![](https://pppkhmer.sgp1.digitaloceanspaces.com/image/main/20247/9_7_2024_angkor_wat_phnom_penh_post.jpg)
ភ្ញៀវទេសចរមកទស្សនាប្រាសាទអង្គរវត្តខេត្តសៀមរាបកាលពីដើមឆ្នាំនេះ។ រូបថត យូសុះ អាប់ឌុល រ៉ាហ៊ីម
ចំនួនភ្ញៀវទេសចរអន្តរជាតិដែលមកទស្សនាប្រទេសកម្ពុជាមានកំណើនជាង ២២ ភាគរយក្នុងរយៈពេល ៥ ខែដើមឆ្នាំ២០២៤នេះ ដែលជាសញ្ញាវិជ្ជមាននៅក្រោយវិបត្តិកូវីដ និងក្នុងពេលមានវិបត្តិពិភពលោកមួយចំនួនដូចជាសង្គ្រាមនៅអឺរ៉ុប និងនៅមជ្ឈិមបូព៌ា។
យោងតាមតួលេខរបស់ក្រសួងទេសចរណ៍បង្ហាញថា ក្នុងរយៈពេល ៥ ខែឆ្នាំ២០២៤នេះ ទេសចរអន្តរជាតិដែលចូលមកកម្ពុជាមានចំនួនជាង ២,៦៤ លាននាក់ គឺមានអត្រាកំណើន ២២,១ ភាគរយបើប្រៀបធៀបនឹងរយៈពេល ៥ ខែដូចគ្នាក្នុងឆ្នាំ ២០២៣ ដែលមានចំនួន ២,១ លាននាក់។
ទោះបីជាចំនួននេះបង្ហាញពីកំណើនជាបន្តបន្ទាប់ក្រោយវិបត្តិកូវីដ១៩ ក៏ដោយ ក៏ការកើនឡើងនេះហាក់មានភាពយឺតជាងនៅប្រទេសជិតខាង ដូចជាប្រទេសថៃ ដែលមានភ្ញៀវទេសចរអន្តរជាតិចូលជិត ១៥ លាននាក់ ក្នុងអត្រាកំណើន ៣៨ ភាគរយក្នុងរយៈពេល ៥ខែដើមឆ្នាំ២០២៤ ធៀបទៅនឹងរយៈពេលដូចគ្នាកាលពីឆ្នាំមុន។ នេះបើតាមកាសែតបាងកកប៉ុស្តិ៍។
ចំណែកប្រទេសវៀតណាមវិញ ចំនួនភ្ញៀវទេសចរអន្តរជាតិមានជិត ៧,៦ លាននាក់ ក្នុងអត្រាកំណើន ៦៤,៩ ភាគរយធៀបនឹងឆ្នាំមុនក្នុងរយៈពេល ៥ខែដូចគ្នា។ បើប្រៀបធៀបទៅនឹងចំនួនភ្ញៀវទេសចរមុនកូវីដ អត្រាកំណើននេះបង្ហាញពីការកើនលើសរហូតដល់ទៅ ៣,៩ ភាគរយនៃអត្រាភ្ញៀវទេសចរឆ្នាំ ២០១៩។ នេះបើយោងតាមអាជ្ញាធរជាតិទេសចរណ៍វៀតណាម។
ទីភ្នាក់ងារទេសចរណ៍អង្គការសហប្រជាតិ (UN Tourism) បានផ្សាយរបាយការណ៍បច្ចុប្បន្នភាពចំនួនទេសចរអន្តរជាតិ ដោយលើកឡើងថា ភ្ញៀវទេសចរនៅលើពិភពលោកក្នុងត្រីមាសទី១ ឆ្នាំ២០២៤នេះ មានកំណើន ៩៧ ភាគរយនៃអត្រាដែលធ្លាប់មានមុនកូវីដ១៩។
