.jpg)
ក្នុងរយៈពេលខួប ១ ឆ្នាំនៃការដាក់ឱ្យប្រើប្រាស់ជាផ្លូវការនូវប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានក្រុមហ៊ុនជាង ៦ ពាន់ត្រូវបានអនុម័តដែលមានទំហំទឹកប្រាក់ជាង ២,៦ ពាន់លានដុល្លារ។ ហុង មិនា
ភ្នំពេញៈ ក្នុងរយៈពេលខួប ១ ឆ្នាំនៃការដាក់ឱ្យប្រើប្រាស់ជាផ្លូវការនូវប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានក្រុមហ៊ុនជាង ៦ ពាន់ត្រូវបានអនុម័តដែលមានទំហំទឹកប្រាក់ជាង ២,៦ ពាន់លានដុល្លារ។ នេះបើតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ។
រដ្ឋាភិបាលបានដាក់ឱ្យប្រើប្រាស់ជាផ្លូវការនូវប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានកាលពីថ្ងៃទី ១៥ ខែមិថុនា ឆ្នាំ ២០២០ គិតមកដល់ពេលនេះគឺមានរយៈពេល ១ ឆ្នាំគត់។
សេចក្តីប្រកាសព័ត៌មានបន្តថា គិតត្រឹមថ្ងៃទី ១៤ ខែមិថុនា ចំនួនពាក្យស្នើសុំ ចំនួន ៦ ១៦៤ សំណើត្រូវបានអនុម័តជាមួយនឹងទំហំដើមទុនសរុប ២ ៦៣១ លានដុល្លារ។ ក្នុងនោះពាក្យស្នើសុំចំនួន ៨១០ កំពុងត្រួតពិនិត្យ។
អាជីវកម្មចុះបញ្ជីត្រូវបានអនុម័តរួមមាន អាហរ័ណនីហរ័ណ ទិញលក់ ជួសជុលយានយន្ត និងទោចក្រយានយន្តគ្រប់ប្រភេទ (៣៨,១១%) សកម្មភាពអចលនវត្ថុ (១០,២៩%) កម្មន្តសាស (៨,៥៨%) សកម្មភាពសេវាកម្មស្នាក់នៅ និងអាហារ (៨,៤៧%) សកម្មភាពអាជីវកម្មវិជ្ជាជីវៈ វិទ្យាសាស្ត្រ និងបច្ចេកទេស (៧,៦ %) និងវិស័យផ្សេងទៀត (២៧,៥៥%)។
ជាមួយគ្នានេះ ការស្នើសុំចុះបញ្ជីបម្រុងនាមករណ៍ចំនួន ៥ ៦៣៧ សំណើត្រូវបានអនុម័តក្នុងនោះ ២៧០ កំពុងត្រួតពិនិត្យ និង ១ ករណីត្រូវបានបដិសេធសំណើ។
ប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានមានលក្ខណពិសេស ៣ ដូចជា កាត់បន្ថយនីតិវិធីតាមរយៈតភ្ជាប់គ្នារវាងក្រសួងពាណិជ្ជកម្ម ក្រសួងការងារ និងបណ្តុះបណ្តាលវិជ្ជាជីវៈ និងបង្កើតការចុះបញ្ជីជាកញ្ចប់ក្នុងពេលតែមួយនៅលើថ្នាលតែមួយ កាត់បន្ថយពេលវេលាមកត្រឹម ៨ ថ្ងៃនៃថ្ងៃធ្វើការ និងកាត់បន្ថយការចំណាយថវិកាប្រមាណ ៤០ ភាគរយ បើធៀបនឹងនីតិវិធីចាស់៕
