.jpg)
លោក ជា ចាន់តូ និងលោកស្រី Nguyen Thi Hon លើកបង្ហាញអនុស្សរណៈនៃការយោគយល់ដែលបានចុះហត្ថលេខា។ រូបថត SPM
ភ្នំពេញៈ ធនាគារជាតិនៃកម្ពុជា (NBC) និងធនាគាររដ្ឋវៀតណាមបានចុះអនុស្សរណៈនៃការយោគយល់គ្នា (MoU) ស្តីពីកិច្ចសហប្រតិបត្តិការនវានុវត្តន៍ហិរញ្ញវត្ថុ និងការទូទាត់សាច់ប្រាក់ ដែលជាវិធានការសំដៅជំរុញការរួមចំណែកក្នុងការអភិវឌ្ឍវិស័យនេះក៏ដូចជាជំរុញការទូទាត់ឆ្លងព្រំដែនរវាងប្រទេសជិតខាងអាស៊ានទាំង ២។
អនុស្សរណៈយោគយល់គ្នានេះ ត្រូវបានចុះហត្ថលេខារវាងលោក ជា ចាន់តូ ទេសាភិបាល NBC និងលោកស្រី Nguyen Thi Hon ទេសាភិបាលធនាគាររដ្ឋវៀតណាម ក្រោមអធិបតីភាពរបស់លោកនាយករដ្ឋមន្ត្រីប្រទេសទាំង ២ កាលពីថ្ងៃទី ៨ ខែវិច្ឆិកា។
សេចក្តីប្រកាសព័ត៌មានរបស់ NBC ឱ្យដឹងថា៖ «អនុស្សរណៈយោគយល់គ្នានេះមានគោលបំណងពង្រឹងក្របខ័ណ្ឌកិច្ចសហប្រតិបត្តិការសម្រាប់ការអភិវឌ្ឍប្រព័ន្ធបច្ចេកវិទ្យាហិរញ្ញវត្ថុ (Fintech) និងប្រព័ន្ធទូទាត់រវាងប្រទេសទាំង ២ »។
លោក តូច ចៅចេក អគ្គនាយកធនាគារប្រៃសណីយ៍បានប្រាប់ ភ្នំពេញ ប៉ុស្តិ៍ នៅថ្ងៃទី ១០ ខែវិច្ឆិកាថា អនុស្សរណៈនេះនឹងធ្វើឱ្យប្រសើរឡើងនូវការទូទាត់ឆ្លងព្រំដែន ឬការទូទាត់តាមប្រព័ន្ធឌីជីថល ជាពិសេសដើម្បីផ្លាស់ប្ដូរទៅប្រើប្រាស់ KHQR ជាមួយធនាគារនៅប្រទេសវៀតណាម។
លោកនិយាយថា៖ «បច្ចុប្បន្ន KHQR របស់យើងបានធ្វើជាមួយនឹងប្រទេសថៃរួចហើយ។ ដូច្នេះ MoU នេះនឹងតភ្ជាប់កិច្ចសហប្រតិបត្តិការលើ KHQR ជាមួយវៀតណាម។ លើសពីនេះវានឹងចូលរួមចំណែកជួយសម្រួលដល់ពាណិជ្ជកម្មឆ្លងព្រំដែន និងទំនាក់ទំនងសេដ្ឋកិច្ចរវាងប្រទេសទាំង ២ ដោយសារយើងទទួលបានប្រព័ន្ធទូទាត់ដ៏ងាយស្រួល»។
នាយករដ្ឋមន្ត្រីកម្ពុជា លោក ហ៊ុន សែន នៅក្នុងវេទិកាជំរុញវិនិយោគកម្ពុជា-វៀតណាម ឆ្នាំ ២០២២ ដែលរៀបចំនៅរាជធានីភ្នំពេញកាលពីថ្ងៃទី ៨ ខែវិច្ឆិកា បានលើកឡើងថា កម្ពុជា និងវៀតណាមជាប្រទេសមានព្រំដែន និងទំនាក់ទំនងការទូតល្អជាមួយគ្នាយូរមកហើយ ពិសេសមុនពេលមានវត្តមានជំងឺកូវីដ ១៩ ចំនួនវិនិយោគិនវៀតណាមមកបណ្តាក់ទុននៅកម្ពុជាបានកើនជាបន្តបន្ទាប់។ វិស័យដែលវិនិយោគិនវៀតណាមចូលមកបណ្តាក់ទុននៅកម្ពុជាច្រើន គឺកសិកម្ម និងទូរគមនាគមន៍។
លោកថ្លែងថា៖ «ក្នុងន័យនេះ ខ្ញុំសូមលើកទឹកចិត្តឱ្យវិនិយោគិនវៀតណាមមកបណ្តាក់ទុនធ្វើប្រតិបត្តិការអាជីវកម្មឱ្យកាន់តែច្រើនឡើងវិញនៅកម្ពុជា ជាពិសេសក្នុងវិស័យដែលកំពុងមានសក្តានុពលខ្ពស់នៅកម្ពុជា ដូចជាកសិកម្មទំនើប ឧស្សាហកម្ម កែច្នៃចំណីអាហារ និងឧស្សាហកម្មកម្មន្តសាលធុនស្រាល ជាដើម»។
ទិន្នន័យអគ្គនាយកដ្ឋានគយ និងរដ្ឋាករកម្ពុជាបង្ហាញថា ក្នុងរយៈពេល ៩ ខែ ឆ្នាំ ២០២២ ពាណិជ្ជកម្មរវាងកម្ពុជា-វៀតណាមមានតម្លៃសរុប ៤ ៦៣៣,៦៦ លានដុល្លារ កើន ២២ ភាគរយបើធៀបទៅរយៈពេលដូចគ្នាឆ្នាំ ២០២១ ។ ក្នុងនោះទំនិញនាំពីកម្ពុជាទៅវៀតណាមមានចំនួន ១ ៥៥៩,៩៩ លានដុល្លារ កើន ៣,១ ភាគរយ និងការនាំចូលពីវៀតណាម ៣ ០៧៣,៦៨ លានដុល្លារ កើន ៣៤,៥ ភាគរយ។ សម្រាប់ជញ្ជីងពាណិជ្ជកម្មទ្វេភាគី គឺកម្ពុជាមានឱនភាពពាណិជ្ជកម្មប្រមាណ ១ ៥១៣,៦៩ លានដុល្លារ៕
