ការមកដល់ទាន់ពេលវេលានៃប្រាក់កម្ចីគ្មានការប្រាក់គឺដើម្បីជួយអ្នកលក់គ្រឿងទេស អ្នកស្រី ប្រាក់ លឹមហៀង បន្តផ្តល់ដល់អតិថិជននៅសង្កាត់របស់គាត់ ក្នុងខណ្ឌមានជ័យ រាជធានីភ្នំពេញ ទោះបីជាមានការប្រឈមនឹងការផ្គត់ផ្គង់តាមរដូវកាលក៏ដោយ។
សហគ្រិនស្ត្រីដែលមានគំនិតច្នៃប្រឌិតរូបនេះ បានរៀបចំយុទ្ធសាស្រ្តអាជីវកម្មរបស់គាត់រួចហើយសម្រាប់ រដូវក្តៅនេះ និងរដូវភ្លៀងខាងមុខ ដោយទិញទំនិញសំខាន់ៗស្តុកទុកជាច្រើន ដើម្បីជួយឱ្យអាជីវកម្មរបស់គាត់បន្តរីកចម្រើន និងធានាថា គាត់មានស្តុកទំនិញគ្រប់គ្រាន់សម្រាប់អតិថិជនរបស់គាត់។
ការផ្តល់មូលនិធិរបស់ សុវណ្ណាភូមិ ឡាយហ្វ៍ ដល់សហគ្រិនស្ត្រីរូបនេះ ដែលជាគម្រោងទំនួលខុសត្រូវសង្គមរបស់ក្រុមហ៊ុននៅក្នុងឆ្នាំនេះ បានឈានមកដល់ពេលវេលាដ៏សំខាន់ ហើយសម្រាប់ អ្នកស្រី លឹមហៀង ដែលអ្នកស្រីគ្រោងនឹងប្រើប្រាស់ដើមទុននេះ ដើម្បីវិនិយោគលើការទិញទំនិញស្តុកទុកបន្ថែមសម្រាប់ការផ្លាស់ប្តូរតាមរដូវកាល។
អ្នកស្រី លឹមហៀង អាយុ ៣៩ឆ្នាំ បានថ្លែងបន្តថា ៖«គម្រោងផ្តល់កម្ចីខ្នាតតូចដោយឥតគិតការប្រាក់នេះ គឺពិតជាល្អណាស់សម្រាប់ខ្ញុំក្នុងរដូវក្ដៅនេះ។ ខ្ញុំអាចទិញទំនិញស្តុកទុកបានជិតមួយឆ្នាំជាមួយនឹងកម្ចីចំនួន ៣០០ ដុល្លារ ព្រោះតម្លៃទំនិញបច្ចុប្បន្នគឺថោកជាងរដូវភ្លៀង។ ខ្ញុំក៏អាចរកប្រាក់ចំណេញបានខ្លះដែរ ពីព្រោះវាជាកម្ចីឥតការប្រាក់»។
អ្នកស្រីគឺជាមនុស្សម្នាក់ក្នុងចំណោម ៥នាក់ ដែលត្រូវបានជ្រើសរើសដោយសុវណ្ណាភូមិ ឡាយហ្វ៍ សម្រាប់គម្រោង CSR របស់ខ្លួន ជាគម្រោងផ្តល់មូលនិធិដល់សហគ្រិនស្ត្រីដែលប្រតិបត្តិការអាជីវកម្មខ្នាតតូចដោយសហការជាមួយ Lady Saving Group ដែលជាផ្នែកមួយនៃអង្គការមិនស្វែងរកប្រាក់ចំណេញ Women Entrepreneurs Act។
អ្នកស្រី លឹមហៀង គឺជាសហគ្រិនដែលមានការតាំងចិត្តខ្ពស់។ អ្នកស្រីខិតខំតស៊ូ មិនចុះចាញ់ សូម្បីតែបន្ទាប់ពីអាជីវកម្មបោកអ៊ុត និងស្ប៉ា របស់គាត់បានដួលរលំក្នុងអំឡុងពេលវិបត្តិជំងឺកូវីដក៏ដោយ។ ផ្ទុយទៅវិញ អ្នកស្រីបានបន្តបើកហាងលក់គ្រឿងទេស ដែលជួយលើកកម្ពស់ផលិតផលដែលផលិតនៅក្នុងប្រទេសកម្ពុជា ជាពិសេស ទឹកឃ្មុំដែលអ្នកស្រីទិញមកពីខេត្តមណ្ឌលគិរី ជាខេត្តដែលល្បីល្បាញដោយសារទឹកឃ្មុំព្រៃ និងពេញនិយមក្នុងចំណោមអតិថិជនរបស់គាត់ផងដែរ។
