរដ្ឋបាលខេត្តបានកំណត់ ដោយត្រូវពាក់ម៉ាស់ រក្សាគម្លាតសុវត្ថិភាពរវាងអ្នកលក់ និងអ្នកទិញ ដោយសរសេរបង្ហាញអ្វីដែលត្រូវចង់ទិញ។ លើកទឹកចិត្តឱ្យទូទាត់ថ្លៃទំនិញតាមប្រព័ន្ធធនាគារ (QRCODE) ករណីទូទាត់ប្រាក់សុទ្ធ គឺមិនអនុញ្ញាតឱ្យប្រគល់ទទួលដោយផ្ទាល់នោះឡើយ។
មួយវិញទៀត នៅតាមព្រំប្រទល់តំបន់លឿង គឺត្រូវបានដាក់ប៉ុស្តិ៍ប្រចាំការនៅតាមគោលដៅនីមួយៗ សម្រាប់ការត្រួតពិនិត្យការធ្វើដំណើរចេញចូលរបស់ប្រជាពលរដ្ឋ ដើម្បីឱ្យគោរពទៅតាមវិធានការរបស់ក្រសួងសុខាភិបាលដែលបានធ្វើការណែនាំ។ រីឯអ្នកធ្វើដំណើរដោយរថយន្តឯកជនអាចជិះបានត្រឹម ៤ នាក់ រថយន្តសាធារណៈត្រូវកាត់បន្ថយនៅត្រឹមពាក់កណ្តាល ត្រូវមានម៉ាស់ និងគម្លាតសុវត្ថិភាពឱ្យបានត្រឹមត្រូវ។
លោក គួច ចំរើន បានអំពាវនាវដល់ប្រជាពលរដ្ឋនៅក្នុងក្រុងព្រះសីហនុ ក៏ដូចជាអ្នកធ្វើដំណើរឆ្លងកាត់មកកាន់ក្រុងព្រះសីហនុត្រូវគោរពឱ្យបាននូវវិធានការសុខាភិបាល និងគោរពនូវវិធានការ ៣ ការពារ និង ៣ កុំ ដើម្បីខ្លួនឯង ក្រុមគ្រួសារ និងសង្គមជាតិទាំងមូល៕
