.jpg)
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ក្នុងជំនួបជាមួយលោក Bjorn Haggmark ឯកអគ្គរាជទូតប្រទេសស៊ុយអែតប្រចាំនៅកម្ពុជា កាលពីថ្ងៃទី ១៥ មិថុនា។ រូបថត ក្រសួងពាណិជ្ជកម្ម
ភ្នំពេញៈ រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ បានស្នើឯកអគ្គរាជទូតប្រទេសស៊ុយអែតប្រចាំកម្ពុជាឱ្យជួយជំរុញវិនិយោគិនស៊ុយអែតនៃក្រុមហ៊ុនផលិតគ្រឿងសង្ហារិម IKEA និងក្រុមហ៊ុនផលិតរថយន្ត Volvo មកស្វែងរកឱកាសធុរកិច្ចនៅកម្ពុជា។
សំណើនេះត្រូវបានធ្វើឡើងនៅជំនួបទ្វេភាគីជាមួយលោក Bjorn Haggmark ឯកអគ្គរាជទូតប្រទេសស៊ុយអែតប្រចាំនៅកម្ពុជា ដែលជិតផុតអាណតិ្តកាលពីថ្ងៃទី ១៥ ខែមិថុនា ឆ្នាំនេះ ដោយបានពិភាក្សាផ្លាស់ប្តូរយោបល់គ្នាអំពីការលើកកម្ពស់ប្រព័ន្ធពាណិជ្ជកម្មពហុភាគី។
លោក ប៉ាន សូរស័ក្តិ បានស្នើឯកអគ្គរាជទូតស៊ុយអែតជួយជំរុញធុរកិច្ចស៊ុយអែតមកស្វែងរកឱកាសវិនិយោគនៅកម្ពុជា ពិសេសក្រុមហ៊ុនរថយន្ត Volvo និងក្រុមហ៊ុន IKEA ដែលជាក្រុមហ៊ុនផលិតគ្រឿងសង្ហារិម។ ជាមួយគ្នានេះវិនិយោគិនស៊ុយអែតក៏អាចស្វែងរកឱកាសវិនិយោគលើការកែច្នៃចំណីអាហារ និងផ្លែឈើត្រូពិកផងដែរ។
លោកបន្ថែមថា ឧស្សាហកម្មកែច្នៃគ្រឿងសង្ហារិម គ្រឿងផ្គុំ និងគ្រឿងបន្លាស់យានយន្តក៏កំពុងមានកំណើនខ្ពស់ក្នុងរយៈពេលប៉ុន្មានឆ្នាំចុងក្រោយនេះ។
លោកបានថ្លែងថា៖ «ខ្ញុំជឿថា ស្ថានទូតស៊ុយអែតប្រចាំកម្ពុជាដែលមាននិវេសនដ្ឋាននៅក្រុងបាងកកនឹងបន្តកិច្ចសហប្រតិបត្តិការល្អជាមួយក្រសួងពាណិជ្ជកម្មកម្ពុជាក្នុងគោលបំណងលើកកម្ពស់កិច្ចសន្ទនា និងទំនាក់ទំនងពាណិជ្ជកម្មកម្ពុជា-ស៊ុយអែត»។
អនុប្រធានសភាពាណិជ្ជកម្មកម្ពុជា លោក លឹម ហេង បានកត់សម្គាល់ថា ទំនាក់ទំនងរវាងប្រទេសទាំង ២ នៅមានកម្រិតទាបដែលទាមទារឱ្យមានការជំរុញកិច្ចសហប្រតិបត្តិការបន្ថែមទៀត។ លោកបន្ថែមទៀតថា កម្ពុជានឹងក្លាយទៅជាទិសដៅវិនិយោគកាន់តែទាក់ទាញតាមរយៈកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-ចិន និងកម្ពុជា-កូរ៉េ ជាដើម។
លោកប្រាប់ថា៖ «នេះគឺជាឱកាសសម្រាប់របស់គាត់ ព្រោះកម្ពុជាមានកិច្ចព្រមព្រៀងពាណិជ្ជកម្មសេរីទ្វេភាគីមួយចំនួនដែលនេះជាកាលានុវត្តភាពសម្រាប់វិនិយោគិន»។
លោកបន្តថា បើទោះសកម្មភាពនៃការទាក់ទាញវិនិយោគិនពីបរទេសរបស់កម្ពុជាមានភាពរអាក់រអួលបន្តិច ក្នុងរយៈពេលប៉ុន្មានខែកន្លងមកនេះ ប៉ុន្តែក្រុមប្រឹក្សាអភិវឌ្ឍន៍កម្ពុជានៅតែបន្តអនុម័តគម្រោងវិនិយោគិនជាបន្តបន្ទាប់។
យោងតាមទិន្នន័យពីក្រសួងពាណិជ្ជកម្ម ទំហំពាណិជ្ជកម្មទ្វេភាគីកម្ពុជា-ស៊ុយអែត កាលពីឆ្នាំ ២០២០ មានតម្លៃត្រឹមតែ ៦៤ លានដុល្លារ ខណៈទំហំពាណិជ្ជកម្មទ្វេភាគីរវាងប្រទេសទាំង ២ នៅក្នុងរយៈពេល ៥ ខែ ដើមឆ្នាំ ២០២១ មានតម្លៃ ២៣ លានដុល្លារ៕ LA
