ភ្នំពេញៈ វិបត្តិសុខភាពជាសកលបាននាំឱ្យតម្លៃនាំចូលផលិតផលស្រាបៀរ និងស្រាចម្រុះកាលពីឆ្នាំ ២០២០ មានប្រមាណ ១៨ លានដុល្លារធ្លាក់ចុះជិតពាក់កណ្តាល បើធៀបនឹងរយៈពេលដូចគ្នាឆ្នាំ ២០១៩។ នេះបើតាមទិន្នន័យរបស់ក្រសួងពាណិជ្ជកម្ម។
ទិន្នន័យបានបង្ហាញថា នៅក្នុងឆ្នាំ ២០២០ ប្រទេសកម្ពុជាបាននាំចូលស្រាបៀរ និងស្រាចម្រុះមកផ្គត់ផ្គង់ឱ្យទីផ្សារក្នុងស្រុកក្នុងតម្លៃជាប្រាក់ ១៧, ៨៩ លានដុល្លារ ធ្លាក់ចុះ ៤៩,៧៨ ភាគរយបើធៀបនឹងឆ្នាំ ២០១៩ ដែលមានចំនួន ៣៥,៦១ លានដុល្លារ។
អ្នកស្រី ច័ន្ទ ដាវី ស្ថាបនិកក្រុមហ៊ុន Far East Import Export Co, Ltd ដែលជាក្រុមហ៊ុននាំចូលស្រាក្រហម Peng Wine បានកត់សម្គាល់ថា វិបត្តិជំងឺកូវីដ ១៩ ជាសកលបានជះឥទ្ធិពលយ៉ាងខ្លាំងដល់ឧស្សាហកម្មនាំចូលស្រាដែលបាននិងកំពុងរងផលប៉ះពាល់ដល់ទីផ្សារយ៉ាងខ្លាំងរហូតមកដល់ពេលនេះ។
អ្នកស្រី ដាវី បានឱ្យដឹងថា៖ «យើងបាននាំចូលស្រាក្រហមមកពីប្រទេសស៊ីលី (Chile) តាំងពីមុនផ្ទុះជំងឺកូវីដ ១៩ រហូតមកដល់ពេលនេះ យើងលក់មិនទាន់ចេញនោះទេ»។
លោក ហេង នឿន បុគ្គលិកផ្នែកគណនេយ្យនៃក្រុមហ៊ុនភ្នំពេញបៀរ បានឱ្យដឹងថា សូម្បីទីផ្សារស្រាបៀរក្នុងស្រុកក៏រងផលប៉ះពាល់ ដោយសារការរីករាលដាលជំងឺកូវីដ ១៩ ដែរ។ ក្តីបារម្ភពីការឆ្លងរាលដាលជំងឺកូវីដ-១៩ បានធ្វើឱ្យវិស័យទេសចរណ៍ និងសេវាកម្សាន្តផ្សេងៗថមថយ ហេតុនេះតម្រូវការស្រាបៀរក៏ធ្លាក់ចុះទៅតាមនោះដែរ។
លោកអះអាងថា៖ «ជំងឺកូវីដ ១៩ ធ្វើឱ្យមានវិបត្តិសេដ្ឋកិច្ចពិភពលោក ដែលនាំឱ្យគេមាននិន្នាការកាត់បន្ថយការចំណាយលើទំនិញមិនចាំបាច់»។
របាយការណ៍ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បង្ហាញថា នៅកម្ពុជាមានក្រុមហ៊ុនផលិតស្រាបៀរ និងភេសជ្ជៈចុះបញ្ជីនៅក្រសួងចំនួន ១៣ រួមមាន ក្រុមហ៊ុន Inter-Mattrid Beverage (Cambodia) Co Ltd, ក្រុមហ៊ុន Hanuman Beverages Co Ltd, ក្រុមហ៊ុន Vattanac Brewery Co Ltd, Ana Water and ក្រុមហ៊ុន Smiler Beverage Co Ltd, ក្រុមហ៊ុន Asian Sunrise Co Ltd, ក្រុមហ៊ុន HEINEKEN (Cambodia) Co Ltd, ក្រុមហ៊ុន Cambrew Ltd, Daun Penh Food and Be-verage Co Ltd, ក្រុមហ៊ុន Khmer Beverage Co Ltd, ក្រុមហ៊ុន Far East Import Export Co Ltd, ក្រុមហ៊ុន Kingdom Breweries (Cam-bodia) Ltd, ក្រុមហ៊ុន Media GB Enterprise Co Ltd, and ក្រុមហ៊ុន Phnom Penh Beer Co Ltd។
របាយការណ៍ពីអគ្គនាយកដ្ឋានគយ និងរដ្ឋាករកម្ពុជាបង្ហាញថា ចាប់ពីខែមករា ដល់ខែមីនា ឆ្នាំ ២០២១ អគ្គនាយកដ្ឋានគយ និងរដ្ឋាករ ប្រមូលចំណូលបាន ៦១៤,៨ លានដុល្លារ ថយចុះ ១៥,២ ភាគរយ ធៀបត្រីមាសទី១ ឆ្នាំ ២០២០។
ចំណូលប្រចាំត្រីមាសទី១ ឆ្នាំនេះបើគិតតាមក្រុមប្រភេទទំនិញ គឺចំណូលពីយានយន្ត និងគ្រឿងចក្រមាន ចំនួន ៤៣,៥ ភាគរយនៃចំណូលសរុប ទំនិញចម្រុះ ២៧,៤ ភាគរយ ផលិតផលតេលសិលា (ប្រេងសាំង ប្រេងម៉ាស៊ូត និងប្រេងរំអិល) មាន ២២,៨ ភាគរយ និងសម្ភារសំណង់ និងកម្រៃផ្សេងៗមាន ៦,៣ ភាគរយ៕ LA