.jpg)
វិភាគដោយ៖ លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ភីភី លីង ស៊ីឃ្យួរឹធី
តម្លៃមាសកាលពីថ្ងៃអង្គារបានកើនឡើងដល់តម្លៃ ២ ០២៥,១៧ ដុល្លារ (ក្នុង ១ អោនស៍) ដែលជាតម្លៃខ្ពស់បំផុត បន្ទាប់ពីតម្លៃ ២ ០៧០ ដុល្លារ ដែលបានកើនឡើងនៅខែមីនា ឆ្នាំ ២០២២។ តម្លៃ ២ ០៧០ ដុល្លារនេះ ត្រូវការត្រឹមតែប្រហែល ៥ ដុល្លារទៀតប៉ុណ្ណោះ ដើម្បីបំបែកតម្លៃខ្ពស់បំផុតជាប្រវត្តិសាស្ត្ររបស់មាសនៅក្នុងខែសីហា ឆ្នាំ២០២០។
សម្រាប់ទិសដៅរយៈពេលវែង មាសអាចបំបែកកំណត់ត្រាខ្ពស់នៅក្នុងប្រវត្តិសាស្ត្ររបស់ខ្លួន ដែលបានកើតឡើងក្នុងអំឡុងពេលនៃវិបត្ដិសេដ្ឋកិច្ចពិភពលោក ដែលបណ្តាលមកពីជំងឺរាតត្បាតសកល ជាមួយនឹងការព្រួយបារម្ភបញ្ហាសេដ្ឋកិច្ចថ្មីៗទូទាំងពិភពលោក ដូចជា៖ វិបត្តិធនាគារនៅសហរដ្ឋអាមេរិក និងស្វ៊ីស និងសង្គ្រាមរុស្ស៊ីអ៊ុយក្រែនជាដើម។
ក្នុងរយៈពេលខ្លីវិញ អ្នកវិនិយោគអាចផ្តោតលើទិន្នន័យការងារនៅសហរដ្ឋអាមេរិកសម្រាប់ខែមីនា ដែលគ្រោងនឹងចេញផ្សាយថ្ងៃសុក្រនេះ វេលាម៉ោង ៧:៣០ យប់ (ម៉ោងនៅកម្ពុជា)។ គួរបញ្ជាក់ផងដែរថា អត្រាអ្នកមានការងារធ្វើនៅសហរដ្ឋអាមេរិកត្រូវបានព្យាករថា នឹងមានការបន្ថែម ២៣៦ ០០០ ប៉ុន្ដែ ដែលទាបជាងតួលេខជាក់ស្តែងកាលពីខែមុន ៧៥ ០០០ ខណៈអត្រាអ្នកគ្មានការងារធ្វើត្រូវបានព្យាករថា នឹងនៅតែកម្រិត ៣,៦% ដដែល។
សម្រាប់ការវិភាគជួញដូរក្នុងសប្តាហ៍នេះ វិនិយោគិន និងអ្នកជួញដូរអាចពិចារណាលើការជួញដូរក្នុងចន្លោះសុវត្ថិភាពពីតម្លៃ ១ ៩៨៩ ទៅ ២ ០០០ ដុល្លារ ដោយកំណត់មុខងារទាញយកប្រាក់ចំណេញនៅតម្លៃ ២ ០២៣ ដុល្លារ និងមុខងារការពារហានិភ័យនៅតម្លៃ ១ ៩៦៥ ដុល្លារ៕
