.jpg)
សកម្មភាពហោះហើរនៅព្រលានយន្តហោះអន្តរជាតិភ្នំពេញ។ ហុង មិនា
ភ្នំពេញៈ មន្ត្រីជាន់ខ្ពស់នៃលេខាធិការដ្ឋានអាកាសចរស៊ីវិល បានថ្លែងថា ក្នុងឆ្នាំ ២០២៣ ចំនួនអ្នកដំណើរនឹងមានការកើនឡើងរហូតជាង ៤ លាននាក់ បើទោះបីគិតមកដល់ខែមករា ឆ្នាំ២០២៣ នេះ ការហោះហើររវាងប្រទេសចិន និងកម្ពុជា មិនទាន់មានការវិវត្តគួរឲ្យកត់សម្គាល់នៅឡើយក៏ដោយ។ នេះបើតាម លោកស៊ីន ចាន់សិរីវុត្ថា អនុរដ្ឋលេខាធិការនិងជាអ្នកនាំពាក្យរដ្ឋលេខាធិការដ្ឋានអាកាសចរស៊ីវិល បានប្រាប់ឱ្យដឹងពីស្ថានភាពនៃវិស័យអាកាសចរណ៍រយៈពេល ១២ ខែឆ្នាំ២០២២កន្លងមក។
លោក ថ្លែងថា គិតមកដល់ដំណាច់ខែធ្នូ ឆ្នាំ២០២២ សម្រាប់រយៈពេល១២ខែ (មករា-ធ្នូ) មានអ្នកដំណើរ ចំនួនជាង ២ លាននាក់ ដែលក្នុងនោះមានការកើនឡើងជិត ៩០០% បើធៀបទៅនឹងរយៈពេល១២ខែ ដូចគ្នា(មករា-ធ្នូ) នៅឆ្នាំ២០២១ហើយបើធៀបទៅនឹង រយៈពេល១២ខែដូចគ្នាទៅនឹងឆ្នាំ២០១៩ អ្នកដំណើរ មានចំនួនប្រមាណតែ២៥% ប៉ុណ្ណោះ នៃឆ្នាំ២០១៩។
លោក ស៊ីន ចាន់សិរីវុត្ថា បានបន្ថែមថា ចំនួនជើងហោះហើរមានចំនួនជិត ៣ ម៉ឺនជើង ក្នុងនោះមានការកើនឡើងជាង២៦០% បើធៀបទៅនឹងរយៈពេល១២ខែដូចគ្នា(មករា-ធ្នូ) នៅឆ្នាំ២០២១, បើធៀបទៅនឹង រយៈពេល១២ខែដូចគ្នានៅ ឆ្នាំ២០១៩ គឺ ចំនួនជើងហោះហើរ មានចំនួនប្រមាណតែ២៨% ប៉ុណ្ណោះនៃឆ្នាំ២០១៩។
យោងតាមរបាយការណ៍របស់លេខាធិការដ្ឋានអាកាសចរស៊ីវិលបានឱ្យដឹងថា កាលពីខែសីហា ឆ្នាំ២០២២ កន្លងមក(មុនថ្ងៃទី៨ ខែមករា ២០២៣) ជើងហោះហើររវាងចិន និងកម្ពុជា មានចំនួន៣០ជើងក្នុង១សប្តាហ៍ (កូតាកំណត់ដោយភាគីចិន) មានន័យថាក្រុមហ៊ុនអាកាសចរណ៍ខ្មែរអាចហោះទៅប្រទេសចិនចំនួន១៥ជើងក្នុង១សប្តាហ៍ និងក្រុមហ៊ុនអាកាសចរណ៍ចិនអាចធ្វើការហោះហើរមកកាន់ប្រទេសកម្ពុជា ចំនួន១៥ជើងក្នុង១សប្តាហ៍ដូចគ្នាផងដែរដោយមានក្រុមហ៊ុនអាកាសចរណ៍ចិនចំនួន៦ក្រុមហ៊ុនដែលកំពុងហោះហើរចេញ-ចូលកម្ពុជា មកពី៧គោលដៅ (destinations)។
