.jpg)
លោក ឌិត ទីណា ទទួលជួបតំណាងក្រុមហ៊ុនមូមូ។ រូបថត ក្រសួងកសិកម្ម
ភ្នំពេញៈ ក្រសួងកសិកម្ម រុក្ខាប្រមាញ់ និងនេសាទ គាំទ្រការពង្រីកកសិដ្ឋានចិញ្ចឹមគោយកទឹកដោះរបស់ក្រុមហ៊ុនឯកជន ដោយផ្ដល់អនុសាសន៍ដល់ក្រុមហ៊ុនត្រូវរកជួលដីប្រជាពលរដ្ឋ ដើម្បីដាំស្មៅជាចំណីគោ ព្រោះបច្ចុប្បន្ន ក្រសួងមិនមានដីសម្បទានផ្ដល់ឱ្យក្រុមហ៊ុនទេ។
លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ក្នុងជំនួបពិភាក្សាជាមួយតំណាងក្រុមហ៊ុនចិញ្ចឹមគោយកទឹកដោះ MOMO FARM នៅទី ១៨ ខែមករា ឆ្នាំ ២០២៣ ដោយក្រុមហ៊ុនបង្ហាញពីគោលបំណងចង់ពង្រីកផ្ទៃដីផលិតកម្មរបស់ខ្លួន។
យោងតាមគេហទំព័ររបស់ក្រសួងកសិកម្មផ្សាយនៅថ្ងៃទី ១៨ ខែមករា ក្រោយពីជំនួបនោះបានឱ្យដឹងថា៖ «ឯកឧត្តមរដ្ឋមន្ដ្រីផ្ដល់អនុសាសន៍ដល់ក្រុមហ៊ុនធ្វើកិច្ចសន្យាជាមួយពលរដ្ឋដែលមានដីសម្រាប់ធ្វើការដាំស្មៅសម្រាប់ជាចំណីសត្វ។ ក្រសួងនឹងជួយសម្របសម្រួល ជំរុញការពង្រីកផលិតកម្មគោយកទឹកដោះនេះ ព្រោះបរិមាណគោយកទឹកដោះទូទាំងប្រទេសមានប្រមាណត្រឹម ១ ០០០ ក្បាលប៉ុណ្ណោះ»។
គេហទំព័រនេះបានឱ្យដឹងថា ក្នុងជំនួបនោះ លោករដ្ឋមន្ត្រីបានបញ្ជាក់ប្រាប់ក្រុមហ៊ុនថា បច្ចុប្បន្នក្រសួងមិនមានការផ្តល់ដីសម្បទានជូនក្រុមហ៊ុនឯកជនទៀតទេ នេះគឺស្របតាមសេចក្តីសម្រេចរបស់រាជរដ្ឋាភិបាល កាលពីឆ្នាំ ២០១២។
គេហទំព័រនេះបញ្ជាក់ថា បច្ចុប្បន្ន ក្រុមហ៊ុន MOMO FARM មានសមត្ថភាពផលិតទឹកដោះគោស្រស់ដល់ពាន់លីត្រ ក្នុង ១ ថ្ងៃ។ ក្រុមហ៊ុនមានផែនការពង្រីកអាជីវកម្មរបស់ខ្លួនបន្ថែមទៀត ដើម្បីឆ្លើយតបនឹងតម្រូវការទីផ្សារទឹកដោះគោស្រស់ក្នុងស្រុក ដោយក្រុមហ៊ុនត្រូវការដីបន្ថែមប្រមាណ ១ ម៉ឺនហិកតានៅមណ្ឌលគិរី សម្រាប់ដំណើរការផលិតកម្មនេះ។
លោក វ៉ាន់ សំអឿន អ្នកគ្រប់គ្រងទូទៅនៃក្រុមហ៊ុន ម៉ូម៉ូ ហ្វាម បានឱ្យដឹង នៅថ្ងៃទី ១៩ ខែមករាថា ការស្វែងរកដីសម្រាប់ធ្វើអាជីវកម្មបន្ថែមនៅខេត្តមណ្ឌលគិរីអាចជាទីតាំង ១ ប្រើប្រាស់ដាំដំណាំផ្សេងៗ មានទឹកគ្រប់គ្រាន់ អំណោយផលដល់ការធ្វើអាជីវកម្មចិញ្ចឹម គោយកទឹកដោះបាន។ ដោយឡែកចំពោះការស្វែងរកដៃគូដោយសហការជាមួយប្រជាពលរដ្ឋ ដើម្បីយកដីដាំដុះស្មៅចំណីគោនោះ ក្រុមហ៊ុនកំពុងខំប្រឹងធ្វើការងារ ប៉ុន្តែនៅមិនទាន់បានផលអ្វីជាដុំកំភួននៅឡើយ។
លោកថ្លែងថា បច្ចុប្បន្នក្រុមហ៊ុន ម៉ូម៉ូ ហ្វាម ចិញ្ចឹមគោយកទឹកដោះមានទីតាំងតែ ១ កន្លែងគត់គឺនៅ ឃុំអរិយក្សត្រ ស្រុកល្វាឯម ខេត្តកណ្តាល នៅជាប់នឹងក្បែរកំពង់ដអរិយក្សត្រ។
លោកបញ្ជាក់ថា៖ «បច្ចុប្បន្នយើងមានគោសរុបទាំងអស់ ១១៣ ក្បាល គោបូមយកទឹកដោះមាន ៤១ មេក្រមុំមាន ៣៥ គោផើមមាន ២២ កូនគោញីដែលជិតពេញក្រមុំមាន ៩ និងកូនគោឈ្មោលមាន ៦ ក្បាល។ ក្នុង ១ ថ្ងៃ យើងផលិតទឹកដោះគោបាន ៨០០ ទៅ ១ ០០០ លីត្រ»។
លោកថ្លែងថា ទឹកដោះគោស្រស់ដែលក្រុមហ៊ុន ម៉ូម៉ូ ហ្វាម ផលិតមានអាយុកាលខ្លីជាងផលិតផលនាំចូល ដោយសារតែ ក្រុមហ៊ុនបានបន្សុទ្ធទឹកដោះគោហើយវេចខ្ចប់សម្រាប់ដាក់លក់លើទីផ្សារដោយគ្មានការលាយសារធាតុ ឬគ្រឿងផ្សំផ្សេងៗ ដើម្បីរក្សាទុកយូរទេ។
លោកថ្លែងថា៖ «ខ្ញុំកត់សម្គាល់ប្រជាពលរដ្ឋខ្មែរបច្ចុប្បន្នចាប់ផ្តើមចាប់អារម្មណ៍គាំទ្រផលិតផលទឹកដោះគោស្រស់ ខ្ញុំសប្បាយចិត្តជាងមុនព្រោះដោយសារ ពេលដែលគាត់ញ៉ាំទឹកដោះគោយើងហើយ គឺគាត់ព្យាយាមតាមរកទិញទៀត ទោះបីជាយើងអត់ទាន់មានទីផ្សារទូលំទូលាយក៏ដោយ»។ ការផលិតទឹកដោះគោស្រស់ក្នុងស្រុកក៏មានសម្ភារបច្ចេកទេស និងគ្រឿងចក្រសុទ្ធតែទំនើប៕
