.jpg)
កម្ពុជាត្រៀមរៀបចំកិច្ចប្រជុំអាស៊ាន នាពេលដ៏ខ្លីខាងមុខនេះ។ ហេង ជីវ័ន
ភ្នំពេញៈ ខណៈកម្ពុជាធ្វើជាម្ចាស់ផ្ទះនៃកិច្ចប្រជុំកំពូលអាស៊ានលើកទី៤០ និងទី៤១ និងកិច្ចប្រជុំកំពូលពាក់ព័ន្ធនៅរាជធានីភ្នំពេញចាប់ពីថ្ងៃទី ៨ ដល់ថ្ងៃទី ១៣ ខែវិច្ឆិកា ឆ្នាំ ២០២២ គឺជាឱកាសដ៏ល្អ សម្រាប់កម្ពុជានៅក្នុងការបង្ហាញពីការអភិវឌ្ឍ និងការធ្វើឱ្យខ្លួនឯងក្លាយជាមជ្ឈមណ្ឌលវិនិយោគ និងធុរកិច្ចប្រកបដោយសក្តានុពល និងរស់រវើកនៅក្នុងតំបន់។
តំណាងសហគមន៍ធុរកិច្ចមានសុទិដ្ឋិនិយមថា កម្ពុជានឹងទទួលបានការចាប់អារម្មណ៍កាន់តែច្រើនពីមេដឹកនាំធុរកិច្ច និងវិនិយោគិនក្នុងតំបន់ និងពិភពលោកពីកិច្ចប្រជុំកំពូលអាស៊ានលើកទី៤០ និងទី៤១ និងកិច្ចប្រជុំកំពូលពាក់ព័ន្ធនេះ។
កិច្ចប្រជុំកំពូលអាស៊ានលើកទី៤០ និងទី៤១ និងកិច្ចប្រជុំកំពូលពាក់ព័ន្ធ ដែលស្ថិតក្រោមប្រធានបទ «ASEAN A.C.T ដោះស្រាយបញ្ហាប្រឈមរួមគ្នា» បាននាំមកការប្រមូលផ្តុំមេដឹកនាំក្នុងតំបន់ និងពិភពលោកជាច្រើនរួមទាំងប្រធានាធិបតីសហរដ្ឋអាមេរិក នាយករដ្ឋមន្ត្រីចិន និងដៃគូសន្ទនាជាច្រើនទៀតដើម្បីដោះស្រាយបញ្ហាប្រឈម ដំណោះស្រាយ និងផ្តល់គោលនយោបាយមួយចំនួនឆ្លើយតបនឹងការឡើងកម្តៅនាពេលបច្ចុប្បន្ន ដោយសារភាពតានតឹងនៃការប្រកួតប្រជែងភូមិសាស្ត្រនយោបាយ និងភាពមិនច្បាស់លាស់នៃសេដ្ឋកិច្ចសកល។
លោក អ៊ិន ចាន់នី ប្រធានអគ្គនាយកប្រតិបត្តិធនាគារអេស៊ីលីដាបានប្រាប់ ភ្នំពេញ ប៉ុស្តិ៍ថា ក្នុងឋានៈជាប្រធានអាស៊ាន កម្ពុជាទទួលបានផលវិជ្ជមានច្រើន ពិសេសវិស័យសេវាកម្ម សណ្ឋាគារ ភោជនីយដ្ឋាន ក្នុងរយៈពេលខ្លី ព្រោះនឹងមានគណៈប្រតិភូជាច្រើនរូប ប្រធានាធិបតី នាយករដ្ឋមន្ត្រី រដ្ឋមន្ត្រី ក្រុមមន្ត្រីជាន់ខ្ពស់ រួមទាំងបុគ្គលិករបស់ពួកគេនឹងត្រូវធ្វើដំណើរមកកម្ពុជា ដោយពួកគេនឹងស្នាក់នៅក្នុងសណ្ឋាគារ និងបរិភោគអាហារនៅភោជនីយដ្ឋានជាច្រើន រួមផ្សំជាមួយមនុស្សជាច្រើនក្នុងចំណោមពួកគេនឹងទៅលេងតំបន់អង្គរដ៏គួរឱ្យចាប់អារម្មណ៍ផ្សេងទៀត។
