.jpg)
សហគ្រាសធុនតូចនិងមធ្យមនឹងទទួលបានការអនុគ្រោះមួយចំនួនពីគយដើម្បីជំរុញកំណើន។ ហុឹន ពិសី
ភ្នំពេញ៖ មន្ត្រីជាន់ខ្ពស់នៃអគ្គនាយកនៃអគ្គនាយកដ្ឋានគយ និងរដ្ឋាករកម្ពុជាបានលើកឡើងថា ខ្លួនកំពុងពិចារណាកាត់បន្ថយពន្ធ លើទំនិញមួយចំនួន ដែលជ្រោមជ្រែងសហគ្រាសធុនតូចនិងមធ្យមក្នុងការជួយលើកស្ទួយវិស័យនេះឱ្យមានលទ្ធភាពបន្ថែមទៀតក្នុងការជំរុញផលិតកម្មនិងសេវាកម្មរបស់ខ្លួនដើម្បីមានឧត្តមភាពប្រកួតប្រជែងខ្លាំងជាងមុន។
លោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានថ្លែងជាសាធារណៈ កាលពីសប្ដាហ៍មុនថា អគ្គនាយកដ្ឋានគយនឹងពិចារណាក្នុងការបន្ថយពន្ធលើមុខទំនិញសម្រាប់ប្រើប្រាស់ប្រចាំថ្ងៃ និងទំនិញបម្រើដល់វិស័យសហគ្រាសធុនតូច និងមធ្យម (SME) វិស័យផលិតកម្ម និងវិស័យកសិឧស្សាហកម្ម នៅឆ្នាំ២០២៣នេះ ដើម្បីកាត់បន្ថយការចំណាយរបស់ពលរដ្ឋ ដែលជាវិស័យអាទិភាព។
លោកបានបញ្ជាក់យ៉ាងដូច្នេះថា៖«ក្នុងកាលៈទេសៈដែលកម្ពុជាកំពុងតែជួបការលំបាក និងកំពុងស្តារសេដ្ឋកិច្ចឡើងវិញ រដ្ឋនឹងពិនិត្យលទ្ធភាពក្នុងការបន្ធូរបន្ថយបន្ទុកពន្ធលើមុខទំនិញ ប្រើប្រាស់ជាចាំបាច់ប្រចាំថ្ងៃ របស់ប្រជាពលរដ្ឋ មានដូចជាម្ហូបអាហារ របស់របរប្រើប្រាស់មួយចំនួន ព្រោះបន្ទុកពន្ធចុងក្រោយបំផុត គឺធ្លាក់បន្ទុកទៅលើអ្នកប្រើប្រាស់ទាំងអស់គ្នា ជាអ្នកបង់ពន្ធ» ។
លោកបន្ថែមថា ក្រុមទំនិញដែលបម្រើឱ្យវិស័យ SME វិស័យផលិតកម្ម និងកសិឧស្សាហកម្ម គយក៏នឹងពិចារណាក្នុងការកាត់បន្ថយពន្ធផងដែរ ដើម្បីជួយសម្រួលបន្ទុករបស់ម្ចាស់សហគ្រាសធុនតូច និងមធ្យម និងក្រុមហ៊ុនផលិតកម្ម។
បើតាមអគ្គនាយកនៃអគ្គនាយកដ្ឋានគយ ខាងគយនឹងលើកសំណើនេះ ជូនក្រសួងសេដ្ឋកិច្ច និងហិរញ្ញវត្ថុ ដើម្បីកាត់បន្ថយអត្រាពន្ធអាករមួយចំនួន។ លោកបន្ថែមថា ៖«សម្រាប់ឆ្នាំ២០២៣នេះ អគ្គនាយកដ្ឋានគយ និងរដ្ឋាករកម្ពុជា នឹងមិនលើកសំណើកែប្រែអាករពិសេស លើមុខទំនិញដែលនឹងបន្ថែមបន្ទុក ទៅលើអ្នកប្រើប្រាស់នោះទេ បើសិនជាមាន គឺតិចតួចបំផុត យើងសុខចិត្តទ្រាំទ្រពីការបាត់បង់ពន្ធគយ ពីការអនុវត្តកាតព្វកិច្ចរបស់យើង ក្នុងក្របខ័ណ្ឌកិច្ចព្រមព្រៀងពាណិជ្ជកម្មសេរី តែទន្ទឹមនោះ យើងក៏មិនបន្ថែមបន្ទុក ក្នុងកាលៈទេសៈដែលប្រទេសយើង កំពុងស្ថិតក្នុងស្ថានភាពស្តារ និងអភិវឌ្ឍន៍សេដ្ឋកិច្ចឡើងវិញ បន្ទាប់ពីជំងឺកូវីដ១៩ទេ»។