ទីភ្នាក់ងារទេសចរណ៍អង្គការសហប្រជាតិបញ្ជាក់ថា៖ «ការមកដល់នៃអ្នកភ្ញៀវទេសចរនៅតំបន់អាស៊ី និង ប៉ាស៊ីហ្វិក បានងើបឡើងវិញក្នុងអត្រា ៨២ ភាគរយ នៅក្នុងត្រីមាសទី១ ឆ្នាំ ២០២៤ ធៀបទៅនឹងកម្រិតមុនជំងឺរាតត្បាត (កូវីដ) ខណៈដែលការងើបឡើងវិញនៃចំនួនទេសចរមានកម្រិត ៦៥ ភាគរយកាលពីឆ្នាំ ២០២៣»។
សម្រាប់កម្ពុជា អ្នកវិភាគយល់ថា មានកត្តារួមផ្សំជាច្រើនដែលប៉ះពាល់ដល់វិស័យទេសចរណ៍ ដែលក្នុងនោះ តិចឬច្រើន គឺព័ត៌មាននានាពាក់ព័ន្ធទៅនឹងការការឆបោកតាមអនឡាញ ការចាប់ជំរិត និងអំពើជួញដូរមនុស្ស។
ការឆបោកតាមអនឡាញ
កាលពីពេលថ្មីៗនេះ វិទ្យាស្ថានសន្តិភាពរបស់សហរដ្ឋអាមេរិក បានចេញផ្សាយរបាយការណ៍មួយអំពីការឆបោកតាមអនឡាញ និងការជួញដូរមនុស្សនៅអាស៊ីអាគ្នេយ៍ រួមមានទាំងនៅកម្ពុជាផង ដោយលើកឡើងថា ការឆបោករបៀបនេះកំពុងរីករាលដាល់ក្នុងរូបភាពសន្យាផ្ដល់ការងារដែលមានប្រាក់ខែខ្ពស់ ប៉ុន្តែផ្ទុយទៅវិញ អ្នកដែលចាញ់បោកត្រូវគេចាប់បង្ខាំងឲ្យធ្វើការ និងត្រូវជំរិតទាប្រាក់ ដែលអ្នកខ្លះត្រូវសម្រេចចិត្តធ្វើអត្តឃាតទៀតផង។
របាយការណ៍របស់វិទ្យាស្ថានដដែលអះអាងថា ក្រុមឧក្រិដ្ឋជនរកប្រាក់បានរហូតដល់ទៅ ១២,៥ ពានលាន់ដុល្លារពីកម្ពុជា។ សកម្មភាពរបស់ពួកគេបង្កផលប៉ះពាល់ដល់សង្គមកម្ពុជា បន្ថែមទៅលើផលប៉ះពាល់ផ្ទាល់ទៅលើជនរងគ្រោះមកពីជុំវិញពិភពលោក។
ទោះបីជារហូតមកទល់ពេលនេះ គ្មានព័ត៌មានណាមួយបង្ហាញពីសកម្មភាពអាក្រក់ណាមួយដែលប៉ះពាល់ផ្ទាល់ទៅលើភ្ញៀវទេសចរបរទេសក៏ដោយ ជនបរទេសមួយចំនួនដែលមិនធ្លាប់បានមកទស្សនាប្រទេសកម្ពុជា បានបង្ហាញក្ដីបារម្ភអំពីសុវត្ថិភាពរបស់ពួកគេទៅលើការឆបោកតាមអនឡាញ និងការចាប់ជំរិត ឬជួញដូរមនុស្ស។
«ព័ត៌មានអាក្រក់អំពីកម្ពុជា ខ្ញុំក៏បានទទួលដែរពីជនបរទេសដែលភាគច្រើនគេខ្លាចបារម្ភអំពីការឆបោកតាមអនឡាញខ្លាំងមែនទែន»។ នេះជាការលើកឡើងរបស់លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា ដែលលោកបានលើកជាឧទាហរណ៍មួយនៃការបារម្ភរបស់ជនបរទេសជាច្រើន។
