ភ្ញៀវទេសចរជាតិ និងអន្តរជាតិចូលទស្សនាប្រាសាទអង្គរវត្តកន្លងមក។ សហការី
វិស័យទេសចរណ៍កម្ពុជារំពឹងថានឹងបង្ហាញសញ្ញាវិជ្ជមានកាន់តែច្រើនចាប់ពីត្រីមាសទី ៤ ឆ្នាំ២០២៤ ខណៈរដ្ឋាភិបាល និងផ្នែកឯកជន បានបង្ហាញពីឆន្ទះក្នុងការចូលរួមសហការដើម្បីស្វែងរកដំណោះស្រាយបញ្ហាដែលវិស័យនេះបានបន្តជួបប្រទះក្នុងរយៈពេលជាង ៤ឆ្នាំ កន្លងមកនេះ។
បញ្ហាប្រឈម និងសំណូមពរមួយចំនួនដែលវិស័យទេសចរណ៍នៅកម្ពុជាកំពុងជួបប្រទះ ត្រូវបានលើកឡើងក្នុងជំនួបពិភាក្សារវាងរដ្ឋមន្រ្តីក្រសួងទេសចរណ៍ ទើបតែងតាំងថ្មី លោក ហួត ហាក់ ជាមួយនឹងសមាគមទេសចរណ៍កម្ពុជា(Cambodia Tourism Association-CATA) ដែលដឹកនាំដោយ លោកស្រី ឆាយ ស៊ីវលីន ប្រធានសមាគម CATA កាលពីថ្ងៃទី២១ ខែកញ្ញា ឆ្នាំ ២០២៤។
ក្នុងជំនួបខាងលើ លោក ហួត ហាក់ បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់សមាគម CATA លើការប្តេជ្ញាចិត្ត និងការចូលរួមចំណែកក្នុងការជួយជំរុញវិស័យទេសចរណ៍នៅកម្ពុជា ដោយលោកជឿជាក់ថា CATA នឹងនៅតែបន្តចូលរួមចំណែកគាំទ្រ និងអភិវឌ្ឍវិស័យទេសចរណ៍នៅកម្ពុជាបន្ថែមទៀត។
ជាមួយគ្នានេះលោកក៏សន្យាទទួលយកបញ្ហាដែលផ្នែកឯកជន លើកឡើង ដើម្បីយកទៅពិភាក្សាក្នុងក្របខណ្ឌក្រសួង, អន្តរក្រសួង, ក្រុមការងារផ្នែកទេសចរណ៍ និងក្នុងក្របខណ្ឌវេទិការាជរដ្ឋាភិបាល-ផ្នែកឯកជន ដើម្បីធ្វើការឆ្លើយតបឱ្យមានប្រសិទ្ធភាព ប្រសិទ្ធផល និងទាន់ពេលវេលា។
ថ្លែងប្រាប់ភ្នំពេញប៉ុស្តិ៍ក្នុងថ្ងៃទី២៥ ខែកញ្ញា នេះ លោកស្រី ឆាយ ស៊ីវលីន ឱ្យដឹងថា ទោះបីបច្ចុប្បន្នកំណើនសេដ្ឋកិច្ចសកល ព្រមទាំងសកម្មភាពក្នុងវិស័យទេសចរណ៍ពិភពលោក ចាប់ផ្តើមមានភាពល្អឡើងវិញពីវិបត្តិដែលបណ្តាលមកពីជំងឺកូវីដ១៩ ក៏វិស័យទេសចរណ៍កម្ពុជា ហាក់នៅមិនទាន់ទទួលបានភាពវិជ្ជមានខ្លាំងដូចបណ្តាប្រទេសជិតខាងក្នុងតំបន់ឡើយ។
លោកស្រីបន្ថែមថា ទោះយ៉ាងណាតាមរយៈជំនួបដែលប្រើពេលដ៏យូរជាមួយថ្នាក់ដឹកនាំថ្មីរបស់ក្រសួងទេសចរណ៍ លោកស្រី និងសហការីទាំងអស់មានសុទិដ្ឋិនិយមថា វិស័យទេសចរណ៍កម្ពុជានឹងបង្ហាញភាពវិជ្ជមានបន្ថែមទៀតចាប់ពីពេលនេះតទៅ។
លោកស្រីបាននិយាយថា៖«មុនចេញដើរកម្សាន្តទៅគោលដៅទេសចរណ៍ប្រទេសណា ភ្ញៀវទេសចរតែងគិតទៅលើភាពងាយស្រួលដែលប្រទេសនោះផ្តល់ឱ្យ និងថវិកា ដូច្នេះបើយើងអាចសម្រួលបានច្រើន ខ្ញុំគិតថាឱកាសក្នុងការទាក់ទាញភ្ញៀវបរទេសឱ្យចូលមកកម្ពុជាក៏នឹងមានចំនួនកាន់តែច្រើនដែរ»។
