ភ្នំពេញៈ រយៈពេលជាង ២ ឆ្នាំមកហើយដែលវិបត្តិសុខភាពបានបង្កផលប៉ះពាល់យ៉ាងខ្លាំងដល់សេដ្ឋកិច្ចជុំវិញពិភពលោក ខណៈក្រុមហ៊ុនជាច្រើន ជាពិសេសសហគ្រាសខ្នាតតូច និងមធ្យមបានកំពុងជម្នះដើម្បីរស់។ ក្រុមហ៊ុន Compass Advertising ដែលដឹកនាំដោយសហគ្រិនស្ត្រី ១ រូបក៏ជាក្រុមហ៊ុនមួយក្នុងចំណោមក្រុមហ៊ុនដែលបានរងគ្រោះពីវិបត្តិមួយនេះ ប៉ុន្តែនៅតែព្យាយាមរស់នៅលើទីផ្សារ។
លោកស្រី ណេង ស៊ីណាត ស្ថាបនិក និងជាអគ្គនាយិកាប្រតិបត្តិក្រុមហ៊ុន Compass Advertising បានផ្តល់បទសម្ភាសឱ្យលោក ម៉ៃ គុណមករា ការីនិពន្ធព័ត៌មានសេដ្ឋកិច្ចនៃកាសែតភ្នំពេញប៉ុស្តិ៍អំពីយុទ្ធសាស្ត្ររបស់លោកស្រីក្នុងការទ្រទ្រង់អាជីវកម្មនៅក្នុងអំឡុងពេលមានវិបត្តិសុខភាព និងវិធីសាស្ត្រដែលសហគ្រិនស្ត្រីអាចដឹកនាំក្រុមហ៊ុនក្នុងអំឡុងពេលដ៏លំបាកដោយមិនកាត់បន្ថយបុគ្គលិក។
ក្នុងរយៈពេលជាង ២ ឆ្នាំចាប់តាំងពីវិបត្តិសុខភាពបានកើតឡើងដែលបង្កផលប៉ះពាល់ដល់សេដ្ឋកិច្ច តើអាជីវកម្មរបស់លោកស្រីមានសកម្មភាពដូចម្ដេចដែរ? តើលោកស្រីរក្សានិរន្តរភាពអាជីវកម្មរបស់ខ្លួនដោយរបៀបណា?
ការរីករាលដាលជំងឺកូវីដ ១៩ បានធ្វើឱ្យប៉ះពាល់ខ្លាំងដល់អាជីវកម្មក្នុងស្រុក និងពិភពលោក។ វាជាបញ្ហាប្រឈមដ៏ធំសម្រាប់យើងក្នុងការគិតពិចារណាអំពីយុទ្ធសាស្ត្រដោយមិនធ្វើឱ្យខូចរចនាសម្ព័ន្ធក្រុមរបស់ខ្ញុំ។ ក្នុងអំឡុងពេលនោះ យើងចាំបាច់ត្រូវរៀបចំរចនាសម្ព័ន្ធឡើងវិញ និងប្រកាន់យកនូវមធ្យោបាយផ្សេងៗទៀត ដើម្បីទ្រទ្រង់អាជីវកម្ម។ ជាសំណាងល្អ ការកើនឡើងនៃឌីជីថលូបនីយកម្មពិតជាបានជួយគាំទ្រអាជីវកម្មយើង ហើយយើងនៅតែទទួលយកគម្រោងតូចៗមួយចំនួនដោយប្រើវេទិកាអនឡាញ។ នៅក្នុងករណីនេះ ខ្ញុំកំពុងសម្លឹងមើលបញ្ហាការរីករាលដាលជំងឺកូវីដ ១៩ ផ្អែកលើភាពវិជ្ជមាន ដូចជាយើងអាចពន្លឿនការធ្វើឌីជីថលូបនីយកម្ម ហើយឥឡូវនេះបានក្លាយជាផ្នែកមួយនៃសេវាកម្មរបស់យើង ដោយមានតម្រូវការជាប្រចាំពីអតិថិជន។
រដ្ឋាភិបាលចាប់ផ្តើមដំណើរការសេដ្ឋកិច្ចសង្គមពេញលេញឡើងវិញតាំងពីដើមខែវិច្ឆិកា ឆ្នាំ ២០២១ មក។ តើលោកស្រីបានសង្កេតឃើញដំណើរការសេដ្ឋកិច្ចរបស់កម្ពុជាប្រព្រឹត្តទៅយ៉ាងណាដែរ?
