ភ្នំពេញៈ ស្ថាបនា ដែលជាធនាគារក្នុងស្រុកបានទទួលមូលនិធិចំនួន ១០ លានដុល្លារពីមូលនិធិ OP Finnfund Global Impact Fund I ដែលមានមូលដ្ឋាននៅប្រទេសហ្វាំងឡង់ ដើម្បីជាការផ្តល់លទ្ធភាពបន្ថែមទៀតដល់ធនាគារមួយនេះ សម្រាប់ពង្រីកប្រាក់កម្ចីរបស់ខ្លួនទៅដល់អតិថិជនសហគ្រាសធុនតូច និងមធ្យម (SMEs) ជាពិសេសស្ត្រី។
លោក Fung Kai Jin អគ្គនាយកធនាគារស្ថាបនាបានឱ្យដឹងថា ធនាគាររបស់លោកកំពុងផ្តល់សេវាកម្មជាច្រើនទៅដល់សហគ្រាសធុនតូច និងមធ្យម និងសហគ្រិនស្ត្រី ដើម្បីរួមចំណែកដល់សេដ្ឋកិច្ចជាតិ។
លោក Fung ថ្លែងថា៖ «ធនាគារស្ថាបនាមិនត្រឹមតែផ្តោតលើការផ្តល់សេវាកម្មហិរញ្ញវត្ថុដល់អតិថិជនរបស់ខ្លួនប៉ុណ្ណោះទេ ប៉ុន្តែថែមទាំងចង់ផ្តល់នូវសេវាកម្មមិនមែនហិរញ្ញវត្ថុ ដែលផ្តល់គុណតម្លៃបន្ថែមដល់សហគ្រាសធុនតូច និងមធ្យម និងស្ត្រីផងដែរ»។
លោកបានបន្ថែមថា៖ «ដូចយើងដឹងហើយថាអាជីវកម្មនៅប្រទេសកម្ពុជាភាគច្រើន គឺជាសហគ្រាសធុនតូច និងមធ្យម ហើយវាមានសារៈសំខាន់ខ្លាំងចំពោះសេដ្ឋកិច្ចប្រទេសកម្ពុជា។ សហគ្រាសធុនតូច និងមធ្យមចំនួន ២៦ ភាគរយត្រូវគ្រប់គ្រងដោយស្ត្រី ខណៈសហគ្រាសមីក្រូ ៦២ ភាគរយគ្រប់គ្រងដោយស្ដ្រី ដូច្នេះយើងមិនអាចបញ្ជាក់ពីសារៈសំខាន់របស់ពួកគេចំពោះសេដ្ឋកិច្ចកម្ពុជាបានទេ»។
លោកបន្តថា៖ «យើងក៏ធានាបាននូវសមភាពយេនឌ័រក្នុងការជ្រើសរើសបុគ្គលិករបស់យើងផងដែរ ក្រៅពីផ្តល់លទ្ធភាព និងទ្រទ្រង់ដល់សហគ្រិនទាំងនេះជាមួយនឹងផលិតផល និងសេវាកម្មរបស់យើងដូចជា ប្រាក់កម្ចីបង់រំលស់អាជីវកម្ម ការផ្តល់ប្រាក់កម្ចីដែលអាចបត់បែនបាន ការទូទាត់ដោយមិនចាំបាច់ធ្វើទំនាក់ទំនង និងការសន្សំប្រាក់វៃឆ្លាត»។
លោក Tuomas Virtala ប្រធានគ្រប់គ្រងទ្រព្យសកម្មនៅធនាគារ OP Corporate Bank បានឱ្យដឹងថា ការជំរុញកំណើនសហគ្រាសធុនតូច និងមធ្យម ព្រមទាំងការពង្រឹងអំណាចស្ត្រីទាំង ២ គឺជាស្នូលនៃយុទ្ធសាស្ត្រវិនិយោគរបស់មូលនិធិ OP Finnfund Global Impact Fund I។
លោកថ្លែងថា៖ «យើងរីករាយដែលបានរួមកម្លាំង និងគាំទ្រការងាររបស់ធនាគារស្ថាបនាទាំងក្នុងការអភិវឌ្ឍ ប្រតិបត្តិការរបស់ពួកគេ និងសមភាពយេនឌ័រនៅក្នុងធនាគារ ព្រមទាំងរួមចំណែកដល់វិស័យហិរញ្ញវត្ថុកម្ពុជា និងសង្គមជាតិទាំងមូល»។
បើតាមលោក Antti Urvas នាយករងប្រធានផលបត្រនៃគ្រឹះស្ថានហិរញ្ញវត្ថុនៅ Finnfund ក្នុងអំឡុងពេល ៦ ឆ្នាំនៃភាពជាដៃគូ លោកសង្កេតឃើញធនាគារស្ថាបនាបានអភិវឌ្ឍខ្លួនពីគ្រឹះស្ថានមីក្រូហិរញ្ញវត្ថុទៅជាធនាគារពាណិជ្ជ។ ទន្ទឹមនឹងនេះការងាររបស់ពួកគេឆ្ពោះទៅរកសមភាពយេនឌ័រ និងការផ្តល់អំណាចដល់ស្ត្រី ដែលធ្វើឱ្យធនាគារស្ថាបនាមានលក្ខណសម្បត្តិគ្រប់គ្រាន់ស្ថិតនៅក្រោមគំនិតផ្តួចផ្តើម 2x Challenge។
លោកបញ្ជាក់ថា៖ «មហិច្ឆតាក្នុងការអភិវឌ្ឍប្រតិបត្តិការរបស់ខ្លួន និងការក្លាយជាធនាគារឈានមុខគេក្នុងអេកូស៊ីស្ដែមទូទាត់នៅកម្ពុជាធ្វើឱ្យធនាគារស្ថាបនាក្លាយជាដៃគូដ៏គួរឱ្យចាប់អារម្មណ៍សម្រាប់ Finnfund នៅពេលអនាគត។ យើងក៏រីករាយដែលមានមូលនិធិ OP Finnfund Global Impact Fund I ដាក់បញ្ចូលជាវិនិយោគិនថ្មីក្នុងធនាគារនេះ»៕LA