ភ្នំពេញៈ ក្រសួងពាណិជ្ជកម្មបានចាប់ផ្តើមដាក់ឱ្យដំណើរការ CambodiaTrade ដែលជាផ្សារពាណិជ្ជកម្មតាមប្រព័ន្ធអេឡិចត្រូនិក (e-commerce marketplace) ដើម្បីជួយដល់សហគ្រាសធុនតូច និងមធ្យមអាចដាក់លក់ផលិតផលរបស់ខ្លួនលើផ្សារនេះ។ នេះបើតាមសេចក្តីប្រកាសព័ត៌មាន។
បច្ចុប្បន្នផ្សារត្រូវបានបើកសម្រាប់ការចុះឈ្មោះជាមុនទៅដល់សហគ្រាសធុនតូច និងមធ្យម ដែលមានបំណងចង់លក់ផលិតផលនៅលើទីផ្សារនេះ។ ផ្សារពាណិជ្ជកម្មតាមប្រព័ន្ធអេឡិចត្រូនិកត្រូវបានប្រតិបត្តិការតាមរយៈគេហទំព័រ CambodiaTrade.com ក្រោមការគ្រប់គ្រងរបស់ក្រសួងពាណិជ្ជកម្ម។
CambodiaTrade ត្រូវបានបង្កើតឡើងក្នុងគោលបំណងដើម្បីជួយដល់សហគ្រាសធុនតូច និងមធ្យមនៅកម្ពុជាក្នុងការលក់ផលិតផលតាមប្រព័ន្ធអនឡាញដល់អតិថិជនសក្តានុពលទាំងក្នុងស្រុក និងទីផ្សារក្រៅស្រុក។ នេះបើតាមសេចក្តីប្រកាសព័ត៌មាន។
ដើម្បីមានសិទ្ធិប្រើប្រាស់ផ្សារនេះសហគ្រាសធុនតូច និងមធ្យមត្រូវតែបំពេញតាមលក្ខន្តិកៈតម្រូវ គឺជាក្រុមហ៊ុន ឬសហគ្រាសដែលបានចុះឈ្មោះជាផ្លូវការជាមួយក្រសួងពាណិជ្ជកម្ម ឬមានលិខិតអនុញ្ញាតប្រកបអាជីវកម្ម មានវិញ្ញាបនបត្រពន្ធប៉ាតង់ (Patent Certificate) និងលេខអត្តសញ្ញាណសារពើពន្ធ (VAT Certificate) ដែលមានសុពលភាព និងលក់ផលិតផលដែលផលិតនៅក្នុងប្រទេសកម្ពុជា។
ការចុះឈ្មោះជាមុននឹងអនុញ្ញាតឱ្យសហគ្រាសធុនតូច និងមធ្យមអាចចុះឈ្មោះជាមួយ CambodiaTrade.com ហើយបញ្ចូលរាល់ព័ត៌មានដែលចាំបាច់ និងឯកសារផ្សេងៗដើម្បីបានទទួលការពិនិត្យ និងអនុម័តទៅលើការចុះឈ្មោះ។ នេះបើតាមសេចក្តីប្រកាសព័ត៌មាន។
សេចក្តីប្រកាសព័ត៌មានឱ្យដឹងទៀតថា៖ «នៅពេលការចុះឈ្មោះរបស់លោកអ្នកត្រូវបានអនុម័ត សហគ្រាសធុនតូច និងមធ្យមអាចបំពេញស្តុករបស់ខ្លួនដោយបង្ហោះផលិតផលពួកគេនៅលើទំព័រហាងរបស់ខ្លួន។ ផលិតផលទាំងនោះនឹងត្រូវបានដាក់បង្ហាញនៅលើផ្សារនៅពេលដែលផ្សារត្រូវបានដាក់ឱ្យដំណើរការជាផ្លូវការ»។
វិស័យឯកជនស្វាគមន៍ និងគាំទ្រចំពោះក្រសួងដែលដាក់ឱ្យប្រើប្រាស់ផ្សារពាណិជ្ជកម្មតាមប្រព័ន្ធអេឡិចត្រូនិកនៅពេលនេះ។
