ភ្នំពេញៈ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានជ្រើសរើសក្រុមហ៊ុនក្នុងស្រុកចំនួន ៣ ជាសហគ្រាសគំរូនៃការអនុវត្តគម្រោងប្រព័ន្ធផលិតកម្ម «LEAN» ដែលជួយលើកកម្ពស់ផលិតភាពក្នុងចង្វាក់ផលិតកម្មរបស់ខ្លួន។
ក្នុងសិក្ខាសាលាផ្សព្វផ្សាយថ្នាក់ជាតិស្តីពី «វដ្ដនៃគុណភាព នវានុវត្តន៍ និងប្រព័ន្ធផលិតកម្ម LEAN ដើម្បីលើកកម្ពស់ផលិតភាពសហគ្រាសធុនតូច និងមធ្យម (SME) កាលពីថ្ងៃទី ១៤ ខែមិថុនានេះ លោក ចម ប្រសិទ្ធ រដ្ឋមន្ត្រីក្រសួង ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានអះអាងថា ក្រសួងបានសាកល្បងអនុវត្តគម្រោងផ្តោតលើប្រព័ន្ធផលិតកម្ម LEAN (LEAN Manufacturing) លើក្រុមហ៊ុនគំរូចំនួន ៣ ក្នុងរយៈពេលជាង ១ ឆ្នាំមកនេះ។
ក្រុមហ៊ុនទាំង ៣ ដែលអនុវត្តជោគជ័យតាមប្រព័ន្ធផលិតកម្ម LEAN រួមមាន ក្រុមហ៊ុន Cambodia Chemical Supply Co., Ltd (ថ្នាំពណ៌ជាតិ) ក្រុមហ៊ុន LyLy Food Industry Co., Ltd (ផលិតនំ ស្រួយ) និងក្រុមហ៊ុន Eurotech Import & Export Co., Ltd (ផលិតទឹកពិសា)។
លោករដ្ឋមន្ត្រីពន្យល់ថា ប្រព័ន្ធផលិតកម្ម LEAN គឺផ្តោតលើការបង្កើនសកម្មភាពផលិត និងបង្កើនតម្លៃបន្ថែមសម្រាប់អតិថិជនរបស់ខ្លួន ហើយកាត់បន្ថយសកម្មភាពពុំបានផ្តល់តម្លៃបន្ថែមឱ្យនៅទាបបំផុត។ កន្លងមក សកម្មភាពផ្តល់តម្លៃបន្ថែម( Value-Added Activities) តាមក្រុមហ៊ុននានាមានមិនដល់ ៣ ភាគរយនោះទេ ផ្ទុយទៅវិញគេបានចំណាយដល់ ៩៧ ភាគរយលើសកម្មភាពដែលពុំបានផ្តល់តម្លៃបន្ថែមជូនអតិថិជនដែលនេះជាការខាតបង់យ៉ាងច្រើន។
លោកនិយាយថា៖ «ប្រសិនបើ សហគ្រាសយើងអាចបង្កើនសកម្មភាពផ្តល់តម្លៃបន្ថែមដល់ ៥ ភាគរយ ឬ ១០ ភាគរយនោះ សហគ្រាសយើងនឹងក្លាយជាសហគ្រាសឆ្នើមមិនខាន»។
លោកស្រី កែវ មុំ អគ្គនាយិកា ក្រុមហ៊ុន LY LY Food Industry ដែលជាក្រុមហ៊ុនមួយត្រូវបានជ្រើសរើសសហគ្រាសគំរូ ប្រាប់ភ្នំពេញប៉ុស្តិ៍នៅថ្ងៃទី ១៦ មិថុនានេះថា ប្រព័ន្ធផលិតកម្ម LEAN មានប្រយោជន៍ជួយកាត់បន្ថយថ្លៃដើមផលិត។
លោកស្រីថ្លែងថា៖ «ប្រសិនសហគ្រាសនីមួយៗមិនបានអនុវត្តប្រព័ន្ធផលិតកម្ម LEAN នោះទេ អាជីវកម្មគាត់នឹងពិបាកទទួលបានជោគជ័យ ដោយសារកង្វះការយល់ដឹងនៃការកាត់បន្ថយថ្លៃដើមផលិតកម្ម»។
ការអនុវត្តប្រព័ន្ធផលិតកម្ម LEAN ទទួលបានការគាំទ្រពីមជ្ឈមណ្ឌលផលិតភាពជាតិនៃក្រសួងឧស្សាហកម្ម និងសហការជាមួយអង្គការផលិតភាពអាស៊ី (APO) ក្នុងការផ្តល់ការប្រឹក្សាយោបល់លើកិច្ចការនេះ។
លោកថ្លែងទៀតថា៖ «ទោះបីមានវិបត្តិសុខភាពសកល ក៏ក្រសួងនៅតែបន្តស្វះស្វែងរកវិធីសាស្ត្រ ដើម្បីជួយស្តារស្ថានភាពសេដ្ឋកិច្ចរបស់ក្រុមហ៊ុន និងសហគ្រាសធុនតូច និងមធ្យមនៅកម្ពុជា»៕ LA