ភ្នំពេញៈ តាមរយៈគោលនយោបាយស្វាយចន្ទីរបស់រាជរដ្ឋាភិបាល ដែលទើបតែបានដាក់ចេញឱ្យអនុវត្តកាលពីពេលថ្មីៗនេះ កម្ពុជាបានកំណត់គោលដៅធ្វើយ៉ាងណា កែច្នៃទិន្នផលគ្រាប់ស្វាយចន្ទីរបស់ខ្លួន ឱ្យបានដល់ ២៥ ភាគរយ នៃទិន្នផលសរុប សម្រាប់នាំចេញទៅលក់នៅលើទីផ្សារអន្តរជាតិនៅត្រឹមឆ្នាំ ២០២៧ ខណៈបច្ចុប្បន្ន កម្ពុជានាំចេញគ្រាប់ស្វាយចន្ទីឆៅភាគច្រើន។
លោកវ៉ា រុតសាន រដ្ឋលេខាធិការក្រសួងពាណិជ្ជកម្ម ឱ្យដឹងថា ការដាក់គោលដៅបែបនេះ ព្រោះរាជរដ្ឋាភិបាលចង់រួមចំណែកជួយបង្កើនផលិតកម្មដាំដុះ តម្លៃ និងពង្រីកទីផ្សារនាំចេញគ្រាប់ស្វាយចន្ទីរបស់កម្ពុជាទៅកាន់ទីផ្សារអន្តរជាតិបន្ថែមទៀត ដ្បិតការនាំចេញកន្លងមករបស់កម្ពុជាភាគច្រើនលើសលប់ជាគ្រាប់ស្វាយចន្ទីមិនទាន់កែច្នៃ ហើយទីផ្សារធំបំផុតគឺវៀតណាម។
សូមបញ្ជាក់ផងដែរថា លោកវ៉ា រុតសាន មិនត្រឹមតែជាមន្រ្តីជាន់ខ្ពស់នៃក្រសួងពាណិជ្ជកម្មប៉ុណ្ណោះទេ លោកក៏ជាអ្នកជំនាញដាំដុះស្វាយចន្ទី១រូប និងបានដាំដុះដំណាំស្វាយចន្ទីអស់រយៈពេលជាច្រើនឆ្នាំមកហើយ។
លោកក៏បានលើកឡើងដែរថា ក្នុងចំណោមបរិមាណនាំចេញគ្រាប់ស្វាយចន្ទីសរុបរបស់កម្ពុជា ដែលមានក្នុងរង្វង់ប្រមាណជាង១លានតោនក្នុង១ឆ្នាំៗ មានតែ៥ភាគរយប៉ុណ្ណោះ ដែលជាផលិតផលគ្រាប់ស្វាយចន្ទី ត្រូវបានកែច្នៃរួច ក្រៅពីនេះជាគ្រាប់ស្វាយចន្ទីស្រស់។
លោករុតសាន បញ្ជាក់ថា៖«តាមរយៈទិន្នផល ដែលកម្ពុជាផលិតបានជាង១លានតោនក្នុង១ឆ្នាំ ពិតជាមានសក្តានុពលគ្រប់គ្រាន់ក្នុងការទាក់ទាញវិនិយោគិនបរទេសឱ្យបោះទុនវិនិយោគក្នុងឧស្សាហកម្មកែច្នៃគ្រាប់ស្វាយចន្ទីនៅកម្ពុជា។ បើតាមការវាយតម្លៃរបស់ខ្ញុំ កម្ពុជាជាប្រទេស ដែលផលិតគ្រាប់ស្វាយចន្ទីបានច្រើនជាងគេមួយនៅលើពិភពលោក»។
លោកវ៉ា រុតសាន ក៏បានបង្ហាញសុទិដ្ឋិនិយមថា ការដាក់ចេញគោលនយោបាយស្វាយចន្ទីរបស់រាជរដ្ឋាភិបាល ពិតជានឹងធ្វើឱ្យប្រសើរឡើងនូវខ្សែចង្វាក់ផលិតកម្ម និងតម្លៃគ្រាប់ស្វាយចន្ទីនៅកម្ពុជា ដែលវានឹងជួយតម្លៃគ្រាប់ស្វាយចន្ទីឱ្យកាន់តែល្អប្រសើរ។ ជាពិសេសជួយជំរុញកំណើនការដាំដុះ និងនាំចេញទៅលក់នៅលើទីផ្សារអន្តរជាតិជាដើម។
ជាមួយគ្នានេះដែរ ប្រធានសមាគមស្វាយចន្ទីកម្ពុជា(សសក) លោកអួន ស៊ីឡុត ក៏បានបង្ហាញសុទិដ្ឋិនិយមដែរថា គោលនយោបាយជាតិស្វាយចន្ទី អាចអនុវត្តទៅបាន ប្រសិនបើអាជ្ញាធរពាក់ព័ន្ធចាក់បញ្ចូលថវិកាទៅក្នុងចរន្តនៃឧស្សាហកម្មមួយនេះ។
លោកបញ្ជាក់ថា៖«ការចាក់ចូលថវិកាទៅក្នុងឧស្សាហកម្មមួយនេះ សំដៅដល់ការវិនិយោគបន្ថែមលើរោងចក្រកែច្នៃ ឃ្លាំងស្តុក ឡសម្ងួតជាដើម ដើម្បីធ្វើឱ្យឧស្សាហកម្មមួយដើរបានកាន់តែលឿន និងប្រសើរឡើង ក្នុងការជួយសម្រួលដល់សេដ្ឋកិច្ចជាតិ។ នៅក្នុងវិស័យកសិកម្មនេះ ខ្ញុំនៅតែជឿជាក់ជានិច្ច»។
ថ្មីៗនេះ សមាគមស្វាយចន្ទីកម្ពុជា ទើបតែបានចុះអនុស្សរណៈយោគយល់ ជាមួយសមាគមស្វាយចន្ទីវៀតណាម Vinacas ក្នុងការទិញលក់គ្រាប់ឆៅត្រង់ទៅក្រុមហ៊ុនកែច្នៃរបស់វៀតណាម ដើម្បីកាត់បន្ថយឈ្មួញកណ្តាល។ សមាគមស្វាយចន្ទីកម្ពុជា រំពឹងថា គ្រាប់ស្វាយចន្ទីឆៅ ដែលកសិករផលិតបាននឹងមានតម្លៃសមរម្យ មានស្ថិរភាព ខណៈដែលកម្ពុជាមានរោងចក្រកែច្នៃតិច ត្រូវការការបញ្ជាទិញគ្រាប់ឆៅពីវៀតណាម។ ការជំរុញនាំចេញគ្រាប់ឆៅនេះ ដោយសារតែកម្ពុជាមានរោងចក្រកែច្នៃតិច ត្រូវការការទិញគ្រាប់ឆៅពីវៀតណាមបន្ថែមទៀត។
សូមរំឭកថា កាលពីចុងខែកុម្ភៈ ឆ្នាំ២០២៣ លោកនាយករដ្ឋមន្រ្តីហ៊ុន សែន ធ្លាប់បានថ្លែងថា នាពេលខាងមុខ បើមានលទ្ធភាព កម្ពុជាអាចក្លាយជាប្រទេសដែលចែកចាយគ្រាប់ស្វាយចន្ទីដ៏ធំមួយ ក្នុងចំណោមប្រទេសចែកចាយធំៗដទៃទៀតនៅលើពិភពលោក ព្រោះក្នុង១ឆ្នាំ កម្ពុជានាំចេញគ្រាប់ស្វាយចន្ទីដែលមិនទាន់កែច្នៃ១លានតោន ខណៈដែលកម្ពុជា កែច្នៃខ្លួនឯងបានតិចតួចណាស់ ដែលបានយកមកតាំងពិព័រណ៍លក់នាពេលកន្លងមក។
លោកនាយករដ្ឋមន្រ្តីបញ្ជាក់ថា៖«គោលនយោបាយស្វាយចន្ទី ដែលយើងបានដាក់ចេញកាលពីប៉ុន្មានខែមុននោះ គឺសំដៅទាក់ទាញការកែច្នៃនៅក្នុងស្រុក។ វៀតណាម និងឥណ្ឌា គឺជាប្រទេស ដែលចែកចាយគ្រាប់ស្វាយចន្ទីទៅកាន់ច្រើនកន្លែង នៅលើពិភពលោក ប៉ុន្តែវៀតណាមគាត់ទៅដឹកគ្រាប់ស្វាយចន្ទីមួយចំនួនពីប្រទេសអាហ្វ្រិកយកមកកែច្នៃ ហើយក៏មាន១ផ្នែក ដែលកម្ពុជាយើងពឹងផ្អែកលើទីផ្សារវៀតណាម ដើម្បីនាំចេញគ្រាប់ស្វាយចន្ទីទៅទីនោះ។ ឥណ្ឌាក៏ដូចគ្នា ១ផ្នែក ដាំដុះនៅក្នុងស្រុក តែ១ផ្នែកទៀត ក៏គាត់នាំចូលដែរ។ គ្រាប់ស្វាយចន្ទីនេះ វានាំចេញទៅកាន់គោលដៅទេសចរណ៍ នៅតាមទីផ្សារនានានៅលើពិភពលោក»។
សូមបញ្ជាក់ថា «គោលនយោបាយជាតិស្តីពីស្វាយចន្ទី ឆ្នាំ២០២២-២០២៧» ត្រូវបានអនុម័តកាលពីថ្ងៃទី១៣ ខែមករា ឆ្នាំ២០២៣ ដើម្បីអភិវឌ្ឍផលិតកម្ម កែច្នៃ និងទីផ្សារស្វាយចន្ទីឱ្យមានលក្ខណៈប្រកួតប្រជែងប្រកបដោយបរិយាប័ន្ន ធានានូវនិរន្តរភាព និងការធ្វើពិពិធកម្មសេដ្ឋកិច្ច។
របាយការណ៍ពីសមាគមស្វាយចន្ទីកម្ពុជា បានបង្ហាញថា ក្នុងឆ្នាំ២០២២ កម្ពុជានាំចេញគ្រាប់ស្វាយចន្ទីឆៅទៅទីផ្សារអន្តរជាតិ ចំនួន៦៧ម៉ឺនតោន គិតជាទឹកប្រាក់១ពាន់ ៧៧លានដុល្លារអាមេរិក។ ក្នុងនោះប្រទេសដែលនាំចូលគ្រាប់ស្វាយចន្ទីពីកម្ពុជា មានជាអាទិ៍ ប្រទេសវៀតណាម ជប៉ុន និងចិន ខណៈប្រទេសផ្សេងៗទៀតក៏កំពុងតែសម្លឹងមើលឱកាសក្នុងការនាំចូលគ្រាប់ស្វាយចន្ទីកម្ពុជាទៅកាន់ទីផ្សារប្រទេសខ្លួនដែរ៕