.jpg)
លោក ហ៊ុយ វ៉ាថារ៉ូ ប្រធានសមាគមធានារ៉ាប់រងកម្ពុជា។ រូបថត ភ្នំពេញ ប៉ុស្តិ៍
ភ្នំពេញៈ វិស័យធានារ៉ាប់រងនៅកម្ពុជាប្រមូលបានបុព្វលាភប្រមាណជាង ២៧០ លានដុល្លារ កើន ៧,៣ ភាគរយធៀបនឹងឆ្នាំ ២០១៩ ទោះបីវិស័យសេវាកម្មភាគច្រើន បានបង្ហាញពីសញ្ញាអវិជ្ជមានក្នុងឆ្នាំ ២០២០ ប៉ះពាល់ពីការរីករាលដាលនៃជំងឺកូវីដ ១៩។ នេះបើយោងតាមសមាគម ធានារ៉ាប់រង កម្ពុជា (IAC)។
យោងតាមរបាយការណ៍របស់ IAC ចេញផ្សាយកាលពីល្ងាចថ្ងៃទី ១២ ខែឧសភា បង្ហាញថា ក្នុងឆ្នាំ ២០២០ វិស័យធានារ៉ាប់រងនៅកម្ពុជាទទួលបានបុព្វលាភ (ប្រាក់ចំណូលពីការលក់ធានារ៉ាប់រង) សរុប ២៧១,៥ លានដុល្លារ កើនឡើង ៧,៣១ ភាគរយ ពីចំនួន ២៥៣ លានដុល្លារ ក្នុងឆ្នាំ ២០១៩ ដោយក្នុងនោះបុព្វលាភទីផ្សារធានារ៉ាប់រងទូទៅ បានគ្របដណ្តប់ចំណែកទីផ្សារ ៤១,៩ ភាគរយ ទីផ្សារធានារ៉ាប់រងអាយុជីវិតមាន ៥៦,១ ភាគរយ និងទីផ្សារធានារ៉ាប់រងខ្នាតតូច មានចំណែកទីផ្សារត្រឹម ២ ភាគរយប៉ុណ្ណោះ។
បុព្វលាភទីផ្សារធានារ៉ាប់រងទូទៅមានចំនួន ១១៣,៨ លានដុល្លារ កើនឡើង ១០,៥ ភាគរយ ធៀបឆ្នាំ ២០១៩ (រុញច្រានដោយកំណើននៃផលិតផលចម្បងៗដូចជា ធានារ៉ាប់រងទ្រព្យសម្បត្តិ (អគ្គិភ័យ), ធានារ៉ាប់រងវិស្វកម្ម, ធានារ៉ាប់រងសុខភាព, ធានារ៉ាប់រងគ្រោះថ្នាក់ផ្សេងៗ និងធានារ៉ាប់រងយានយន្ត) ចំណែកបុព្វលាភទីផ្សារធានារ៉ាប់រងអាយុជីវិតមាន ១៥២,៣ លានដុល្លារ កើន ៦,៦ ភាគរយ ខណៈបុព្វលាភធានារ៉ាប់រងខ្នាតតូច ដែលបានទទួលរងផលប៉ះពាល់ខ្លាំងពីវិបត្តិជំងឺកូវីដ ១៩ មាន ៥,៤ លានដុល្លារ ធ្លាក់ចុះ ២៤,៦ ភាគរយ។ នេះបើយោងតាមរបាយការណ៍របស់ AIC។
ដោយឡែកក្នុងឆ្នាំ ២០២០ វិស័យធានារ៉ាប់រងនៅកម្ពុជាក៏ធ្វើការសងត្រឡប់ទៅអតិថិជនវិញ ដោយមានទឹកប្រាក់សរុប ៣៧ លានដុល្លារ កើនឡើង ៥ ភាគរយធៀបនឹងឆ្នាំ ២០១៩ ក្នុងនោះសំណងសម្រាប់ធានារ៉ាប់រងទូទៅមាន ២៩,១ លានដុល្លារ ធានារ៉ាប់រងអាយុជីវិត ៦,៩ លានដុល្លារ និងធានារ៉ាប់រងខ្នាតតូច ០,៩ លានដុល្លារ។ នេះបើយោងតាមសេចក្តីប្រកាសព័ត៌មាន។
លោក ហ៊ុយ វ៉ាថារ៉ូ ប្រធានសមាគមធានារ៉ាប់រងកម្ពុជាបានប្រាប់ ភ្នំពេញ ប៉ុស្តិ៍ នៅថ្ងៃទី ១៣ ខែឧសភា កំណើននេះគឺដោយសារតែការយល់ដឹងពីសារៈសំខាន់របស់វិស័យធានារ៉ាប់រងពីសំណាក់ក្រុមហ៊ុន និងប្រជាជនខ្មែរទូទៅ ទោះបីជាស្ថិតក្នុងដំណាក់កាលដ៏លំបាកនៃការឆ្លងរាលដាលជំងឺកូវីដ ១៩ នេះក៏ដោយ។
