ភ្នំពេញៈសាជីវកម្មហិរញ្ញវត្ថុអន្តរជាតិ (IFC) ដែលជាក្រុមហ៊ុនបុត្រសម្ព័ន្ធរបស់ធនាគារពិភពលោកបានទទួលស្គាល់អគារការិយាល័យ VTrust Tower គ្រប់គ្រងដោយក្រុមហ៊ុន Golden Tree Co., Ltd (GT) សម្រាប់អគារការិយាល័យពាណិជ្ជកម្មបៃតងដំបូងគេក្នុងប្រទេសកម្ពុជាតាមប្រព័ន្ធ Edge ដែលជាប្រព័ន្ធផ្តល់វិញ្ញាបនបត្រអគារបៃតងមួយដែលមានការទទួលស្គាល់ជាអន្តរជាតិ។ ការណ៍នេះបានត្រួសត្រាយផ្លូវសម្រាប់ក្រុមហ៊ុនត្រៀមចេញសញ្ញាបណ្ណបៃតងនៅផ្សារមូលបត្រកម្ពុជា (CSX)។
វិញ្ញាបនបត្រដែលបានផ្តល់ឱ្យនៅថ្ងៃទី ៨ ខែតុលា បានធ្វើឡើងត្រឹមតែរយៈពេល ៣ ថ្ងៃ បន្ទាប់ពី Golden Tree ទទួលបានការយល់ព្រមជាគោលការណ៍ពី CSX សម្រាប់ការពិនិត្យលទ្ធភាពចុះបញ្ជីរបស់ពួកគេក្នុងការចុះបញ្ជីនៅលើទីផ្សារនេះ។
យោងតាមរបាយការណ៍របស់ IFC អគារបៃតងជាផែនការហិរញ្ញវត្ថុ និងគោលនយោបាយសម្រាប់ទីផ្សារដែលកំពុងរីកចម្រើន ២៨ ភាគរយនៃការបំភាយឧស្ម័នផ្ទះកញ្ចក់ទាក់ទងនឹងថាមពលមានប្រភពចេញពីអគារ ការអភិវឌ្ឍនៃអគារបៃតងបង្ហាញពីឱកាសដ៏ធំសម្បើមក្នុងផែនការកាត់បន្ថយកាបូនិកសកល និងផលប៉ះពាល់បរិស្ថាន។
ឧត្តមភាពក្នុងការរចនាសម្រាប់ប្រសិទ្ធភាពកាន់តែច្រើន (EDGE) ប្រព័ន្ធផ្តល់វិញ្ញាបនបត្រអគារបៃតងមួយ ដែលមានការទទួលស្គាល់ជាអន្តរជាតិ ផ្តោតលើអគារលំនៅឋាន អគារពាណិជ្ជកម្មទាំងឡាយដែលអាចសន្សំសំចៃលើការប្រើប្រាស់ធនធាននានាដោយប្រសិទ្ធភាព។ សម្រាប់អគារការិយាល័យ VTrust Tower ដែលទទួលបានវិញ្ញាបនបត្រពី EDGE ក្លាយជាអគារការិយាល័យបៃតងដំបូងគេនៅកម្ពុជា ដោយអាចសម្រេចការសន្សំប្រើប្រាស់ទឹកបាន ៥២ ភាគរយ ការសន្សំថាមពល ២៤ ភាគរយ, និង ៨៤ ភាគរយ នៃវត្ថុធាតុដើមទាំងអស់ប្រើប្រាស់ក្នុងអគារបង្កការរំខានតិចតួចដល់បរិស្ថាន ព្រមទាំងការរួមចំណែកដល់ការកាត់បន្ថយការបំភាយឧស្ម័នកាបូនិក (CO2) ប្រមាណ ២៣២ តោនប្រចាំឆ្នាំ។
លោកស្រី Judy Tan អនុប្រធានប្រតិបត្តិក្រុមហ៊ុន Golden Tree Co., Ltd បានឱ្យដឹងថា ការទទួលបានវិញ្ញាបនបត្រទទួលស្គាល់ជាអន្តរជាតិនាពេលនេះ គឺជាសក្ខីកម្មដ៏សំខាន់មួយដែលឆ្លុះបញ្ចាំងពីការប្តេជ្ញាដ៏មុតមាំរបស់ក្រុមហ៊ុន ក្នុងការចូលរួមជាមួយរាជរដ្ឋាភិបាលកម្ពុជា ដើម្បីកាត់បន្ថយការបំភាយឧស្ម័នកាបូនិក។