ខ្ញុំអាចនិយាយថា អាជីវកម្មកំពុងងើបឡើងវិញជាបណ្ដើរៗ យើងអាចបំពេញការខាតបង់មួយចំនួនក្នុងអំឡុងពេលការបិទខ្ទប់។ ខ្ញុំអាចនិយាយដោយមោទនភាពថា ក្រុមហ៊ុនរបស់ខ្ញុំមិនដែលចុះចាញ់ឡើយ ព្រោះខ្ញុំមិនដែលបោះបង់ពួកគេក្នុងពេលដ៏អាក្រក់នោះទេ។ ខ្ញុំមានសុទិដ្ឋិនិយមយ៉ាងមុតមាំថា ស្ថានភាពល្អនេះនឹងបន្ត ហើយថាយើងទាំងអស់គ្នានឹងរួចផុតពីការរីករាលដាលជំងឺនេះ។ ប៉ុន្តែយ៉ាងណា ក៏យើងនៅតែត្រូវអនុវត្តវិធានការសុវត្ថិភាពសុខភាពឱ្យបានត្រឹមត្រូវ។
តើវិស័យសំខាន់ៗអ្វីខ្លះដែលលោកស្រីមើលឃើញមានការកើនឡើង? តើក្រុមហ៊ុនលោកស្រីសម្រេចបានអ្វីខ្លះថ្មីៗនេះ?
ខ្ញុំអាចនិយាយថា អាជីវកម្ម និងម៉ាកយីហោភាគច្រើនមានការខិតខំយ៉ាងខ្លាំងពេលនេះ។ មិនដែលធុញទ្រាន់នឹងការជ្រៀតចូល និងវាយលុកយុទ្ធសាស្ត្រដ៏ល្អបំផុតដែលគ្របដណ្តប់ការខាតបង់ទាំងអស់ក្នុងអំឡុងការរីករាលដាលជំងឺកូវីដនោះទេ។ អាជីវកម្មមួយចំនួន ដើម្បីរកប្រាក់ចំណេញកំពុងប្រើប្រាស់វិធីជាច្រើនដើម្បីស្វែងរកប្រាក់ចំណេញ។
បច្ចុប្បន្នសមិទ្ធផលដ៏ធំបំផុតដែលក្រុមហ៊ុនរបស់ខ្ញុំសម្រេចបាន គឺពិព័រណ៍បច្ចេកវិទ្យាកម្ពុជានាពេលថ្មីៗមកនេះ ដែលជាពិព័រណ៍បច្ចេកវិទ្យាដ៏ធំបំផុតមិនធ្លាប់មាននៅក្នុងប្រទេសកម្ពុជា។ យើងត្រូវត្រៀមខ្លួនចំពោះបញ្ហាប្រឈមជាច្រើន និងការរៀបចំជាប្រចាំ។ ក្រុមការងាររបស់ខ្ញុំពិតជាលះបង់ និងខំប្រឹងប្រែងយ៉ាងពេញទំហឹង ដើម្បីធ្វើឱ្យពិព័រណ៍នេះអាចធ្វើទៅបាន និងទទួលបានជោគជ័យ។ ដៃគូអាជីវកម្មទាំងនោះដែលជឿទុកចិត្តលើយើងក្នុងអំឡុងពេលបើកដំណើរការតាមគន្លងថ្មីគឺពិតជាផ្នែកមួយដ៏សំខាន់នៃសមិទ្ធផលរបស់យើង។
សូមយកចំណាប់អារម្មណ៍លើជីវិតផ្ទាល់ខ្លួនរបស់លោកស្រី ដោយសារលោកស្រីជាស្ត្រីរឹងមាំ និងឯករាជ្យ ១ រូបដែលបានកសាងអាជីវកម្មជោគជ័យយ៉ាងខ្លាំង។ តើលោកស្រីមើលឃើញសហគ្រិនស្ត្រីជួបបញ្ហាប្រឈមអ្វីខ្លះ? តើលោកស្រីជម្នះដោយរបៀបណា?