កញ្ញា ថូង ធីតា នាយិកាគ្រប់គ្រងក្រុមហ៊ុន ថូង ត្រេឌីង ឯ.ក ដែលជាក្រុមហ៊ុនកែច្នៃអំបិលកំពត-កែបបានឱ្យដឹងថា នេះជាការប្រសើរសម្រាប់ទស្សនវិស័យសហគ្រាសធុនតូច និងមធ្យមក្នុងស្រុកដែលវានឹងក្លាយជាវេទិកាដ៏ល្អ ដើម្បីធ្វើអន្តរាគមន៍ដល់ពាណិជ្ជកម្មអេឡិចត្រូនិក ពិសេសសម្រាប់ពាណិជ្ជកម្មឆ្លងព្រំដែន។
កញ្ញា ធីតា ប្រាប់ថា៖ «ប្រការនេះអាចជួយឱ្យសហគ្រាសធុនតូច និងមធ្យមក្នុងស្រុកស្វែងរកទីផ្សារថ្មីដោយស្វែងរកជំនាញ ការគាំទ្រចូលទីផ្សារថ្មី និងឱកាសបើកចំហសេវាកម្ម ឬផលិតផលរបស់ពួកគេ ដើម្បីបង្កើនសកម្មភាពអាជីវកម្មជាអន្តរជាតិ»។
លោកស្រី កែវ មុំ ប្រធានសមាគមសហគ្រិនស្ត្រីកម្ពុជាបានឱ្យដឹងថា នេះជាការគិតគូរដ៏ល្អរបស់ក្រសួងក្នុងការលើកទឹកចិត្តដល់អ្នកផលិតក្នុងស្រុកឱ្យលក់ផលិតផលលើប្រព័ន្ធអនឡាញដែលជាផ្នែកមួយក្នុងការលើកកម្ពស់ផលិតផលក្នុងស្រុក។ លោកស្រីថ្លែងថា៖ «ខ្ញុំសង្ឃឹមថានឹងជួយដល់សហគ្រាសធុនតូច និងមធ្យម និងជំរុញការចែកចាយផលិតផលខ្មែរឱ្យកាន់តែទូលាយនៅលើទីផ្សារ ទាំងថ្នាក់ជាតិ និងអន្តរជាតិ»។
លោកស្រីបានបន្ថែមថា ការបញ្ជាទិញទំនិញតាមប្រព័ន្ធឌីជីថលនៅលើពិភពលោកកំពុងពេញនិយមខ្លាំងដែលនេះជាឱកាសក្នុងការផ្សព្វផ្សាយផលិតផលក្នុងស្រុកទៅទីផ្សារអន្តរជាតិ។
លោកស្រីលើកឡើងថា៖ «ខ្ញុំសូមអំពាវនាវដល់ក្រសួងបង្កើនការផ្សព្វផ្សាយផ្សារពាណិជ្ជកម្មតាមប្រព័ន្ធអេឡិចត្រូនិកឱ្យទូលំទូលាយបន្ថែមទៀត ដើម្បីឱ្យមានការចូលរួមពីវិស័យឯកជនផុសផុលក្នុងការជំរុញផលិតផលខ្មែរដាក់លក់នៅលើអនឡាញ»។
ផ្សារនេះត្រូវបានបង្កើតឡើងដោយមានការគាំទ្រផ្នែកហិរញ្ញវត្ថុពីកម្មវិធីពង្រឹងក្របខ័ណ្ឌសមាហរណកម្ម នៅក្រោមគម្រោងអភិវឌ្ឍន៍ពាណិជ្ជកម្មតាមប្រព័ន្ធអេឡិចត្រូនិកកម្ពុជា ដោយមានគោលបំណងក្នុងការជំរុញឱ្យទទួលបានអត្ថប្រយោជន៍ពីពាណិជ្ជកម្មតាមប្រព័ន្ធអេឡិចត្រូនិកសម្រាប់សហគ្រាសធុនតូច និងមធ្យម។
បច្ចុប្បន្នសហគ្រាសធុនតូច និងមធ្យមមានចំនួន ៥២ ១៥៤ មូលដ្ឋាននៅកម្ពុជា។ នេះបើតាមរបាយការណ៍របស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍៕ LA