បន្ទាប់ពីបានធ្លាក់ចុះដល់កម្រិតទាបត្រឹម ១ ៧៨២ ដុល្លារ ក្នុង ១ អោនស៍ កាលពីថ្ងៃពុធសប្តាហ៍មុននៅក្នុងវគ្គជួញដូរនៅអាស៊ី តម្លៃមាសបានត្រឡប់មកទំនោរកើនឡើងវិញ ដោយសារអត្រាអតិផរណាអាមេរិក និងការបង្កើតការងារនៅសហរដ្ឋអាមេរិក នៅតែធ្វើឱ្យប្រាក់ដុល្លារអាមេរិកស្ថិតនៅក្នុងសម្ពាធរយៈពេលវែង។
គេហទំព័រ ING បានរាយការណ៍កាលពីថ្ងៃអង្គារសប្តាហ៍នេះថា៖ «ទោះបីជាសន្ទស្សន៍ថ្លៃទំនិញសម្រាប់ខែសីហា ដែលជាសូចនាករនៃកម្រិតអតិផរណាសហរដ្ឋអាមេរិកបានធ្លាក់ចុះដល់ ០,៣% ទាបជាងខែមុនរហូតដល់ ០.២% ប៉ុន្តែសម្ពាធអតិផរណានឹងមិនរសាយបាត់ក្នុងពេលឆាប់ៗនេះទេ។ លើសពីនេះទៀត ការរំពឹងទុកសម្រាប់អតិផរណានៅតែបន្តកើនឡើង។
ចំណែក ធនាគារកណ្តាលសហរដ្ឋអាមេរិកបានបន្តអះអាងថា ការរំពឹងទុកនៃអតិផរណារយៈពេលវែងនៅតែរក្សាបានក្នុងអត្រា ២%។ ម្យ៉ាងទៀត ទិន្នន័យអត្រាអ្នកមានការងារធ្វើ (លើកលែងតែផ្នែកកសិកម្ម) នៅសហរដ្ឋអាមេរិកសម្រាប់ខែសីហា ដែលបានធ្លាក់ចុះយ៉ាងខ្លាំងត្រឹមតែ ២៣៥ ពាន់នាក់ ធៀបទៅនឹងខែមុន ១០៥៣ ពាន់នាក់ នៅតែធ្វើឱ្យអ្នកចូលរួមទីផ្សារខកចិត្ត។
ចំណែក គេហទំព័រ CNBC បានរាយការណ៍ផងដែរថា៖ «អត្រានៃការប្រកាសការងារដែលត្រូវការការចាក់វ៉ាក់សាំងបានកើនឡើងយ៉ាងខ្លាំង ចាប់តាំងពីរដ្ឋបាលចំណីអាហារ និងឱសថអាមេរិកបានផ្តល់ការយល់ព្រមពេញលេញដល់វ៉ាក់សាំង Pfizer-BioNTech នៅថ្ងៃទី ២៣ ខែសីហា ហើយទោះបីជា រដ្ឋបាលរបស់លោកប្រធានាធិបតី Joe Biden បានជំរុញអត្រាចាក់វ៉ាក់សាំងកូវីដ ១៩ នៅទូទាំងប្រទេសដោយបានដាក់សម្ពាធលើនិយោជកឯកជនឱ្យផ្តល់អភ័យឯកសិទ្ធិដល់កម្លាំងពលកម្មរបស់ពួកគេ អត្រាអ្នកមានការងារធ្វើ ក៏នឹងមិនងាយកើនឡើងដល់ចំណុចវិជ្ជមានសម្រាប់ប្រាក់ដុល្លារវិញក្នុងពេលឆាប់ៗនេះដែរ។
ផ្អែកលើការវិភាគផ្នែកព័ត៌មានទាំងនេះ ដែលភាគច្រើនគាំទ្រដល់តម្លៃមាសឱ្យមានការកើនឡើង វិនិយោគិនគួរតែពិចារណាវិនិយោគតាមទំនោររយៈពេលវែង ព្រោះតម្លៃមាសអាចនឹងកើនឡើងដល់ ១ ៨៣៣ ដុល្លារក្នុង ១ អោនស៍ ក្នុងសប្តាហ៍នេះ៕
វិភាគដោយ៖ លោក ចេង តារាវុធ អ្នកវិភាគឯករាជ្យ