ធនាគារ ព្រីនស៍ ថ្មីៗនេះបានទទួលពានរង្វាន់ជាធនាគារពាណិជ្ជឆ្នើមនៅកម្ពុជាឆ្នាំ ២០២១ និងជាធនាគារដែលមានភាពច្នៃប្រឌិតល្អបំផុតលើផ្នែកសេវាធនាគារបុគ្គលនៅកម្ពុជាឆ្នាំ ២០២១។ នេះគឺជាឆ្នាំទី ២ របស់ធនាគារ ព្រីនស៍ ហើយដែលទទួលបានពានរង្វាន់ជាធនាគារពាណិជ្ជឆ្នើមនៅកម្ពុជាជាបន្តបន្ទាប់។
យោងតាមប្រសាសន៍របស់លោក ហ៊ន់ សុរចនា ប្រធាននាយកប្រតិបត្តិនៃធនាគារ ព្រីនស៍ ម.ក បានលើកឡើងថា៖ «យើងពិតជាមានសេចក្តីសោមនស្សរីករាយខ្លាំងណាស់ ដែលធនាគារ ព្រីនស៍ ទទួលបានការតែងតាំង និងឈ្នះពានរង្វាន់អន្តរជាតិដ៏មានកិត្យានុភាពចំនួន ២ នេះពីក្នុងវិស័យធនាគារនៅកម្ពុជា។ យើងពិតជាមានកិត្តិយសក្រៃលែងដែលទទួលបានពានរង្វាន់ទាំង ២ នេះ ដែលវាជាសក្ខីភាពមួយបង្ហាញពីការយកចិត្តទុកដាក់ទៅកាន់អតិថិជនរបស់យើង។ ដូច្នេះពានរង្វាន់ទាំង ២ នេះគឺជាគុណតម្លៃរបស់អតិថិជន ដៃគូអាជីវកម្ម និងបុគ្គលិកនៅក្នុងធនាគារ ព្រីនស៍ទាំងអស់ដែលជាផ្នែកមួយធ្វើឱ្យធនាគារ ព្រីនស៍ សម្រេចបាននូវគោលដៅដូចសព្វថ្ងៃ។ ខ្ញុំពិតជាអរគុណដល់អ្នកទាំងអស់គ្នាណាស់ អ្នកទាំងអស់គ្នាគឺជាកម្លាំងជំរុញដែលធ្វើឱ្យធនាគាររបស់យើងមានភាពកាន់តែប្រសើរជាងមុន»។
លោក ហ៊ន់ សុរចនា បានបន្ថែមទៀតថាចាប់តាំងពីយើងបានក្លាយខ្លួនជាធនាគារពាណិជ្ជកាលពី ៣ ឆ្នាំមុនរហូតមកដល់បច្ចុប្បន្ន យើងតែងតែមានការប្តេជ្ញាចិត្ត ខិតខំប្រឹងប្រែងយកចិត្តទុកដាក់ដល់អតិថិជនជានិច្ច។
ដោយទទួលបានការជំរុញពីអតិថិជនយើងក្នុងន័យនេះធនាគារមិនមែនគ្រាន់តែជាកន្លែងដែលអតិថិជនមកធ្វើប្រតិបត្តិការមួយមុខនោះទេ ប៉ុន្តែវាគឺជាការធ្វើដំណើររួមគ្នា ដើម្បីសម្រេចបាននូវគោលដៅហិរញ្ញវត្ថុរបស់អតិថិជន ហើយយើងក៏បានបន្តប្រើប្រាស់យុទ្ធសាស្ត្រដែលផ្តោតសំខាន់លើអតិថិជនតាំងពីពេលនោះមក ដើម្បីបំពេញតម្រូវការហិរញ្ញវត្ថុរបស់ពួកគេ។
