ទីក្រុងហាណូយៈ ក្រុមហ៊ុនទូរគមនាគមន៍ធំៗរបស់វៀតណាម រួមមាន Viettel, VNPT, Mobifone, CMC, FPT, Vietnamobile និង SCTV បានចេញប្រកាសរួមគ្នាផ្តល់នូវកញ្ចប់ជំនួយរួមគ្នាដែលមានតម្លៃ ១០ ០០០ ពាន់លានដុង (៤៣៥ លានដុល្លារអាមេរិក) សម្រាប់អ្នកប្រើប្រាស់ទូទាំងប្រទេស។
កញ្ចប់ដែលនឹងដាក់ឱ្យដំណើរការចាប់ពីថ្ងៃទី ៥ ខែសីហា និងបញ្ចប់នៅខែវិច្ឆិកានឹងបង្កើនល្បឿនទ្វេដងនៃសេវាកម្មខ្សែកាបអ៊ីនធឺណែតសម្រាប់អ្នកប្រើប្រាស់អ៊ីនធឺណិតទាំងអស់។ ក្រុមហ៊ុនទូរគមនាគមន៍ក៏នឹងផ្តល់ឱ្យអ្នកប្រើប្រាស់នូវទិន្នន័យ ៥០ ភាគរយនៃទិន្នន័យទូរស័ព្ទចល័តរបស់ពួកគេ ដោយមិនគិតថ្លៃបន្ថែម ខណៈពេលដែលកាត់បន្ថយថ្លៃដើមពាក់កណ្តាលនៃកញ្ចប់ទិន្នន័យពេញនិយមបំផុត។
រាល់ការចូលទៅកាន់គេហទំព័រដែលមានព័ត៌មានជំងឺកូវីដ ១៩ ដូចជាក្រសួងសុខាភិបាល និងគេហទំព័រ Bluezone ដែលតាមដាន និងរាយការណ៍មេរោគនឹងមិនគិតថ្លៃទេ។ អ្នកប្រើប្រាស់ទូរសព្ទ័នៅក្នុងតំបន់ដែលមានគម្លាតសង្គមមានប្រសិទ្ធិភាពក្រោមការណែនាំរបស់រដ្ឋាភិបាលនឹងទទួលបានការហៅទូរស័ព្ទតាមបណ្តាញដូចគ្នារយៈពេល ៥០ នាទីដោយស្វ័យប្រវត្តិដោយមិនគិតថ្លៃ។
ក្រុមហ៊ុនទូរគមនាគមន៍បាននិយាយថាពួកគេចង់ធ្វើឱ្យមានភាពងាយស្រួលតាមដែលអាចធ្វើទៅបានសម្រាប់មនុស្សធ្វើការ និងសិក្សាពីផ្ទះ ដោយសារវិធានការណ៍ឃ្លាតឆ្ងាយពីសង្គមដែលតឹងរ៉ឹងជាងមុនដែលមាននៅតាមតំបន់ជាច្រើននៃប្រទេសវៀតណាម។
លើសពីនេះក្រុមហ៊ុន Viettel, VNPT និង Mobifone នឹងចូលរួមចំណែកចំនួន ៥ ០០០ ដុង ពីកញ្ចប់ទិន្នន័យនីមួយៗដែលអតិថិជនបានទិញ ឬពង្រីកដល់មូលនិធិជាតិសម្រាប់ប្រយុទ្ធ និងការពារជំងឺកូវីដ ១៩។
ចាប់តាំងពីដើមឆ្នាំ ២០២០ មកក្រុមហ៊ុនទូរគមនាគមន៍នៅវៀតណាមបានដាក់ចេញនូវការបញ្ចុះតម្លៃជាច្រើនកញ្ចប់ជំនួយ និងយុទ្ធនាការយល់ដឹងអំពីជំងឺកូវីដ ១៩ ដែលមានតម្លៃជាងមួយពាន់លានដុល្លារអាមេរិក។ ក្នុងនោះក្រុមហ៊ុនធំៗ បីគឺ Viettel, VNPT និង Mobifone បានរួមចំណែកជាង ៩០០ លានដុល្លារ៕