លោកថ្លែងថា៖ «តាមរយៈការធ្វើជាប្រធានអាស៊ាន កម្ពុជាមានឱកាសល្អបំផុតក្នុងការផ្សព្វផ្សាយកម្ពុជាទៅកាន់ពិភពខាងក្រៅដែលពួកគេសមនឹងវិនិយោគនៅកម្ពុជា។ វាដើរតួជាការបង្ហាញសម្រាប់ពួកគេ ហើយសម្រាប់ផែនការរយៈពេលមធ្យម និងវែងពួកគេនឹងមកម្តងទៀត។ ជាការពិតពួកគេអាចមើលឃើញដោយផ្ទាល់នូវឱកាសអាជីវកម្មជាច្រើននៅប្រទេសកម្ពុជា សម្រាប់ការវិនិយោគ និងការពង្រីកអាជីវកម្មរបស់ពួកគេ»។
នាយកប្រតិបត្តិក្រុមហ៊ុនសេវាកម្មហិរញ្ញវត្ថុ Cambodian Investment Management Co Ltd លោក Anthony Galliano បានបង្ហាញថា កម្ពុជាដែលកំពុងធ្វើជាប្រធានសមាគមប្រជាជាតិអាស៊ីអាគ្នេយ៍ (អាស៊ាន) ដែលនេះគឺជាឱកាសដ៏អស្ចារ្យមួយ ដើម្បីបង្ហាញពីវឌ្ឍនភាពសង្គម និងសេដ្ឋកិច្ចដ៏អស្ចារ្យរបស់កម្ពុជា។
លោកលើកឡើងថា៖ «កម្ពុជាបានធ្វើជាប្រធានអាស៊ានលើកដំបូងក្នុងឆ្នាំ ២០០២ ហើយមេដឹកនាំពិភពលោកឥឡូវនេះនឹងទៅទស្សនាប្រទេស ដែលមានការផ្លាស់ប្តូរ និងខុសគ្នាយ៉ាងខ្លាំង ដែលជាប្រទេសមានការរីកចម្រើនក្នុងរយៈពេល ២ ទសវត្សរ៍ចុងក្រោយនេះ ខណៈភ្នំពេញឥឡូវនេះគឺជាទីក្រុងដ៏ទំនើបដោយមានហេដ្ឋារចនាសម្ព័ន្ធ ដែលបានកែលម្អជាច្រើន និងអគារខ្ពស់ៗកប់ពពកជាច្រើន»។
លោកបន្ថែមថា៖ «កម្ពុជាមិនមែនជាប្រទេសជិតខាងក្រីក្រទៀតទេ ប៉ុន្តែជាប្រទេសដែលមានប្រាក់ចំណូលមធ្យមកម្រិតទាប ដែលបង្កើនល្បឿនទៅជាប្រទេសមានប្រាក់ចំណូលមធ្យមខ្ពស់ក្នុងរយៈពេល ១ ទសវត្សរ៍។ នេះជាជោគជ័យពិតប្រាកដរបស់អាស៊ាន»។
លោកបន្តថា មានបញ្ហាជាច្រើនដែលមេដឹកនាំទាំងអស់ត្រូវពិភាក្សាដូចជា សក្តានុពលនៃវិបត្តិសេដ្ឋកិច្ចសកល អតិផរណាខ្ពស់ បញ្ហាខ្សែចង្វាក់ផ្គត់ផ្គង់ ពាណិជ្ជកម្មក្នុងតំបន់ តម្លៃប្រេង ប្រាក់ដុល្លារឡើងថ្លៃ សង្គ្រាមនៅអ៊ុយក្រែន មីយ៉ាន់ម៉ា និងភាពតានតឹងរវាងប្រទេសចិន និងអាមេរិក។