លោកស្រីថ្លែងថា៖ «បន្ថែមពីលើការយកចិត្តទុកដាក់បរិស្ថាន ក្រុមហ៊ុននឹងបន្តខិតខំអនុវត្តស្តង់ដាបរិស្ថាន សង្គម អភិបាលកិច្ច (ESG)។ យើងចង់ធ្វើបន្ថែមទៀត បន្តកែលម្អបញ្ហា ESGដែលយើង និងឧស្សាហកម្មទាំងមូលកំពុងប្រឈមមុខនាពេលបច្ចុប្បន្ន។ យើងជឿជាក់ថា គំនិតផ្តួចផ្តើមនេះ នឹងក្លាយជាជំនួយដ៏សំខាន់ក្នុងការរចនា និងការអនុវត្តគោលការណ៍ធានាបាននូវនិរន្តរភាពឱ្យបានកាន់តែប្រសើរឡើង ដែលអាចជួយទ្រទ្រង់ដល់ការរីកលូតលាស់ និងពង្រឹងសមត្ថភាពក្នុងការគ្រប់គ្រងហានិភ័យ គុណភាពសេវាកម្ម ព្រមទាំងបង្កើនប្រសិទ្ធភាពប្រតិបត្តិការដល់ដៃគូរអាជីវកម្ម,ក្រុមការងារ និងភាគីពាក់ព័ន្ធ»។
យោងតាមផែនការរបស់ក្រុមហ៊ុននៅពេលខាងមុខ ក្រុមហ៊ុន Golden Tree Co., Ltd ក៏មានផែនការអភិវឌ្ឍន៍អគារការិយាល័យបៃតងបន្ថែមទៀត ព្រមទាំងមានផែនការអភិវឌ្ឍន៍, គ្រប់គ្រង, និងវិនិយោគគម្រោងលំនៅឋាន និងសួនឧស្សាហកម្មបៃតងផងដែរ។ គោលដៅរបស់ Golden Treeគឺកសាង និងអភិវឌ្ឍសហគមន៍ធុរកិច្ចមួយ ដែលផ្តោតលើការយកចិត្តទុកដាក់ និងលើកកម្ពស់អភិវឌ្ឍន៍សង្គម សេដ្ឋកិច្ច និងបរិស្ថាន តាមរយៈកិច្ចសហការនានាក្នុងការគ្រប់គ្រងបញ្ហាបរិស្ថាន និងធនធាន។
GT គឺជាក្រុមហ៊ុនដំបូងគេដែលបើកទំព័រថ្មីនៅលើទីផ្សារមូលបត្រកម្ពុជា (CSX) លើការចេញមូលបត្របំណុលបៃតងនៅកម្ពុជា ដែលគ្រោងនឹងប្រមូលមូលនិធិប្រមាណ ៣លានដុល្លារពីការបោះផ្សាយនេះ ដើម្បីពង្រីកអាជីវកម្មរបស់ខ្លួន។
លោកហុង សុហួរ អគ្គនាយកក្រុមហ៊ុនផ្សារមូលបត្រកម្ពុជា (CSX) បានប្រាប់ភ្នំពេញប៉ុស្តិ៍កាលពីថ្ងៃទី ៦ ខែតុលា ថា ការចេញមូលបត្របំណុលបៃតង គឺដូចគ្នានឹងការចេញមូលបត្របំណុលធម្មតាដែរ ប៉ុន្តែក្រុមហ៊ុនចេញមូលបត្របំណុលនេះ តម្រូវឱ្យគោរពតាមការវិនិយោគដែលមិនប៉ះពាល់ដល់បរិស្ថាន និងបរិយាកាស។
លោកថ្លែងថា៖ «យើងមើលឃើញថា ក្រុមហ៊ុនជាច្រើន កំពុងចាប់ផ្តើមវិនិយោគលើបរិស្ថាន និងការប្រែប្រួលអាកាសធាតុ ដែលជាហេតុធ្វើឱ្យក្រុមហ៊ុន GOLDEN TREE CO.,LTD និងក្រុមហ៊ុនមួយចំនួនទៀតស្វែងរកការបញ្ជាក់ពីអ្នកជំនាញមកពីភាគីឯករាជ្យមកពីស្ថាប័នអន្តរជាតិដូចជាធនាគារពិភពលោកជាដើម»។
លោកលើកឡើងថា៖ «ក្រុមហ៊ុនគ្រោងនឹងប្រមូលមូលនិធិប្រមាណ ៣ លានដុល្លារក្នុងរយៈពេល ៥ ឆ្នាំជាមួយនឹងអត្រាការប្រាក់ ៧ ភាគរយ។ ខ្ញុំគិតថា មូលបត្រទាំងនេះអាចមានលក្ខណៈពិសេសជាងមូលបត្រមុន ដែលវានឹងបើកចំហសម្រាប់ការវិនិយោគដោយវិនិយោគិនបុគ្គលផងដែរ។ នេះគឺជាលក្ខណពិសេសរបស់ក្រុមហ៊ុននេះ ដូច្នេះវិនិយោគិនបុគ្គលដែលចង់វិនិយោគអាចចូលរួមបាន»។
របាយការណ៍ស្រាវជ្រាវរបស់សាជីវកម្មហិរញ្ញវត្ថុអន្តរជាតិ (IFC) បានបង្ហាញថា សក្តានុពលទីផ្សារអគារបៃតងនៅតាមបណ្តាប្រទេសកំពុងមានការអភិវឌ្ឍនៅទូទាំងពិភពលោកត្រូវបានប៉ាន់ប្រមាណថា មានទំហំទុននៃការវិនិយោគដល់ទៅជិត ២៤,៧ ពាន់ពាន់លានដុល្លារអាមេរិកនៅត្រឹមឆ្នាំ ២០៣០ ៕