លោក Loke Kah Meng អគ្គនាយកក្រុមហ៊ុនធានារ៉ាប់រងអាយុជីវិត សុវណ្ណាភូមិ ឡាយហ្វ៍ មានប្រសាសន៍ថា ៖«វាពិតជាគួរឱ្យរំភើបណាស់ ដែលបានមើលឃើញស្ត្រីកំពុងឈានជើងចូលទៅក្នុងពិភពជំនួញជាមួយជំនាញ ឬ ធនធានហិរញ្ញវត្ថុមានកម្រិត។ គោលដៅនៃគម្រោង CSR របស់យើងគឺជំរុញទឹកចិត្តសហគ្រិនស្ត្រីទាំងនេះ ហើយយើងសង្ឃឹមថា ជាមួយនឹងការគាំទ្រផ្នែកហិរញ្ញវត្ថុដ៏តិចតួចរបស់យើងនេះ ពួកគាត់អាចក្លាយជាសហគ្រិនដែលមានភាពរីកចម្រើន និងទទួលបានសុវត្ថិភាពហិរញ្ញវត្ថុផងដែរ»។
សុវណ្ណាភូមិ ឡាយហ្វ៍ បានចាប់ផ្តើមយុទ្ធនាការ CSR របស់ខ្លួនដោយឧបត្ថម្ភព្រឹត្តិការណ៍រត់ប្រណាំងស្ត្រី “Women Run 10k 2023” ក្នុងទិវាអន្តរជាតិនារី ៨ មីនា។
ព្រឹត្តិការណ៍រត់ប្រណាំងនោះ ត្រូវបានធ្វើឡើងក្រោមប្រធានបទ «ស្ត្រីក្នុងភាពជាអ្នកដឹកនាំ» ដែលត្រូវបានរៀបចំដោយគណៈកម្មាធិការជាតិអូឡាំពិកកម្ពុជា ហើយសុវណ្ណាភូមិ ឡាយហ្វ៍ បានសន្យាថានឹងចូលរួមវិភាគទានចំនួន ៤ ០០០ រៀល សម្រាប់ការចុះឈ្មោះចូលរួមរត់ម្នាក់ ដើម្បីផ្តល់មូលនិធិដល់គម្រោងគំនិតផ្តួចផ្តើម CSR របស់ខ្លួន។
អ្នករត់ប្រណាំងប្រមាណ ១ ៦០០ នាក់ បានចូលរួមក្នុងការរត់ប្រណាំងចម្ងាយ ១០ គីឡូម៉ែត្រ ដែលបានប្រារព្ធធ្វើឡើងនៅសួនច្បារវត្តបទុមវតី មហាវិថីសុធារស រាជធានីភ្នំពេញ ក្នុងនោះក៏មានការរត់កម្សាន្តលក្ខណៈគ្រួសារ និងកុមារក្នុងចម្ងាយ ៤ គីឡូម៉ែត្រផងដែរ។
សុវណ្ណាភូមិ ឡាយហ្វ៍នឹងផ្តល់ថវិកាចំនួន ២ ០០០ ដុល្លារសម្រាប់គម្រោង CSR ដែលក្នុងនោះ ៥០០ ដុល្លារនឹងផ្តល់ទៅឱ្យ Lady Saving Group ដើម្បីផ្តល់ហិរញ្ញប្បទានដល់សកម្មភាពដែលកំពុងដំណើរការរបស់ខ្លួន ខណៈសហគ្រិនចំនួន៥រូប ដែលត្រូវបានជ្រើសរើសនឹងទទួលបានប្រាក់កម្ចីចំនួន ៣០០ ដុល្លារដោយគ្មានការប្រាក់។
ប្រាក់កម្ចីគ្មានការប្រាក់នេះនឹងត្រូវបញ្ជូនតាមរយៈ Lady Saving Group ហើយកម្ចីត្រូវសងត្រឡប់វិញក្នុងរយៈពេល១០ខែ។ បន្ទាប់មក ប្រាក់នោះនឹងត្រូវបានចែកចាយឡើងវិញទៅឱ្យសហគ្រិនស្ត្រីផ្សេងទៀតដែលស័កិ្កសមនិងទទួល។
អ្នកស្រី វីរៈ ប៊ុណ្ណារ័ត្ន សហស្ថាបនិក និងជាប្រធានផ្នែកយុទ្ធសាស្ត្រនិងកម្មវិធីនៃ Lady Saving Group ថ្លែងថា ៖«គម្រោង CSR របស់សុវណ្ណាភូមិ ឡាយហ្វ៍ អាចជាកាតាលីករមួយសម្រាប់ការអភិវឌ្ឍសហគ្រិនស្ត្រីដែលគាំទ្រសេដ្ឋកិច្ចរបស់យើង។ ពួកគាត់នាំមកនូវអត្ថប្រយោជន៍ជាច្រើនដល់សង្គមជាតិរបស់យើង តាមរយៈការបង្កើតការងារ កាត់បន្ថយភាពក្រីក្រ ក្លាយជាគំរូ និងកា្លយជាអ្នកដឹកនាំនៅក្នុងសហគមន៍មូលដ្ឋានរបស់ពួកគេ»។
សុវណ្ណាភូមិ ឡាយហ្វ៍ ផ្តល់ជូនការបញ្ចុះតម្លៃពិសេសរហូតដល់ ២០ ភាគរយ លើផលិតផលដ៏ពេញនិយមរបស់ខ្លួនគឺ SMILE Life Solutions សម្រាប់អ្នកចូលរួមទិវារត់ប្រណាំងស្ត្រី ១០គីឡូម៉ែត្រ។ការផ្តល់ជូននេះមានសុពលភាពរហូតដល់ថ្ងៃទី ៣១ ខែមីនា ឆ្នាំ២០២៣៕