ស្ថានទូតប្រទេសមួយចំនួន ដូចជាស្ថានទូតឥណ្ឌាបានក្រើនរំឭកដល់ពលរដ្ឋរបស់ពួកគេឲ្យមានការប្រយុងប្រយ័ត្នអំពីការឆបោកតាមអនឡាញដោយសារតែពលរដ្ឋរបស់ពួកគេធ្លាប់ត្រូវឆ្លងកាត់។ នៅពេលគេបើកគេហទំព័ររបស់ស្ថានទូតភ្លាម គេនឹងឃើញសារក្រើនរំឭកឲ្យមានការប្រុងប្រយ័ត្នអំពីការឆបោកតាមអនឡាញតាមរយៈការសន្យាផ្ដល់ការងារក្លែងក្លាយ។
ស្រដៀងគ្នានេះ ស្ថានទូតចិនក៏ធ្លាប់បានក្រើនរំឭកពលរដ្ឋរបស់ខ្លួនឱ្យមានការប្រុងប្រយ័ត្នអំពីការជាប់អន្ទាក់រឿងល្បែងស៊ីសង ជាពិសេសសេសនៅខេត្តព្រះសីហនុ ក្រុងប៉ោយប៉ែត និង ក្រុងបាវិត។
នៅឆ្នាំ ២០១៩ ស្ថានទូតចិនបានរំឭកប្រាប់ពលរដ្ឋរបស់ខ្លួនថា ពលរដ្ឋចិនជាច្រើនត្រូវបានក្រុមហ៊ុនល្បែងស៊ីសងបោកបញ្ឆោតឲ្យធ្លាក់ក្នុងអន្ទាក់ល្បែងស៊ីសង ដោយសន្យាផ្ដល់ប្រាក់ខែខ្ពស់ សំបុត្រយន្តហោះទៅមក ទិដ្ឋាការ ម្ហូបអារហារ កន្លែងស្នាក់នៅ។ ប៉ុន្តែ ការងារល្អបែបនេះស្ទើរតែគ្មានទាល់តែសោះ។
កម្ពុជាមានសុខសុវត្ថិភាព
លោក ទូច សុខៈ អ្នកនាំពាក្យក្រសួងមហាផ្ទៃ បានថ្លែងថា កម្ពុជាមានសុត្ថិភាពល្អប្រសើរសម្រាប់ភ្ញៀវទេសចរទាំងអស់ ហើយរហូតមកទល់ពេលនេះពុំធ្លាប់មានភ្ញៀវទេសចរណាម្នាក់ទទួលរងគ្រោះពីការឆបោកតាមអនឡាញ ឬបទល្មើសព្រហ្មទណ្ឌ ឬការចាប់ជំរិតណាមួយដូចការភ័យខ្លាចនោះទេ។
![](https://pppkhmer.sgp1.cdn.digitaloceanspaces.com/image/main/20247/9_7_2024_touch_sokhak.jpg)
លោក ទូច សុខៈ អ្នកនាំពាក្យក្រសួងមហាផ្ទៃ។ រូបថត សហការី
លោកថ្លែងថា៖ «ដូច្នេះ សូមឲ្យភ្ញៀវទេសចរគ្រប់ជាតិសាសន៍ទាំងអស់ជឿងជាក់លើកម្ពុជា កុំសូវជឿជាក់ទៅលើការផ្សព្វផ្សាយបង្ខូចកេរ្តិ៍ឈ្មោះរបស់កម្ពុជា។ សូមឆែកមើលប្រព័ន្ធព័ត៌មានផ្សេងៗដើម្បីផ្ទៀងផ្ទាត់ជាមុនសិន ហើយអាចមកទស្សនាព្រះរាជាណាចក្រកម្ពុជាដោយផ្ទាល់ទើបដឹងថា កម្ពុជាមានសន្តិសុខល្អប្រសើរ មានតំបន់ទេសចរណ៍ប្រវត្តិសាស្ត្រ ទេសចរណ៍ធម្មជាតិ និងទេសចរណ៍ផ្សេងទៀត»។
