.jpg)
នាវាដឹកទំនិញនៅកំពង់ផែខេត្តព្រះសីហនុ កាលពីឆ្នាំ២០២១។ ហុង មិនា
ភ្នំពេញៈកម្ពុជាបាននាំចេញផលិតផលមួយចំនួន ទៅកាន់ប្រទេសអូស្ត្រាលីមានតម្លៃទឹកប្រាក់សរុបជាង ៣៧៩ លានដុល្លារ នៅក្នុងឆ្នាំ ២០២២ គឺមានការកើនឡើង ៨៥ ភាគរយ បើធៀបនឹងឆ្នាំ ២០២១។
ទំនិញទាំងនោះរួមមានផលិតផលកសិកម្ម ផលិតផលកាត់ដេរ និងកង់ជាដើម ខណៈអូស្រ្តាលីវិញបាននាំចូលមកកម្ពុជាភាគច្រើនជាទំនិញប្រើប្រាស់ គ្រឿងសំណង់ គ្រឿងយន្តកសិកម្ម និងចំណីអាហារជាដើម។
យោងតាមទិន្នន័យពីក្រសួងពាណិជ្ជកម្មបានឱ្យដឹងថា ចាប់ពីខែមករា ដល់ខែធ្នូ ឆ្នាំ២០២២ ការធ្វើពាណិជ្ជកម្មរវាងកម្ពុជានិងអូស្ត្រាលីសម្រាប់ឆ្នាំ២០២២ មានទំហំទឹកប្រាក់សរុប៥២៤លានដុល្លារ កើនឡើង៦១ភាគរយបើធៀបនឹងរយៈពេលដូចគ្នាក្នុងឆ្នាំ២០២១។
នៅក្នុងនោះ ការនាំចេញពីកម្ពុជាទៅអូស្ត្រាលី មានតម្លៃទឹកប្រាក់សរុបជាង៣៧៩ លានដុល្លារ កើនឡើង៨៥ភាគរយ ខណៈដែលការនាំចូលពីអូស្ត្រាលីមកវិញមានតម្លៃទឹកប្រាក់សរុប១៤៥ លានដុល្លារ កើនឡើង២០ភាគរយបើធៀបនឹង ឆ្នាំ២០២១។
លោកងួន ម៉េងតិច អគ្គនាយកសភាពាណិជ្ជកម្មកម្ពុជា បានប្រាប់ឱ្យដឹងថា ការកើនឡើងនៃទំហំពាណិជ្ជកម្មរវាងប្រទេសទាំង២ជាពិសេសការនាំចេញទៅអូស្ត្រាលី មានការកើនឡើងគួរឱ្យកត់សម្គាល់នេះ អាចថា ដោយសារទំនាក់ទំនងកាទូតនិងសេដ្ឋកិច្ចរវាងកម្ពុជា និងអូស្ត្រាលី កាន់តែស្អិតរល្មួតស្របពេលការរីករាលដាលនៃជំងឺកូវីដ១៩ក្នុងប្រទេសទាំង២មានការថមថយដូចគ្នា។
លោកបានបន្ថែមថា ប្រទេសអូស្ត្រាលី ថ្វីត្បិតតែជាប្រទេសអភិវឌ្ឍន៍ប៉ុន្តែបានផ្តោតសំខាន់និងយកចិត្តទុកដាក់ខ្ពស់លើវិស័យកសិកម្មដោយកន្លងមកកម្ពុជាបាននាំចូលផលិតផលកសិកម្មមួយចំនួនពីអូស្ត្រាលី ដូចបន្លែ ផ្លែឈើ និងសាច់សត្វជាដើម។
លោកបានបញ្ជាក់ថា៖«វាជារឿងដែលប្រសើរ ដែលការនាំចេញពីកម្ពុជា ទៅក្រៅប្រទេសមានការកើនឡើង និងមានទំហំទឹកប្រាក់ ច្រើនជាងការនាំចូល ដែលនេះបង្ហាញថា ការធ្វើពាណិជ្ជកម្មរបស់កម្ពុជា មានលក្ខណៈវិជ្ជមានគួរឱ្យកត់សម្គាល់។ ក្នុងជំនួបជាមួយទូតអូស្រ្តាលីកន្លងមក យើងកត់សម្គាល់ឃើញថា ឯកអគ្គរដ្ឋទូតអូស្រ្តាលីថ្មីនេះ មានភាពសកម្មក្នុងការជួយជ្រោមជ្រែងកម្ពុជា លើការធ្វើពាណិជ្ជកម្ម វិនិយោគ និងមានសកម្មភាពច្រើនជាមួយសភាពាណិជកម្ម។ បើស្ថានភាពនៅតែល្អប្រសើរបែបនេះ រំពឹងថា ពាណិជ្ជកម្មវាងកម្ពុជា និងអូស្ត្រាលី នឹងបន្តមានភាពវិជ្ជមានបន្តទៀតនៅឆ្នាំ២០២៣នេះ»។
លោកបានបន្តថា កំណើននៃការធ្វើពាណិជ្ជកម្មទ្វេភាគី ពិសេសការនាំចេញរបស់កម្ពុជាទៅអូស្ត្រាលី គឺមកពីកត្តាសំខាន់ៗមួយចំនួនដូចជា ភាពល្អប្រសើរនៃទំនាក់ទំនងការទូត, ការបើកប្រទេស និងសេដ្ឋកិច្ចបានឆាប់ពីវិបត្តិកូវីដ១៩ និងជាពិសេសប្រទេសទាំង២ ជាសមាជិកនៃ RCEP ដែលមានការផ្តល់ភាពអនុគ្រោះផ្នែកពន្ធឱ្យគ្នាទៅវិញទៅមក។
លោកបានបញ្ជាក់ដូច្នេះថា៖«អូស្ត្រាលី ជាប្រទេសរីកចម្រើននិងប្រជាជនមានចំណូលខ្ពស់ ដូច្នេះបើកម្ពុជាអាចផលិតទំនិញបានកាន់តែច្រើន និងមានគុណភាពកម្រិតស្តង់ដា នោះវានឹងធ្វើឱ្យការនាំចេញទៅអូស្ត្រាលីមានកាន់តែច្រើន ពិសេសផលិតផលដែលមានចែងក្នុងកិច្ចព្រមព្រៀង RCEP»។
លោក ហុង វណ្ណៈ អ្នកជំនាញសេដ្ឋកិច្ច នៃរាជបណ្ឌិតសភាកម្ពុជា បានឱ្យដឹងដែរថា កំណើននៃទំហំពាណិជ្ជកម្ម ជាមួយអូស្រ្តាលី ជាសញ្ញាណវិជ្ជមានមួយនៃកម្រិតទំនាក់ទំនាក់ទំនង នៃរាជរដ្ឋាភិបាលកម្ពុជា និងរដ្ឋាភិបាលអូស្រ្តាលី ដែលជំរុញឱ្យការនាំចេញ នាំចូលរវាងប្រទេសទាំង២ មានភាពរលូនល្អ។
លោកវណ្ណៈ បានបន្តថា ការនាំចេញផលិតផលជាច្រើនរបស់កម្ពុជា គឺឆ្លើយតបទៅនឹងតម្រូវការរបស់អូស្រ្តាលី ដែលមានន័យថា ជាទំនិញដែលមានគុណភាព មានស្តង់ដា ការដឹកជញ្ជូនគ្មានភាពរាំងស្ទះ ដែលជំរុញឱ្យពាណិជ្ជករអូស្រ្តាលីបន្តការបញ្ជាទិញជាបន្តបន្ទាប់។
លោកបានអះអាងថា៖«ដូចយើងដឹងហើយថា អូស្រ្តាលីក៏ជាសមាជិករបស់ RCEP ផងដែរ ដោយនេះក៏ជាកត្តាមួយ ដែលជំរុញកំណើនពាណិជ្ជកម្មរវាងប្រទេសទាំង២ផងដែរ។ ដូច្នេះ ទាំងនៅក្នុងក្របខណ្ឌទ្វេភាគី និងនៅក្នុងក្របខណ្ឌ RCEP នឹងអាចអនុញ្ញាតឱ្យអូស្រ្តាលី សម្លឹងឃើញផលិតផលរបស់កម្ពុជា កាន់តែច្រើន ខណៈដែលកម្ពុជា ក៏អាចត្រៀមខ្លួនក្នុងការផលិតទំនិញ សម្រាប់បំពេញតម្រូវការទីផ្សារអូស្រ្តាលីវិញ»៕