បើតាមលោកស្រី ស៊ីវលីន ក្នុងជំនួបកាលពីចុងសប្តាហ៍មុន ផ្នែកឯកជននៃវិស័យទេសចរណ៍កម្ពុជា បានលើកឡើងបញ្ហាប្រឈម និងសំណូមពរមួយចំនួនដើម្បីឱ្យរដ្ឋាភិបាលជួយដោះស្រាយ ដែលមានដូចជា ការជំរុញ និងបង្កើនប្រសិទ្ធភាពនៃការផ្សព្វផ្សាយឱ្យបានកាន់តែទូលំទូលាយទូទាំងពិភពលោក, ការកាត់របាំងមួយចំនួនសម្រាប់ភ្ញៀវបរទេសដែលមានបំណងធ្វើដំណើរចូលមកកម្សាន្តនៅកម្ពុជា (ការលើកលែងទិដ្ឋាការ, ការទម្លាក់តម្លៃទិដ្ឋាការ, លក្ខខណ្ឌក្នុងការស្នើសុំទិដ្ឋាការ[ប្រទេសខ្លះតម្រូវឱ្យមានរបាយការណ៍ហិរញ្ញវត្ថុ]), ការកាត់បន្ថយតម្លៃសំបុត្រចូលកម្សន្តសម្រាប់ភ្ញៀវបរទេស, ... និងកាតព្វកិច្ចបង់ពន្ធសម្រាប់ប្រតិបត្តិករ/ក្រុមហ៊ុនទេសចរណ៍ ជាដើម។
លោកស្រីបញ្ជាក់ថា៖«យើងសង្ឃឹមយ៉ាងមុតមាំថា ថ្នាក់ដឹកនាំក្រសួងទេសចរណ៍នឹងជួយសម្របសម្រួល ព្រមទាំងព្យាយាមដោះរបាំងទាំងឡាយដែលកំពុងកើតមាន ដើម្បីឱ្យកម្ពុជាអាចស្រូបទាញភ្ញៀវទេសចរបានកាន់តែច្រើននាពេលខាងមុខ»។
ជាមួយគ្នានេះ ប្រធានសមាគម CATA ក៏បានថ្លែងអំណរគុណដល់រដ្ឋាភិបាលដែលកាលពីពេលថ្មីៗនេះ បានសម្រេចធ្វើការកែសម្រួលវិធានការជាច្រើន រួមទាំងការថតរូបភាពតាមប្រាសាទនានា។
ប្រធានសមាគមមគ្គុទេសក៍ទេសចរណ៍ភាសាចិនកម្ពុជា (ខេត្តសៀមរាប) លោក អន ហេង សុភ័ក្រ បាននិយាយថា ចំនួនភ្ញៀវបរទេសដែលមកទស្សនាតំបន់ទេសចរណ៍នានានៅកម្កុជាបានកើនឡើងបើធៀបនឹងអំឡុងពេលពិភពលោកជួបនឹងវិបត្តិជំងឺកូវីដ ១៩ ប៉ុន្តែអត្រាកំណើនគឺមិនច្រើនដូចនៅប្រទេសជិតខាងឡើយ។
ទោះយ៉ាងណា លោកស្នើឱ្យអាជ្ញាធរ និងប្រជាជនខ្មែរទាំងអស់ត្រូវខិតខំរួមគ្នារៀបចំសោភណភាព និងបរិស្ថានទេសចរណ៍របស់ខ្លួនឱ្យបានកាន់តែប្រសើរ ដែលមានដូចជា ការគ្រប់គ្រងបរិស្ថាន អនាម័យ សេវាកម្ម ផលិតផលទេសចរណ៍ថ្មីៗ និងការគោរពច្បាប់ និងសីលធម៌ ជាដើម។
ទិន្នន័យក្រសួងទេសចរណ៍ បង្ហាញថា ចន្លោះពីខែមករា ដល់ខែកក្កដា ឆ្នាំ ២០២៤ កម្ពុជាទទួលបានភ្ញៀវបរទេសសរុប ៣ ៧៤២ ២៣០ នាក់ កើនឡើង ២៣,២ ភាគរយធៀបនឹងរយៈពេលដូចគ្នាឆ្នាំ ២០២៣ ដែលមានចំនួន ៣ ០៣៧ ៣៤៤នាក់។
ក្នុងចំណោមភ្ញៀវខាងលើ គឺភ្ញៀវមកពីប្រទេសថៃ មានចំនួន ១ ១៤៧ ៥៣៤ នាក់, វៀតណាម ៧៥៧ ៤៣៧ នាក់, ចិន ៤៦៣ ៩៨០ នាក់, ឡាវ ២២៤ ៨៧១ នាក់, អាមេរិក ១២៩ ៥១៧ នាក់។ ក្រៅពីនោះមានដូចជា កូរ៉េ ឥណ្ឌូនេស៊ី, បារាំង ចក្រភពអង់គ្លេស និងប្រទេសជប៉ុន។ល។
ឆ្នាំ ២០១៩ គឺជាពេលកម្ពុជាទទួលបានភ្ញៀវទេសចរអន្តរជាតិច្រើនបំផុត គឺប្រមាណ ៦,៦១ លាននាក់ កើន ៦,៦ ភាគរយ។ ចំណូលដែលកម្ពុជាទទួលបានពីទេសចរណ៍អន្តរជាតិនៅពេលនោះ គឺ ៤,៩២ ពាន់លានដុល្លារ។ វិស័យទេសចរណ៍ បានចូលរួមចំណែកក្នុងផលិតផលក្នុងស្រុកសរុប (GDP) ១២,១ ភាគរយ។ នេះបើតាមក្រសួងទេសចរណ៍៕