លោក ទូច សុខៈ អះអាងថា បទល្មើសឆបោកតាមអនឡាញ បានថយចុះគួរឲ្យកត់សម្គាល់ ទោះបីជានៅមានករណីបែបនេះកើតឡើងខ្លះក៏ដោយ។ លោកថា រដ្ឋាភិបាលបានបង្ក្រាបបទល្មើសនេះតាំងពីរដ្ឋាភិបាលអាណត្តិមុនរហូតមកដល់សព្វថ្ងៃនេះ។
លោកបន្តថា៖ «ចរិតនៃការឆបោកតាមអនឡាញនេះ ភាគច្រើនឆបោកចំពោះតែជនបរទេសដែលឧក្រិដ្ឋជនមានព័ត៌មាននៅក្នុងដៃ ឬជនបរទេសគាត់មិនបានស្វែងយល់ពីអ្វីៗផ្សេងទៀតដែលធ្វើឲ្យពួកគេលង់ខ្លួនហើយចាញ់បោកក្រុមឆបោកតាមអនឡាញ។ ដូច្នេះ សូមភ្ញៀវទេសចរកុំមានការព្រួយបារម្ភអំពីសុវត្ថិភាពនៅព្រះរាជាណាចក្រកម្ពុជា»។
លោកថា រាជរដ្ឋាភិបាល ជាពិសេសក្រសួងមហាផ្ទៃបានពង្រឹងការបង្ក្រាបទៅលើបទល្មើសទាំងអស់ ធ្វើឲ្យជនល្មើសខ្លាចរអា មិនហ៊ានប្រព្រឹត្តបទល្មើសជាដើម។ សម្រាប់បទល្មើសក្នុងចំណោមពលរដ្ឋក្នុងស្រុក វាមិនខុសពីប្រទេសនានានៅលើពិភពលោកទេដែលតែងតែមានតិចតួច ហើយមិនមានអ្វីពាក់ព័ន្ធនឹងភ្ញៀវទេសចរនោះទេ។
លើសពីនេះទៀត កម្ពុជាតែងតែយកចិត្តទុកដាក់ខ្ពស់លើសុវត្ថិភាពរបស់ភ្ញៀវទេសចរ ដូចជាមានការបង្កើតប៉ូលិសទេសចរណ៍ជាដើម។ នេះជាការបញ្ជាក់របស់លោក ទូច សុខៈ។
អ្នកវិភាគយល់ស្របជាមួយការលើកឡើងអំពីសុវត្ថិភាពសម្រាប់ភ្ញៀវទេសចរ។
កត្តាប៉ះពាល់មកលើវិស័យទេសចរណ៍
លោក ហុង វណ្ណៈ អ្នកជំនាញផ្នែកសេដ្ឋកិច្ចនៅរាជបណ្ឌិត្យសភាកម្ពុជា ថ្លែងថាការផ្សព្វផ្សាយអំពីព័ត៌មានមិនល្អមានឥទ្ធិពលទៅលើអ្នកស្ដាប់ រួមទាំងអ្នកស្ដាប់ជាទេសចរទាំងជាតិ និងអន្តរជាតិផងដែរ ដែលធ្វើឲ្យពួកគេពិចារណាទៅលើគោលដៅទេសចរណ៍។
![](https://pppkhmer.sgp1.cdn.digitaloceanspaces.com/image/main/20247/9_7_2024_hong_vanak.jpg)
លោក ហុង វណ្ណៈ អ្នកជំនាញផ្នែកសេដ្ឋកិច្ចនៅរាជបណ្ឌិត្យសភាកម្ពុជា។ រូបថត សហការី
លោកនិយាយថា ញ្ហាចាប់ជំរិត ឬឆបោកតាមអនឡាញពិតជាកើតមានខ្លះនៅកម្ពុជា ប៉ុន្តែ វាមិនខុសពីនៅប្រទេសផ្សេងទៀតលើពិភពលោកនោះទេ ហើយស្ថានភាពឆបោកតាមអនឡាញនៅប្រទេសខ្លះមានសភាខ្លាំងជាងកម្ពុជាទៀតផង។