ប្រភពដដែលបានបន្តថា បន្ទាប់ពីចិនបានប្រកាសបើកប្រទេស ចាប់ពីថ្ងៃទី៨ ខែមករា ឆ្នាំ២០២២ ក្រុមហ៊ុនទេសចរណ៍ចិនមួយចំនួន បានបង្ហាញពីនិន្នាការតភ្ជាប់ជើងហោះហើរឡើងវិញ តែយ៉ាងណាមិញមិនទាន់ប្រាកដប្រជានោះទេ ដោយសារពួកគេមិនទាន់ស្នើសុំការអនុញ្ញាតចុះចតជាក់លាក់នៅឡើយ។
លោក ស៊ីន ចាន់សិរីវុត្ថា បានថ្លែងថា៖ «កម្ពុជាស្វាគមន៍នូវការហោះហើររបស់ចិនមកកម្ពុជា ហើយសង្ឃឹមថា អាជ្ញាធរពាក់ព័ន្ធនឹងសម្រួលនូវវិធានការផ្សេងៗ ដើម្បីបើកទូលាយទទួលធុរជន និងភ្ញៀវទេសចរចិនពេលមកដល់កម្ពុជា។ ជាទូទៅយើងបានដឹងហើយថា បន្ទាប់ពីថ្ងៃទី៨ ខែមករា ប្រទេសចិនបើកចំហទីផ្សាររបស់គាត់ ឱ្យអ្នកដំណើររបស់គាត់ហោះចេញចូលធម្មតា ទៅកាន់ទិសដៅដែលគាត់ចង់ទៅ ដោយឡែកប្រទេសកម្ពុជា ក៏បានស្វាគមន៍ដល់ការតភ្ជាប់ការហោះហើរឡើងវិញ របស់ក្រុមហ៊ុនចិន ពីខេត្តទាំងឡាយណាដែលមានសក្តានុពលមកប្រទេសកម្ពុជា»។
លោកបានបន្តថា ៖«យើងពិនិត្យមើលឃើញមាននិន្នាការស្នើសុំទីចំណតបម្រុងឡើងវិញ តែយើងមិនអាចរាប់បានទេ ដោយសារការសុំទីចំណតបម្រុង មិនមែនជាសូចនាករជាក់លាក់នោះទេ យើងរង់ចាំមើលការស្នើសុំការអនុញ្ញាតចុះចតសិន នេះទើបអាចរាប់បានថា ជាចំនួនជាក់លាក់»។
ជាមួយនឹងការលុបចោលនូវគោលនយោបាយសូន្យកូវីដ (គ្មានការកំណត់កូតាទៀតឡើយ) លោក ស៊ីន ចាន់សិរីវុត្ថា ថ្លែងដោយរំពឹងទុកថា ជើងហោះហើរ រវាងចិន និងកម្ពុជា នឹងមានការកើនឡើងជាលំដាប់បន្ទាប់ពីចូលឆ្នាំចិនរួច។
លោកនាយករដ្ឋមន្ត្រី ហ៊ុន សែន នៅក្នុងជំនួបជាមួយរដ្ឋមន្ត្រីការបរទេសចិនកាលពីពាក់កណ្តាល ឆ្នាំ២០២២ កន្លងទៅ ក៏បានស្នើឲ្យប្រទេសចិន បង្កើនចំនួនជើងហោះហើររវាងប្រទេសទាំង២ ដើម្បីជួយជំរុញវិស័យទេសចរណ៍ក្នុងប្រទេសកម្ពុជា ខណៈដែលលោក វ៉ាង យី បានឆ្លើយតបថា ជើងយន្តហោះ បានត្រឡប់មកធម្មតាវិញហើយ ហើយចិន នឹងពិចារណាក្នុងការបង្កើនជើងហោះហើររវាងប្រទេសទាំង២ផងដែរ។
សូមរំឭកផងដែរថា រដ្ឋាភិបាលចិនបានប្រកាសបិទបញ្ចប់ការតម្រូវឱ្យធ្វើចត្តាឡីស័កសម្រាប់អ្នកដំណើរចូលមកក្នុងប្រទេស ចាប់ពីថ្ងៃទី៨ ខែមករា ឆ្នាំ២០២៣ តទៅ ដែលនេះជាជំហានដ៏សំខាន់មួយឆ្ពោះទៅរកការបើកប្រទេសឡើងវិញ គិតចាប់តាំងពីបានបិទច្រកទ្វារអន្តរជាតិ១ផ្នែកធំកាលពីដើមឆ្នាំ២០២០កន្លងមក៕