លោក Anthony បន្ថែមថា៖ «កត្តាដែលនឹងផ្តោតសំខាន់ៗរួមមាន សេដ្ឋកិច្ចពិភពលោក និងការដោះស្រាយបញ្ហាប្រឈមសំខាន់ៗ នៅពេលខាងមុខ ដើម្បីធានាឱ្យពិភពលោកចៀសផុតពីវិបត្តិសេដ្ឋកិច្ចសកល ក៏ដូចជាពាណិជ្ជកម្មអាស៊ាន និងការបន្តការធ្វើសមាហរណកម្ម»។
លោក កៅ គឹមហួន រដ្ឋមន្ត្រីអមនាយករដ្ឋមន្ត្រីកម្ពុជាត្រូវបានដកស្រង់សម្ដីដោយសារព័ត៌មានរដ្ឋចិនស៊ីនហួរកាលពីសប្តាហ៍មុន ដោយលើកឡើងថា ជំនួបកំពូលនេះនឹងមានសារៈសំខាន់ជាយុទ្ធសាស្ត្រមិនត្រឹមតែ សម្រាប់កម្ពុជាក្នុងនាមជាប្រធានអាស៊ានឆ្នាំ ២០២២ ប៉ុណ្ណោះទេ ប៉ុន្តែសម្រាប់អាស៊ានទាំងមូលក៏ដូចជាដៃគូសន្ទនារបស់ខ្លួនផងដែរ។
លោក គីមហួន ដែលនឹងចូលកាន់តំណែងជាអគ្គលេខាធិការអាស៊ានពីខែមករា ឆ្នាំ ២០២៣ បានប្រាប់ស៊ីនហួរក្នុងបទសម្ភាសថ្មីៗនេះថា កិច្ចខិតខំប្រឹងប្រែងស្តារសេដ្ឋកិច្ច ក្រោយជំងឺកូវីដ ១៩ បញ្ហាសន្តិសុខ ដូចជាជម្លោះរវាងប្រទេសរុស្ស៊ី និងអ៊ុយក្រែន ឧបទ្វីបកូរ៉េ ការកើនឡើងតម្លៃប្រេងពិភពលោក និងតម្លៃអាហារ និងបម្រែបម្រួលអាកាសធាតុស្ថិតក្នុងចំណោមបញ្ហាជាច្រើនផ្សេងទៀត ដែលជាប្រធានបទសំខាន់នឹងត្រូវបានពិភាក្សាក្នុងអំឡុងពេលកិច្ចប្រជុំកំពូលនេះ។
លោកថ្លែងថា៖ «នេះជាពេលវេលាដ៏សំខាន់មួយ ដោយសារតែប្រទេសកម្ពុជានឹងមិនត្រឹមតែនៅលើផែនទីក្នុងតំបន់ប៉ុណ្ណោះទេ ប៉ុន្តែក៏មាននៅលើផែនទីពិភពលោកផងដែរ។ នៅពេលដែលយើងដឹកនាំ និងតម្រង់ទិសនៃបញ្ហាប្រឈមទាំងអស់នេះ»។
ទិន្នន័យក្រសួងពាណិជ្ជកម្ម បង្ហាញថា ការនាំចេញសរុបរបស់កម្ពុជាទៅប្រទេសសមាជិកអាស៊ានបានកើនដល់ ១,១៧២ ពាន់លានដុល្លារក្នុងត្រីមាសទី១ នៃឆ្នាំនេះ ខណៈការនាំចូលសរុបមានចំនួន ៣,១៦៨ ពាន់លានដុល្លារ ដែលធ្វើឱ្យក្នុងត្រីមាសទី១ ឆ្នាំ ២០២២ ពាណិជ្ជកម្មទ្វេភាគីរវាងកម្ពុជា និងរដ្ឋជាសមាជិកអាស៊ានមានទឹកប្រាក់ ៤,៣៤ ពាន់លានដុល្លារកើនឡើង ១៨ ភាគរយ៕