លោកថា លោកសង្កេតឃើញរដ្ឋាភិបាលកម្ពុជាកំពុងប្រឹងប្រែងទប់ស្កាត់ និងបង្ក្រាបករណីបែបនេះ ពីព្រោះវាក៏ប៉ះពាល់ដល់អារម្មណ៍អ្នកវិនិយោគផងដែរ។
លោកនិយាយថា៖ «បញ្ហាតិចតូចប៉ុណ្ណឹងមិនមែនជាកត្តាសម្រេចចិត្តលើគោលដៅទេសចរណ៍របស់ពួកគាត់ទេ។ ភ្ញៀវទេសចរបានសម្រេចយកកម្ពុជាជាគោលដៅនៃដំណើរកម្សាន្តរបស់គាត់ ដោយសារគាត់បានទទួលព័ត៌មានពិតពីដៃគូរបស់គាត់នៅកម្ពុជា។ ដូច្នេះបើគាត់មក គឺគាត់បានទទួលព័ត៌មានជាក់លាក់អំពីស្ថានភាពជាក់ស្ដែងក្នុងប្រទេសរបស់យើង»។
បើតាមការយល់ឃើញរបស់លោក ហុង វណ្ណៈ ការធ្វើដំណើរកម្សាន្ត ឬការសម្រេចលើគោលដៅទេសចរណ៍ របស់ភ្ញៀវទេសចរបរទេសគឺអាស្រ័យទៅលើកត្តាសេដ្ឋកិច្ចរបស់ពួកគេ ខណៈដែលព័ត៌មានដែលពួកគេទទួលបានគ្រាន់តែជាកត្តាសម្រាប់ពិចារណា និងប្រុងប្រយ័ត្នប៉ុណ្ណោះ។
លោកយល់ថា ចំនួនភ្ញៀវទេសចរនៅទាបសម្រាប់កម្ពុជានាពេលបច្ចុប្បន្ន គឺដោយសារតែផលប៉ះពាល់បន្សល់ទុកពីជំងឺកូវីដ១៩ និងបញ្ហាសង្គ្រាមនៅអឺរ៉ុប និងមជ្ឈិមបូព៌ា។
លោកនិយាយថា៖ «ដូច្នេះ រឿងពត៌មានមិនល្អ មិនមែនជាបញ្ហាចម្បងទេនាពេលបច្ចុប្បន្ន រឿងដែលសំខាន់គឺបញ្ហាលុយ បញ្ហាសេដ្ឋកិច្ច ប្រាក់ចំណូលដោយសារអតិផរណា។ ជាទូទៅទេសចរគាត់មកតាមភ្នាក់ងារ ឬមកជាកញ្ចប់ មិនមែនមកដោយអង្គឯងនោះដែរ។ ទោះបីគាត់មកតែម្នាក់ឯងក៏មានការការពារល្អ ប្រទេសមានសុវត្ថិភាព សន្តិសភាពល្អ។
លោកបន្តថា៖ «រឿងចាប់ជំរិត បោកបញ្ឆោត ល្បែងស៊ីសងតាមអនឡាញ កើតមានមែនតែត្រូវបានបង្ក្រាប។ រឿងសំខាន់គឺកត្តាសេដ្ឋកិច្ច។ បន្តិចទៀតនៅពេលដែលគាត់អាចគ្រប់គ្រងប្រាក់ចំណូលរបស់គាត់ ហើយបញ្ហាសកលលោកមានភាពធូស្រាល ភ្ញៀវទេសចរនៅលើពិភពលោក រួមទាំងនៅកម្ពុជាផង នឹងកើនឡើង»។
កម្ពុជាគួរធ្វើអ្វីដើម្បីស្ដារកេរ្តិ៍ឈ្មោះរបស់ខ្លួននៅក្រៅប្រទេសនៅចំពោះមុខព័ត៌មានរឿងឆបោក?
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា យល់ថាដើម្បីស្ដារមុខមាត់កម្ពុជា និងទាក់ទាញភ្ញៀវទេសចរ ក្រសួងព័ត៌មានត្រូវធ្វើការងារឲ្យបានស៊ីជម្រៅ និងមានប្រសិទ្ធភាពដើម្បីឲ្យភ្ញៀវទេសចរទទួលបានព័ត៌មានពិតអំពីកម្ពុជា។
![](https://pppkhmer.sgp1.cdn.digitaloceanspaces.com/image/main/20247/9_7_2024_kin_phea.jpg)
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា។ រូបថត សហការី
ដោយឡែក ក្រសួងទេសចរណ៍មានភារកិច្ចផ្សព្វផ្សាយអំពីមុខមាត់របស់កម្ពុជា តាមរយៈការបង្ហាញរមណីយដ្ឋាននានា និងភាពសុសាន្តរបស់កម្ពុជា។
លោកបន្តថា ក្រៅតែពីប្រម៉ូតខ្លួនឯង រដ្ឋាភិបាលក៏ត្រូវតែចាត់វិធានការ និងប្រយុទ្ធប្រឆាំងនឹងល្បែងអនឡាញ និងបទល្មើសបច្ចេកវិទ្យាផងដែរ។ កិច្ចការនេះគឺជាភារកិច្ចរបស់ក្រសួងប្រៃសណីយ៍និងទូរគមនាគម៍ និងក្រសួងមហាផ្ទៃដែលសុទ្ធតែមាននាយកដ្ឋានប្រឆាំងបទល្មើសបច្ចេកវិទ្យា។
លោកថ្លែងថា៖ «ក្រសួងទាំងពីរនេះត្រូវតែចាប់ដៃគ្នា ដើម្បីយកជ័យជម្នះឲ្យបានទៅលើបញ្ហាទាំងអស់ហ្នឹង»។
លោក គិន ភា ថ្លែងថា ក្រសួងការងារ និងបណ្ដុះបណ្ដាលវិជ្ជាជីវៈ ក៏រួមចំណែកក្នុងការទប់ស្កាត់បទល្មើសឆបោកផងដែរ តាមរយៈការត្រួតពិនិត្យជនបរទេសដែលបំពេញការងារនៅកម្ពុជា ថាតើពួកគេកំពុងធ្វើការដោយស្របច្បាប់ ឬខុសច្បាប់ ឬស្ថិតក្នុងការបង្ខិតបង្ខំណាមួយ។ កិច្ចការនេះ លោកស្នើឲ្យក្រសួងការងារធ្វើការជាមួយក្រសួងការបរទេស និងក្រសួងមហាផ្ទៃ។
សម្រាប់កិច្ចការនៅក្រៅប្រទេស លោក គិន ភា ចង់ឃើញរដ្ឋាភិបាលវិនិយោគបន្ថែមទៀតទៅលើការលើកមុខមាត់កម្ពុជា ដូចជាតាមរយៈការផ្សព្វផ្សាយតាមមធ្យោបាយនានា ដូចជានៅលើប្រព័ន្ធផ្សព្វផ្សាយដែលមានឥទ្ធិពល ឬអ្នកមានឥទ្ធិពលលើបណ្ដាញសង្គម។ លើសពីនេះទៀត ស្ថានទៅកម្ពុជាក៏ត្រូវពង្រីកសកម្មភាពផ្សព្វផ្សាយអំពីកម្ពុជាឲ្យបានច្រើន។