លោកបន្តថា ភាពវិជ្ជមានរបស់វិស័យនេះក៏បានពីការរួមចំណែករបស់ក្រសួងសេដ្ឋកិច្ច និងហិរញ្ញវត្ថុក្នុងការបង្កើតឱ្យមានបរិស្ថានទីផ្សារ និងក្របខ័ណ្ឌច្បាប់ផ្សេងៗដែលផ្តល់នូវទំនុកចិត្តកាន់តែខ្លាំងសម្រាប់អ្នកទទួលសេវាទាំងអស់។
លោកថ្លែងថា៖ «វិស័យធានារ៉ាប់រងនៅកម្ពុជាកំពុងមានការរីកចម្រើនគួរឱ្យកត់សម្គាល់ ដែលឆ្លុះបញ្ចាំងតាមរយៈការយល់ដឹងកាន់តែច្រើនពីអត្ថប្រយោជន៍នៃការធានារ៉ាប់រង និងការទទួលបាននូវទំនុកចិត្តកាន់តែច្រើនពីអតិថិជនពីមួយឆ្នាំទៅមួយឆ្នាំ»។
ខណៈនៅកម្ពុជាបច្ចុប្បន្នស្ថានភាពនៃការឆ្លងជំងឺកូវីដ១៩ ក្នុងសហគមន៍នៅតែបន្តនោះ លោក វ៉ាថារ៉ូ បាននិយាយថា មិនទាន់អាចព្យាករណ៍ពីស្ថានភាពទីផ្សារធានារ៉ាប់រងក្នុងឆ្នាំ ២០២១ នេះបាននៅឡើយទេ ប៉ុន្តែសម្រាប់រូបលោកផ្ទាល់គឺនៅតែមានសុទិដ្ឋនិយមថា នឹងមានកំណើនបន្ថែមទៀត គ្រាន់តែអាចមានអត្រាទាបជាងឆ្នាំ ២០២០។
យោងតាមលោក វ៉ាថារ៉ូ ក្នុងរយៈពេល ២ ទសវត្សរ៍កន្លងមកវិស័យធានារ៉ាប់រងនៅកម្ពុជាមានកំណើនប្រហែល ៣០ ភាគរយក្នុង១ឆ្នាំៗ។
ប្រធានអគ្គនាយកក្រុមហ៊ុន Forte Insurance លោក យក់ ចំរើនឫទ្ធិ បានប្រាប់ថា ក្នុងឆ្នាំ ២០២០ បុព្វលាភក្នុងក្រុមហ៊ុនរបស់លោកមានកំណើនជិត ១០ ភាគរយ ដែលទទួលបានចំណែកធំពីធានារ៉ាប់រងលើយានយន្ត និងសុខភាព ខណៈកាលពីឆ្នាំ ២០១៩ ក្រុមហ៊ុនមានកំណើនប្រមាណ ១៣ ភាគរយ។
ចំណេះដឹងពីវិស័យធានារ៉ាប់រង និងការគ្រប់គ្រងស្ថានការណ៍ការឆ្លងជំងឺកូវីដ១៩ បានល្អក្នុងឆ្នាំ ២០២០ បានចូលរួមចំណែកយ៉ាងច្រើនក្នុងការធ្វើឱ្យទីផ្សារនេះរក្សាបានភាពវិជ្ជមាន។ លោកបន្ថែមថា សម្រាប់ឆ្នាំ ២០២១ នេះគឺគេចាំបាច់ត្រូវរង់ចាំមើលថា តើការឆ្លងរាលដាលក្នុងសហគមន៍នៅពេលនេះនឹងត្រូវបានបញ្ចប់ពេលណា។
លោកអះអាងថា៖ «ឆ្នាំ ២០២០ ទីផ្សារវិស័យធារ៉ាប់រងមិនសូវមានផលប៉ះពាល់ច្រើនទេ ប៉ុន្តែសម្រាប់ឆ្នាំ ២០២១ ដែលកំពុងមានការរាលដាលជំងឺកូវីដ១៩ ក្នុងព្រឹត្តិការណ៍សហគមន៍ ២០ កុម្ភៈ គឺកំពុងជះឥទ្ធិពលជាបណ្តើរៗ ពិសេសក្នុងត្រីមាសទី២ នេះ ខណៈត្រីមាសទី១ គឺមិនមានបញ្ហាអ្វីទេ»។
ទោះយ៉ាងណា លោក ចំរើនឫទ្ធិ បាននិយាយថា បុព្វលាភវិស័យធានារ៉ាប់រងនៅកម្ពុជា គឺនៅមានកម្រិតទាបខ្លាំងក្នុងចំណែកនៃ GDP របស់ប្រទេសដោយមានប្រមាណ ០,៤ ភាគរយប៉ុណ្ណោះ ខណៈប្រទេសជិតខាងអត្រានេះមានដល់ចន្លោះពី ៦-៧ ភាគរយ។
គិតរហូតមកដល់ពេលនេះសមាគមធានារ៉ាប់រងកម្ពុជាមានក្រុមហ៊ុនជាសមាជិកចំនួន ៣៣ ក្នុងនោះក្រុមហ៊ុនធានារ៉ាប់រងទូទៅមានចំនួន ១៦ ក្រុមហ៊ុនធានារ៉ាប់រងអាយុជីវិត ចំនួន ១១ ក្រុមហ៊ុនធានារ៉ាប់រងខ្នាតតូចចំនួន ៥ និងក្រុមហ៊ុនធានារ៉ាប់រងបន្តចំនួន ១៕