ក្នុងនាមជាសហគ្រិន វាពិតជាមិនងាយស្រួលទេក្នុងការបង្កើតអាជីវកម្មតាំងពីដំបូង។ បញ្ហាប្រឈមជាច្រើនកើតមានឡើង ហើយយើងចាំបាច់ត្រូវតែរកទំនុកចិត្តពីអតិថិជននៅពេលអនាគត ជាពិសេសនៅក្នុងវិស័យភ្នាក់ងារផ្សាយពាណិជ្ជកម្មនៅទីនេះ។ កម្ពុជាមានក្រុមហ៊ុនធំៗជាច្រើនកំពុងគ្រប់គ្រងទីផ្សារ។ បញ្ហាប្រឈមទាំងនេះជួយឱ្យខ្ញុំធ្វើការងារកាន់តែរហ័ស ដោយមានជំនួយពីគ្រួសាររបស់ខ្ញុំ និងក្រុមការងារល្អខំប្រឹងប្រែងក្នុងការជួយជ្រោមជ្រែង និងលើកទឹកចិត្ត។
តើលោកស្រីឃើញមានការលើកទឹកចិត្តណាមួយពីរដ្ឋាភិបាល ដើម្បីជំរុញស្ត្រីឱ្យក្លាយជាសហគ្រិនដែរឬទេ?
នៅក្នុងប្រទេសកម្ពុជា ទាំងរដ្ឋាភិបាល និងវិស័យឯកជនកំពុងធ្វើការរួមគ្នាដើម្បីលើកទឹកចិត្តស្ត្រី មិនត្រឹមតែនៅក្នុងអាជីវកម្មប៉ុណ្ណោះទេ ប៉ុន្តែក៏មាននៅក្នុងស្ថាប័នរបស់រដ្ឋាភិបាលផងដែរ។ ដូចលោកដឹងហើយថា បច្ចុប្បន្ននេះយើងមានសមាគមសហគ្រិនស្ត្រីកម្ពុជា ស្ត្រីក្នុងធុរកិច្ច ស្ត្រីក្នុងបច្ចេកវិទ្យា និងសមាគមផ្សេងទៀតដែលតំណាងឱ្យស្ត្រីនៅក្នុងអាជីវកម្ម។ គោលដៅចុងក្រោយរបស់សមាគមទាំងនោះគឺដើម្បីលើកទឹកចិត្តស្ត្រីកាន់តែច្រើននៅក្នុងអាជីវកម្ម ខណៈពេលដែលយើងអាចឃើញថា នៅពេលនេះមានស្ត្រីជាច្រើនកំពុងដឹកនាំក្រុមហ៊ុន និងសូម្បីតែស្ថាប័នរដ្ឋាភិបាលមួយចំនួនផងដែរ។
ទាំងអស់នេះ ខ្ញុំអាចនិយាយថា រដ្ឋាភិបាលបានយកចិត្តទុកដាក់ក្នុងការធ្វើឱ្យមានសមភាពយេនឌ័រនៅក្នុងសេដ្ឋកិច្ច និងជួររដ្ឋាភិបាល ដើម្បីអនុញ្ញាតឱ្យស្ត្រីប្រើប្រាស់សមត្ថភាព និងផ្តល់លទ្ធភាពឱ្យពួកគេសម្រាប់ការរួមចំណែកក្នុងសេដ្ឋកិច្ច៕