លោកលើកទឹកចិត្តឲ្យប៉ូលិសអន្តោរប្រវេសន៍ដែលនៅជួរមុខជួយផ្សព្វផ្សាយ និងបង្ហាញកាយវិការល្អ រួសរាយរាក់ទាក់ រីឯប្រជាពលរដ្ឋទូទៅក៏ត្រូវបង្ហាញពីស្នាមញញឹម និងអំពីភាពសុខសាន្តរបស់កម្ពុជាទៅកាន់ពិភពលោក។
លោក ឈត ប៊ុនថង មន្ដ្រីស្រាវជ្រាវផ្នែកទំនាក់ទំនង វប្បធម៌ អប់រំ និងទេសចរណ៍នៅរាជបណ្ឌិត្យសភាកម្ពុជា យល់ថាព័ត៌មានអំពីរឿងចាប់ជំរិត តិចឬច្រើន ពិតជាមានឥទ្ធិពលលើវិស័យទេសចរណ៍ ដូចជាតាមរយៈភាពយន្តចិន No More Bets ជាដើម បន្ថែមទៅលើផលប៉ះពាល់របស់ភ្ញៀវទេសចរពីបញ្ហាសង្គ្រាមរុស្ស៊ី-អ៊ុយក្រែន ឬអ៊ីស្រាអែល និងប៉ាឡេស្ទីន។
![](https://pppkhmer.sgp1.cdn.digitaloceanspaces.com/image/main/20247/9_7_2024_chhut_bunthong.jpg)
លោក ឈត ប៊ុនថង មន្ដ្រីស្រាវជ្រាវផ្នែកទំនាក់ទំនង វប្បធម៌ អប់រំ និងទេសចរណ៍នៅរាជបណ្ឌិត្យសភាកម្ពុជា។ រូបថត សហការី
ចំពោះការផ្សព្វផ្សាយលើកកម្ពស់សក្ដានុពលទេសចរណ៍របស់កម្ពុជានៅក្រៅលើឆាកអន្តរជាតិ លោកសន្និដ្ឋានថា ប្រហែលមិនទាន់ដល់កម្រិតមួយដែលធ្វើឲ្យទេសចរសម្រេចចិត្តមកកម្ពុជា ឬការផ្សព្វផ្សាយនោះមិនទាន់មានភាពទាក់ទាញ។
លោកថា៖ «ប្រសិនបើស្ថានទូតយើងនៅក្រៅប្រទេស ឬក្រសួងទេសចរណ៍បានផ្សព្វផ្សាយហើយ តែទេសចរនៅតែមិនចាប់អារម្មណ៍ យើងមិនត្រូវបន្ថយដៃទេ ត្រូវតែបន្តការផ្សព្វផ្សាយឲ្យបានច្រើនជាងមុន និងទាក់ទាញជាងមុន»។
លោកបន្តថា៖ «ខ្ញុំមិនចោទប្រកាន់ថា ក្រសួងទេសចរណ៍ឬស្ថាប័នពាក់ព័ន្ធមិនបានផ្សព្វផ្សាយទេ ប៉ុន្តែដោយសារតែចំនួនទេសចរនៅកម្ពុជាថយចុះច្រើន មិនទាន់ឡើង។ អីចឹង សូមស្ថានទូតខ្មែរបន្តផ្សាយទាក់ទាញឲ្យបានខ្លាំង និងទូលំទូលាយ និងតាមរយៈប្រព័ន្ធផ្សព្វផ្សាយធំៗ ដូចដែលយើងធ្លាប់ធ្វើពីមុន»។
ក្រៅពីការផ្សព្វផ្សាយទាក់ទាញហើយ លោក ប៊ុនថង លើកទឹកចិត្តឱ្យគ្រប់ភាគីទាំងរដ្ឋ ទាំងឯកជន និងសាធារណជនទាំងអស់ចូលរួមបម្រើសេវាល្អដល់ភ្ញៀវទេសចរដើម្បីឲ្យពួកគេចង់ស្នាក់នៅកម្ពុជាក្នុងរយៈពេលយូរ ហើយចង់ត្រឡប់មកម្ដងទៀតនាពេលអានគត៕