ភ្នំពេញៈ សមាគមហិរញ្ញវត្ថុ និងបច្ចេកវិទ្យាកម្ពុជា (CAFT) និងសភាពាណិជ្ជកម្មអាមេរិកនៅកម្ពុជា (AmCham Cambodia) បានចុះអនុស្សរណៈនៃការយោគយល់គ្នា ដើម្បីរួមសហការគ្នាគាំទ្របច្ចេកវិទ្យាហិរញ្ញវត្ថុ និងធុរកិច្ចបង្កើតថ្មីព្រមទាំងលើកកម្ពស់បរិយាប័ន្នហិរញ្ញវត្ថុ និងការទទួលខុសត្រូវសង្គមនៅក្នុងឧស្សាហកម្មមួយនេះនៅកម្ពុជា។
MoU នេះបានចុះហត្ថលេខាដោយលោក Remi Pell ប្រធានក្រុមប្រឹក្សាភិបាល CAFT និងលោក Anthony Galliano ប្រធាន AmCham កាលពីថ្ងៃទី ១៦ ខែកញ្ញា។
ស្ថិតក្រោម MoU នេះសមាគមទាំង ២ បានព្រមព្រៀងគ្នាធ្វើសកម្មភាពជាក់ស្តែងរួមទាំងសមាជិកភាពទៅវិញទៅមក និងការបញ្ចុះតម្លៃលើការចូលរួមព្រឹត្តិការណ៍នានាបម្រើជាដៃគូឧស្សាហកម្មសម្រាប់សហគមន៍បច្ចេកវិទ្យាហិរញ្ញវត្ថុ និងធុរកិច្ចបង្កើតថ្មី ការផ្សព្វផ្សាយព្រឹត្តិការណ៍ និងសកម្មភាពរួមគ្នា ព្រមទាំងកិច្ចសហប្រតិបត្តិការលើកិច្ចប្រជុំកំពូល CamTech Summit របស់ CAFT នៅពេលខាងមុខ ដោយសហការជាមួយ World Fintech Festival តាមរយៈ Singapore Fintech Festival ធនាគារជាតិនៃកម្ពុជា សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា។
លោក Remi Pell ប្រធានក្រុមប្រឹក្សាភិបាល CAFT បានឱ្យដឹងថា ភាពជាដៃគូនេះនឹងរួមចំណែកក្នុងការនាំយកជំនាញកាន់តែច្រើន ដើម្បីអភិវឌ្ឍបច្ចេកវិទ្យានៅកម្ពុជា។
លោក Anthony Galliano ប្រធាន AmCham ឱ្យដឹងថា AmCham មានជំហរយូរអង្វែងក្នុងការលើកកម្ពស់ និងគាំទ្រក្រុមហ៊ុនរវាងកម្ពុជា និងអាមេរិកដូច្នេះ MoU នេះ នឹងក្លាយជាជំហានមួយទៀតដើម្បីអភិវឌ្ឍវិស័យបច្ចេកវិទ្យាហិរញ្ញវត្ថុរួមគ្នានៅកម្ពុជា។
លោកថ្លែងថា៖ «AmCham នៅតែប្តេជ្ញាធ្វើការជាមួយនឹងវិស័យសាធារណៈ និងឯកជន ដើម្បីលើកកម្ពស់ និងគាំទ្រអាជីវកម្ម និងពាណិជ្ជកម្មនៅប្រទេសកម្ពុជា។ នេះជាឱកាសដ៏ល្អបំផុតសម្រាប់សភាពាណិជ្ជកម្មអាមេរិកក្នុងការលើកកម្ពស់វិស័យបច្ចេកវិទ្យាហិរញ្ញវត្ថុ និងលើកកម្ពស់ការយល់ដឹងអំពីភាពជោគជ័យនៃបច្ចេកវិទ្យាពាណិជ្ជកម្មនៅកម្ពុជា»។
ក្របខ័ណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជាឆ្នាំ ២០២១-២០៣៥ ត្រូវបានដាក់ឱ្យដំណើរការកាលពីខែមិថុនា ហើយរំពឹងថា នឹងបញ្ចូលសម្ទុះថ្មីៗទៅក្នុងវិស័យព័ត៌មានវិទ្យា និងទូរគមនាគមន៍ (ICT) របស់កម្ពុជា និងកម្រិតល្បឿននៃការអភិវឌ្ឍរបស់ខ្លួនលោតរំលងទៅរកយុគសម័យឌីជីថល៕ LA