ភ្នំពេញៈ ស្ថានទូតចិនប្រចាំនៅកម្ពុជាបានឱ្យដឹងថា កម្ពុជាអាចនាំចេញផលិតផលជលផល ៤ ប្រភេទទៅកាន់ទីផ្សារចិន។
ក្រោមការជំរុញរបស់ស្ថានទូតចិនប្រចាំកម្ពុជា ក្រុមហ៊ុននាំចេញជលផលចំនួន ២ ក្នុងប្រទេសកម្ពុជា ត្រូវបានចុះបញ្ជីដោយជោគជ័យជាមួយរដ្ឋបាលគយប្រទេសចិន។ ប៉ុន្តែឈ្មោះក្រុមហ៊ុនមិនត្រូវបានបង្ហាញនោះទេ។ នេះបើតាមទំព័រហ្វេសប៊ុករបស់ស្ថានទូតចិននៅកម្ពុជា។
ស្ថានទូតចិនប្រចាំនៅកម្ពុជាបានឱ្យដឹងទៀតថា កម្ពុជាអាចនាំចេញជលផលចំនួន ៤ ប្រភេទទៅកាន់ទីផ្សារប្រទេសចិន រួមមាន បង្កងប៉ាក (Oratosquilla Squilla) អន្ទង់ (Monopterus) ត្រីរស់ (Monopterus) និងខ្យង (Chicoreus)។
ស្ថានទូតចិនប្រចាំនៅកម្ពុជាបន្តថា៖ «ជាមួយគ្នានេះ រដ្ឋបាលគយបានសង្កត់ធ្ងន់ថា ស្ថិតក្នុងស្ថានភាពនៃជំងឺកូវីដ ១៩ សូមភាគីកម្ពុជាពង្រឹងការត្រួតពិនិត្យបន្ថែមទៀតលើជលផលដែលនាំចេញទៅកាន់ប្រទេសចិន ត្រូវប្រកាន់ខ្ជាប់កិច្ចទប់ស្កាត់លើវីរុសនេះឱ្យបានល្អប្រសើរ បុគ្គលិកក្រុមហ៊ុនត្រូវអនុវត្តតាមលក្ខខណ្ឌទប់ស្កាត់ជំងឺកូវីដ ១៩ ឱ្យបានម៉ឺងម៉ាត់ ដើម្បីចៀសវាងការបំពុលដល់ជលផល និងការវេចខ្ចប់ខាងក្រៅ»។
ប្រទេសកម្ពុជាបាននាំចេញផលនេសាទសរុប ៣ ៥៩០ តោនទៅកាន់ទីផ្សារអន្តរជាតិក្នុងតម្លៃសរុបជាង ៨,៣៣ លានដុល្លារកាលពីឆ្នាំ ២០២០ ធ្លាក់ ៧៤,៥៣ ភាគរយ បើធៀបទៅនឹងឆ្នាំ ២០១៩ ដែលមានចំនួន ១៤ ១០០ តោន។ នេះបើយោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ក្នុងឆ្នាំ ២០២០ កន្លងមកកម្ពុជាប្រមូលផលជលផលបានចំនួនសរុប ៩៣៦ ៣០០ តោនដោយក្នុងនោះ ផលិតផលទឹកសាបមានចំនួន ៤១៣ ២០០ តោន ផលនេសាទសមុទ្រ ១២២ ៧០០ តោន និងផលវារីវប្បកម្មចំនួន ៤០០ ៤០០ តោន។
តម្លៃសរុបនៃផលិតផលទឹកសាប និងសមុទ្រក្នុងឆ្នាំ ២០២០ មានចំនួន ១,០៧ ពាន់លានដុល្លារ និងតម្លៃសរុបនៃផលិតផលវារីវប្បកម្មមានចំនួន ៨០០,៨ លានដុល្លារ។ នេះបើតាមលោក វេង សាខុន៕