ឧទាហរណ៍ កាលពីពេលថ្មីៗនេះ យើងបានដាក់ចេញនូវកម្មវិធី PRINCE MobileBiz និងកម្មវិធី PRINCE Merchants ដែលត្រូវបានបង្កើត និងផ្តល់ជូនជាពិសេសដល់អតិថិជនអាជីវកម្មរបស់យើងបន្ថែមពីលើកម្មវិធី PRINCE Mobile ជាកម្មវិធីធនាគារតាមទូរស័ព្ទដែលមានការរីកចម្រើនជារៀងរាល់ឆ្នាំ ហើយសមិទ្ធផលនេះបានមកពីការប្រែប្រួលនៃប្រព័ន្ធឌីជីថល ដែលជាកត្តាអាចឱ្យយើងបញ្ចូលបច្ចេកវិទ្យាទាំងនោះទៅក្នុងជីវភាពរស់នៅអតិថិជនរបស់យើងបានប្រសើរជាងមុន។
ក្នុងនោះផងដែរ អតិថិជនរបស់យើងបានទទួលស្គាល់ថា វាពិតជាមានសារៈសំខាន់យ៉ាងខ្លាំងក្នុងការធ្វើឱ្យដំណើរការអាជីវកម្មរបស់ពួកគេមានភាពប្រសើរឡើង ជាពិសេសក្នុងការធ្វើអាជីវកម្មប្រភេទឌីជីថលដែលវាពិតជាមានការកើនឡើងគួរឱ្យកត់សម្គាល់ក្នុងអំឡុងពេលជំងឺរាតត្បាតកូវីដ ១៩ នេះ។ កម្មវិធីនេះផងដែរនឹងធ្វើឱ្យអាជីវករទាំងអស់អាចផ្តោតអារម្មណ៍លើបញ្ហាផ្សេងទៀត ដើម្បីទ្រទ្រង់ ឬពង្រីកអាជីវកម្មរបស់ពួកគេបន្ថែមទៀតផងដែរ។
យុទ្ធសាស្ត្រដែលផ្តោតសំខាន់លើអតិថិជនដែលធនាគារ ព្រីនស៍ បានអនុវត្តតាំងពីដំបូងមកបានធ្វើឱ្យយើងអាចបង្កើតទៅជាពាក្យស្លោកថ្មីមួយសម្រាប់ធនាគាររបស់យើងគឺ «យើងប្រឹងប្រែងដើម្បីអ្នក» ហើយពាក្យស្លោកថ្មីនេះ ត្រូវបានយកទៅអនុវត្តនៅគ្រប់ប្រតិបត្តិការរបស់ធនាគារទាំងអស់ដែលមានដូចជា ការអភិវឌ្ឍផលិតផល សេវាកម្មអតិថិជន ការទំនាក់ទំនង និងផ្សព្វផ្សាយ -ល-។
បុគ្គលិកនៃធនាគារ ព្រីនស៍ គ្រប់គ្នាត្រូវធានាបានថា គ្រប់តម្រូវការរបស់អតិថិជនគឺត្រូវបានបំពេញយ៉ាងល្អឥតខ្ចោះ ហើយយើងជឿជាក់ថា តាមរយៈការអនុវត្តបែបនេះ គឺដើម្បីត្រៀមខ្លួនជាស្រេចសម្រាប់បំពេញតម្រូវការជូនដល់អតិថិជន ក៏ដូចជាដើម្បីបំពេញតម្រូវការសម្រាប់ការរីកលូតលាស់នៃវិស័យសេដ្ឋកិច្ចរបស់ប្រទេសយើងផងដែរ។
ជាចុងបញ្ចប់ លោក ហ៊ន់ សុរចនា បានបន្ថែមថា ជាមួយការជំរុញ និងការទទួលស្គាល់តាមរយៈពានរង្វាន់អន្តរជាតិទាំង ២ នេះ ធនាគារ ព្រីនស៍ នឹងបន្តខិតខំដើម្បីក្លាយជាធនាគារដ៏ល្អបំផុតមួយសម្រាប់អតិថិជន ដែលផ្តល់ជូននូវសេវាកម្មក៏ដូចជាផលិតផលកាន់តែប្រសើរឡើង។
សូមអរគុណយ៉ាងជ្រាលជ្រៅដល់អតិថិជនដ៏មានតម្លៃ និងដៃគូសហការទាំងអស់ សម្រាប់ការផ្តល់ឱកាសដល់ធនាគារ ព្រីនស៍ ក្នុងការបំពេញសេវាកម្ម និងជាធនាគារជម្រើសទី ១ របស់លោកអ្នក ហើយក៏សូមអរគុណសម្រាប់ការគាំទ្ររបស់លោកអ្នក៕