ភ្នំពេញៈ លោកនាយករដ្ឋមន្ត្រី ហ៊ុន សែន បានឱ្យដឹងថា កម្ពុជាទទួលបានចំណូលពីពន្ធគយ និងពន្ធដារប្រមាណ ៣ ពាន់លានដុល្លារក្នុងរយៈពេល ៧ ខែ ដើមឆ្នាំ ២០២១ នេះ។
លោក ហ៊ុន សែន បានថ្លែងដូចនេះក្នុងឱកាសផ្សាយបន្តផ្ទាល់បើកយុទ្ធនាការចាក់ថ្នាំបង្ការជំងឺកូវីដ ១៩ ដល់កុមារ និងយុវវ័យពីអាយុ ១២ ឆ្នាំ ដល់ ១៨ ឆ្នាំនៅថ្ងៃទី ១ ខែសីហា ឆ្នាំ ២០២១។
លោកថ្លែងទៀតថា ក្នុងរយៈពេល ៧ ខែដើមឆ្នាំ ២០២១ នេះ ការប្រមូលចំណូលពន្ធដារ និងចំណូលពន្ធគយ (មិនគិតពីចំណូលសារពើពន្ធ) បានចំនួន ៣ ០៦១ លានដុល្លារ ក្នុងនោះចំណូលពីពន្ធដារមានចំនួន ១៧១៦ លានដុល្លារស្មើនឹង ៧៦,៥៥ ភាគរយនៃផែនការ និងចំណូលពន្ធគយបានចំនួន ១ ៣៤៥ លាន ស្មើនឹង ៥៦,៩ ភាគរយនៃផែនការ។
លោកលើកឡើងថា៖ «យើងនៅសល់ពេល ៥ ខែទៀត យ៉ាងហោចណាស់ក៏យើងប្រមូលចំណូលបាន ២ ពាន់លានទៀតដែរ អ៊ីចឹងក្នុង ១ ឆ្នាំ យើងទទួលបានចំណូលប្រមាណ ៥ ពាន់លានដុល្លារ ហើយជាមធ្យមយើងទទួលបានប្រមាណ ៤០០ លានដុល្លារក្នុង ១ ខែ។ បើទោះបីប្រាក់ខែមន្ត្រីរាជការមិនបានដំឡើង ក៏ការបើកប្រាក់ខែក្នុង ១ ខែ ២ ដងដដែល ហើយចូល-ឆ្នាំខ្មែរ និងបុណ្យភ្ជុំឧបត្ថម្ភ កុំគិតថា រាជរដ្ឋាភិបាលនេះកញ្ជើ-ធ្លុះ មិនមែនកញ្ជើធ្លុះទេ»។
លោកអះអាងថា ចំណែកប្រភពចំណូលទី ២ របស់កម្ពុជាបានមកពីការសន្សំចំនួនជាង ៣ ពាន់លានដុល្លារទៀតតាំងពីមុនពេលមានជំងឺកូវីដ ១៩ មកដល់។ លោកបញ្ជាក់ថា៖ «យើងទទួលស្គាល់រហូតមកដល់ពេលនេះយើងបានចាយអស់ ១ ភាគ ៣ ទៅហើយ បានសេចក្តីថាយើងបានចាយអស់ជាង ១ ពាន់លានដុល្លារ។ ឥឡូវយើងនៅសល់សាច់ប្រាក់ប្រមាណ ២ ពាន់លានដុល្លារ ដោយយើងមិនបានរំខានដល់ប្រាក់ ២០ ពាន់លានដុល្លារ និងមាសរាប់សិបតោនដែលជាប្រាក់បម្រុងអន្តរជាតិនោះទេ»។
លោកឱ្យដឹងទៀតថា ប្រាក់ចំណូលទាំងនេះ មួយផ្នែកយកទៅប្រើប្រាស់លើយុទ្ធនាការចាក់វ៉ាក់សាំងការពារជំងឺកូវីដ ១៩ និងចំណាយលើគម្រោងអភិវឌ្ឍន៍នានា ពិសេសហេដ្ឋារចនាសម្ព័ន្ធផ្លូវថ្នល់ និងអគ្គិសនី។
លោកថ្លែងថា៖ «យើងមិនគ្រាន់តែចាយទៅលើការប្រយុទ្ធប្រឆាំងកូវីដ ១៩ នោះទេ សូម្បីតែវិនិយោគលើហេដ្ឋារចនាសម្ព័ន្ធក៏យើងនៅបន្តចាយជាក់ស្តែងកូវីដ ២៩ នៅតែបន្តរីករាលដាល យើងនៅតែបន្តធ្វើផ្លូវថ្នល់នៅព្រះសីហនុ និងផ្លូវ ៣៨ ខ្សែនៅខេត្តសៀមរាប។ រហូតមកដល់ពេលនេះ យើងមិនទាន់ស្នើសុំទៅម្ចាស់ជំនួយនូវការផ្អាកការសងប្រាក់កម្ចីនោះទេ យើងនៅតែបន្តសងគេដដែលនាពេលនេះ»។
លោក ខេន លូ អគ្គលេខាធិការសមាគមរោងចក្រកាត់ដេរកម្ពុជាបានប្រាប់ភ្នំពេញប៉ុស្ដិ៍ថា វាយនភណ្ឌ និងសម្លៀកបំពាក់ គឺជាទីផ្សារកើនឡើងរហ័ស ដោយសារកំណើនរបស់ប្រជាជន និងអ្នកមានទ្រព្យសម្បត្តិច្រើនកើនជាបន្តបន្ទាប់។
ទោះបីយ៉ាងណា ទីផ្សារលក់រាយបានផ្លាស់ប្តូរពី «ការផលិតក្នុងចំនួនច្រើន» ទៅជា «ក្រុមតូចៗដែលមានវដ្ដជីវិតរយៈពេលខ្លី ការផលិតម៉ូដទាន់សម័យរហ័ស» និងស្ថិតក្រោមសម្ពាធរបស់អតិថិជន ព្រមទាំងការកើនឡើងការទិញទំនិញតាមអនឡាញជាដើម។
លោកបន្ថែមថា៖ «នៅឆ្នាំនេះយើងសំណាងដោយទទួលបានការបញ្ជាទិញមួយចំនួនពីប្រទេសមីយ៉ាន់ម៉ា។ យើងនឹងមានកំណើនកាន់តែច្រើន បើមិនមានការផ្ទុះឡើងព្រឹត្តិការណ៍សហគមន៍ ២០ កុម្ភៈ»។
ការនាំចេញរបស់កម្ពុជាក្នុងឆ្នាំ ២០២០ សម្រេចបាន ១៧ ២១៥,៣៧ លានដុល្លារ កើនឡើង ១៦,៧២ ភាគរយធៀបនឹងឆ្នាំ ២០១៩ ។ នេះបើយោងតាមទិន្នន័យរបស់ក្រសួងពាណិជ្ជកម្ម៕ LA