បច្ចុប្បន្ន អគ្គ នាយកដ្ឋានគយ និងរដ្ឋាករកម្ពុជា កំពុងតែធ្វើការក្នុងកែសម្រួលអត្រាពន្ធអាករ លើមុខទំនិញមួយចំនួន ដែលការកែសម្រួលនេះ គឺមិនសំដៅលើការដំឡើងពន្ធនោះទេ គឺសំដៅទៅកាត់បន្ថយពន្ធនាំចូល។
លោក តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា បានប្រាប់ឱ្យដឹងថា បើសិនជា ខាងគយ និងរដ្ឋាករ មានការបន្ធូរបន្ថយពន្ធនាំទំនិញ ដែលបម្រើដល់វិស័យSME ពិតប្រាកដមែន ពិតជានឹងអាចជួយសម្រួលបានច្រើន ដល់ម្ចាស់SME ទាំងអស់ នៅក្នុងកាលៈទេសៈនេះ។
លោកបានបន្ថែមថា គោលនយោបាយឧស្សាហកម្ម ២០១៥-២០២៥ រាជរដ្ឋាភិបាល ជំរុញឱ្យមានការកែច្នៃច្រើនពីផលិតផលកសិកម្ម ដើម្បីទៅជាចំណីអាហារ ដូចនេះរាល់វត្ថុធាតុដើមផ្សេងៗទៀត ដែលនាំចូលពីក្រៅមក សម្រាប់បម្រើការឱ្យការផលិតនេះ គួរមានការបន្ធូរបន្ថយពន្ធលើផលិតផលទាំងនោះ។
លោកបានបញ្ជាក់ដូច្នេះថា៖« ក្រៅពីការបន្ធូរបន្ថយពន្ធហើយ ខ្ញុំយល់ថា ដើម្បីលើកស្ទួយផលិតផលក្នុងស្រុក និងជំរុញឱ្យមានការប្រើប្រាស់ផលិតក្នុងស្រុកកាន់តែច្រើន ទើបអាចលើកស្ទួយអ្នកនៅក្នុងវិស័យSMEបាន។ម្យ៉ាងវិញទៀត វាក៏ស្របនឹងគោលនយោបាយរបស់រាជដ្ឋាភិបាល ដែលដាក់ចេញមក ដោយត្រូវធ្វើយ៉ាងណាកាត់បន្ថយការនាំចូលផលិតផលសម្រេចឱ្យបានច្រើន។ ហើយបើសិនជានាំចូលមក ត្រូវមានការបង់ពន្ធឱ្យបានត្រឹមត្រូវ»។
បន្ទាប់ពីកម្ពុជាបានអនុវត្តកិច្ចព្រមព្រៀងពាណិជ្ជកម្មសេរីនានា ដូចជាកិច្ចព្រមព្រៀង RCEP កិច្ចព្រមព្រៀងពាណិជ្ជកម្មសេរីរវាងកម្ពុជា និងចិន និងកិច្ចព្រមព្រៀងពាណិជ្ជកម្មសេរីរវាងកម្ពុជា និងកូរ៉េជាដើម បានធ្វើឱ្យកម្ពុជាបាត់បង់ចំណូលពន្ធគយ លើទំនិញនាំចូលមួយផ្នែក ប៉ុន្តែកន្លងមកគយបានពិនិត្យ និងដំឡើងអត្រាអាករពិសេស លើមុខទំនិញមួយចំនួន ដោយផ្តោតលើមុខទំនិញប្រណីត និងទំនិញដែលប៉ះពាល់ដល់សុខភាព និងបរិស្ថាន ដូចជា បារី ស្រា ជាដើម៕
